جہناں دا بچہ اے اوہ لے جان

لكهت:مطلوب وڑائچ

اسرائیل ریاست ہائے متحدہ امریکہ دا اوہ نجائز بچہ اے جہنوں امریکہ اپنے گھٹیا مقصد لئی استعمال کردا اے۔ اسرائیل دی حیثیت اک شرارتی جن ورگی اے جہنوں اک بند بوتل وچ بند کرکے رکھیا جاندا اے جدوں امریکہ عرباں نوں ڈرانا چاہندا اے بوتل دا ڈھکن کھولدا اے جن بوتل چوں باہر آ جاندا اے ہنگامہ آرائی‘ توڑ پھوڑ‘ قتل و غارت‘ لٹ مار کردا اے فیر آل دوالے تے عالمی کمیونٹی نوں ہوش آئوندا اے احساس ہوندا اے اودوں تک ایہ نجائز جن تباہی و بربادی پھیلا چکیا ہوندا اے تے فیر نام نہاد عالمی دبائو دا احساس ہوندیاں ای جن دا مالک اوہنوں فیر توں بوتل وچ بند کر دیندا اے۔
مسلم ملک اک وڈی طاقت نیں ایہ حقیقت اے پر ایہ وی حقیقت اے کہ طاقت بکھری ہوئی اے۔ مسلمان اکمٹھ ہون دی تھاں منتشر سن جو اوہناں نوں کمزور کیتے ہوئے نیں۔ ایہو اوہناں دے زوال دا کارن اے پر ہن حالات بہتری ول کروٹ لے رہے نیں۔ اسرائیل نے ہمیشہ فلسطینیاں نوں جارح تے ظالم ثابت کرن دی سازش کیتی پر ہن انج ممکن نہیں رہیا۔ ہن اوہنے فلسطینیاں تے جو حملے کیتے‘ غزہ تے مغربی کنڈھے دے علاقیاں وچ بربریت تے سفاکیت توں کم لیا اوہ اسرائیلی وزیراعظم دی ذاتی خیالات دی مہم جوئی اے جہدے توں پوری دنیا واقف ہو چکی اے۔ نیتن یاہو دی لکود پارٹی مارچ دے انتخابات وچ 120 وچوں 52سیٹاں جت سکی۔ حکومت بنان لئی 61 دی لوڑ سی۔ یاہو نوں صدر نے حکومت بنان دی دعوت دتی ایہدے لئی 28 دن دتے گئے پر اوہ حکومت نہ بنا سکے تے پنج مئی نوں صدر رولن نوں دس دتا۔ صدر نے دوجی پارٹی دے سربراہ نوں حکومت سازی لئی کہیا اوہنوں وی 28 دن دتے گئے۔ اوہدے اگلے دن یاہو نے مسجد اقصیٰ وچ اگ لوا دتی۔ اوہ لپید دی حکومت سازی دیاں کوششاں نوں متاثر کرکے نویں انتخابات دی راہ پدھری کر رہیا سی۔ مسجداقصیٰ وچ اگ لگن مگروں فلسطینیاں دا اشتعال وچ آنا فطری گل سی تے فیر جو ہویا دنیا دے سامنے اے۔ فلسطینیاں نے احتجاج کیتا تے اسرائیلی فوجاں نے حملے شروع کر دتے یاہو شدت پسند اسرائیلیاں دیاں ہمدردیاں حاصل کرنا چاہندا سی اوہدے وچ کناں کامیاب ہویا ایہدا پتہ اگلے حالات توں لگے گا۔
امریکہ تے اوہدے کجھ اتحادی ایہ سب کجھ جانن دے باوجود اسرائیل دے نال کھڑے نیں۔ اوہناں ولوں سلامتی کونسل وچ مذمتی قرارداد وی منظور نہیں ہون دتی گئی پر جدوں جنگ بندی ہوئی تے قرارداد منظور کر لئی گئی جنگ بندی وی اوس ویلے ہوئی جدوں یاہو نے اپنے گھٹیا مقصد حاصل کر لئے سن۔ امریکہ تے اوہدے زیراثر ملک اسرائیل دے نال کھڑے نیں جد کہ روس تے چین نے فلسطینیاں دی حمایت کیتی اے۔ ایس لئی وڈیاں طاقتاں وچ تقسیم ہور گہری ہو گئی اے جو فلسطین مسئلے دے حل وچ معاون ثابت ہو سکدی اے۔ اودھر مسلم ملکاں وچ وی اتحاد دی امید پیدا ہوئی اے۔ ایران تے سعودی عرب وچ کھچاء گھٹ ہو رہیا اے۔ حالات اوسے طرح بہتری ول جا رہے نیں تے فلسطین دے نال مسئلہ کشمیر دے حل وچ وی پیش رفت ہو سکے گی پر دشمن بڑا چالاک تے مکار اے اوہدیاں سازشاں توں محتاط رہنا ہووے گا۔ اج پوری دنیا وچ فلسطین دے حق وچ مظاہرے ہو رہے نیں ایس لئی کہ اسرائیل نے جارحیت کیتی اے کدھرے وی اسرائیل دی حمایت وچ آواز بلند نہیں ہوئی پر بھارت دے کجھ شدت پسند اسرائیل دے نال نیں تے بینر چکے نظر آئوندے نیں بھارت ورگے دشمناں توں محتاط رہنا ہووے گا۔
دوستو! عالمی حالات ہن پہلے ورگے نہیں رہے پہلے پوری دنیا دا اک چوہدری سی پر ہن چین تے روس وی اپنے آپ نوں اوناں ای وڈا چوہدری سمجھدے نیں جناں امریکہ تے بھارت۔ ایس توں ہٹ کے کہ حالیہ جنگ دوران عددی نقصان کہدا گھٹ یاں زیادہ ہویا پر ایس جنگ دے نتیجے دسدے نیں کہ حماس تے حزب اللہ دیاں کاروائیاںنے ایس واری اسرائیل تے اوہدے اتحادیاں دے پیر اکھاڑ دتے نیں۔ ایہو وجہ اے کہ جنگ بندی دے اعلان دے بعد امریکہ تے اسرائیل دوہاں ملکاں نے کاہل وچ جنگ بندی دے فیصلے تے عملدرآمد کروایا اے تے ایہ جن دا بچہ جہڑا ہن دی واری بوتل وچ بند ہویا اے یقینا ایہدی سیل تے ڈھکن مضبوطی نال بند کر دتے گئے نیں تے لائوڈ سپیکراں تے ایہ اعلان کروایا جا رہیا اے کہ جہناں دا بچہ اے اوہ لے جان تے ہن جد کہ عالم کرونا تے کویڈ19 دے تسلط چوں نکلے گا تے ایہدے اثرات محرکات اک نویں دنیا دی خوشخبری دین گے۔ جہناں وچ بہت سارے چوہدریاں دے تھلیوں زمین کھسک چکی ہووے گی تے عالمی طاقت دے کجھ نویں علمبردار پیدا ہو چکے ہون گے۔٭