آئو سیاست نوں سمجھیے

لکھت:عتیق انور راجہ

نویں ورھے دی پہلی سیاسی خوشخبری تے ایہو اے کہ قومی ترقی تے خوشحالی لئی عکسری تے ساری سیاسی قیادتاں اک پیج تے نظر آ رہیاں نیں۔ ہن جد کہ وزیراعظم عمران خان ملک نوں اک عظیم معاشی قوت بنان لئی ہر دم کوشاں نیں ویلے دا تقاضا اے کہ قومی سا لمیت تے بقاء لئی ملک نوں اندرونی طور تے مضبوط تر بنایا جاوے تے عوامی مسئلے ترجیحی بنیاداں تے حل کیتے جان۔ جے ساری حکومتی ٹیم ایہناں دے وزراء سیاسی پوائنٹ سکورنگ چھڈ کے اپنا فعال کردار ادا کرن لگن، تے اسیں سماجی انصاف تے معاشی ترقی وچ کامیاب ہو سکدے نیں۔ اسیں اکثر کہنے آں کہ ساڈے ملک وچ سیاستداناں نوں سیاست دی سمجھ نہیں اے پر کدی کدی دل وچ خیال آندا اے کہ ایس ملک وچ ہر کوئی اپنی اپنی سمجھ بوجھ دے مطابق سیاست کیتی جا رہیا اے۔ صبح اکھ کھلے تے چاء دی طلب وچ بیگم نوں آواز دیو تے اوہ اپنی لے وچ دوچار ذومعنی گلاں سیاسی کرنا ہمیشہ اپنا فرض سمجھدی اے۔ ساڈا دودھ والا حالات حاضرہ تے اپنی سمجھ دے مطابق تبصرہ کرنا اپنا فرض اولین سمجھدا اے۔ اوہ اجیہا باخبر انسان اے کہ ایہنوں علاقے وچ ہر کسے دے بارے مکمل جانکاری ہوندی اے۔ کسے چاء خانے وچ چاء پین بیٹھیے تے اکثر لکھیا نظر آندا اے ایتھے سیاسی گل بات کرنا منع اے۔ ایہ وی ویسے کیہ خوب سیاست اے۔ کسے شادی تے جایئے کسے مرگ تے اپڑیئے رسمی گلاں دے وچکار محلے علاقے توں شروع ہون والی گل بات وزیراعظم دے یوٹرنز توں ہوندی ہوئی وائٹ ہاؤس تک جا اپڑدی اے۔ ویکھیا گیا اے کہ ہر بندہ جہڑا ملکی سیاست وچ دلچسپی نہ لین دی گل کردا اے اوہ وی سیاسی گل بات دا موقع ہتھوں جان نہیں دیندا۔ ملک وچ جمہوریت ہووے یاں آمریت، ہر دور وچ کجھ صحافی انفرادی طور تے، تے کجھ میڈیا ہاؤسز جابر سلطان دے ساہمنے سینہ سپر رہے تے بعض مالکاں تے صحافیاں نے ہر دور وچ جم کے سیاست کیتی تے اپنے بالاں دا مستقبل تابناک بنان دی خاطر اپنے قلم دی طاقت دا بھرواں استعمال کردیاں ہوئیاں وکھو وکھ طریقیاں نال بہت سارے مالی فوائد حاصل کیتے۔ یعنی ہر دور وچ کجھ سر پھرے حق گل تے ضرور ڈٹے رہے تے ہر دور وچ بہت سارے رینو کٹے اپنی بولی لگواندے رہے۔ انج تاں ایہ وی عجیب اے کہ ساڈے سیاستدان جمہوریت لئی نعرے بلند کردے نیں ووٹ منگدے نیں تے جدوں ایہناں نوں ووٹ دی طاقت مل جاندی اے تے ایہ آپ آمر بن جاندے نیں۔ ساڈی سیاسی تریخ ایس گل دی گواہ اے کہ اسمبلی وچ قنون بنان دی بجائے اپنی مرضی تے اپنی سہولت دے آرڈیننس جاری کروان دے سب ای خواہشمند رہے نیں۔ وفاقی وزیر اسد عمر نے ٹوئٹر تے لکھیا کہ فیصل آباد وچ پناہ گاہ دے دورے تے کھانا کھان دا موقع ملیا، وزیراعظم تے مینوں دوواں نوں آلو گوشت بہت پسند آیا تے وزیراعظم ا کہنا سی کہ ایہ کھانا وزیراعظم ہاؤس توں وی چنگا پکیا ہویا اے۔
سانوں پتہ اے کہ میاں نوازشریف دے لائق صاحبزادے نہ صرف دوجے ملک دے شہری نیں سگوں زمانہ طالب علمی توں ای اوہ بہت وڈے کاروباری ادارے وی چلا رہے نیں۔ ہن اک پاسے بڑھاپے وچ اولاد توں دوری تے دوجے پاسے جیل دیاں سلاخاں، ویسے اک سچی گل ایہ اے کہ ستر ورھے دی عمر تک اپڑدیاں اپڑدیاں کسے وی انسان نوں بہت ساری بیماریاں لاحق ہونا عام جہی گل اے پر میاں صاحب نوں کوٹ لکھپت جیل توں رہائی دی کوئی صورت نظر نہ آئی تے اوہ بیمار ہون دی سیاست کرکے ملک توں دور جا بسے۔ انج تاں آصف زرداری دی سیاست تے ایہناں دا کردار میاں صاحب توں بہت زیادہ ہٹ کے نظر نہیں آندا اے۔ اوہ وی ہن عمر دے ایس حصے وچ جدوں ہتھ وچ سوٹی آ جانا عام جہی گل اے تے دل و دماغ وی کمزور ہو جاندے نیں۔ چنگا ہووے گا کہ ایہناں نوں وی علاج لئی بیرون ملک جان دتا جاوے۔
پتہ نہیں کیوں اج مینوں اوہ افسانوی جیہا کردار یاد آ رہیا اے کہ تقسیم توں پہلاں قصور دے علاقے وچ دو بھرواں چھانگا۔ مانگا نے بہت لٹ مچائی ہوئی سی۔ کجھ مال علاقے دے غریباں وچ ونڈ دیندے۔ جدوں وی انگریز سرکار ایہنوں نوں گرفتار کرن دی کوشش کردی تے علاقے دے لوک ایہناں بھراواں نوں محفوظ پناہ گاہواں فراہم کردے۔ واردات دے بعد ایہ اکثر اک نکے جہے جنگل وچ روپوش ہو جایا کردے جہڑا ایہناں دے ناواں تے چھانگا مانگا دے ناں توں پکاریا جان لگا۔ لوک کہندے نیں کہ چھانگا مانگا انسانی ہتھاں نال لایا گیا دنیا دا دوجا وڈا جنگل اے۔ پاکستانی سیاست وچ چھانگا مانگا اک استعارہ بن چکیا اے جہدی وجہ مصنوعی جنگل ہونا بالکل وی نہیں اے۔ اج ساڈے سیاستداناں دی اپنے مفادات لئی کیتی جان والی سیاست ویکھ کے یقین ہو جاندا اے کہ چھانگا مانگا سیاست اج وی زندہ اے۔ ہن ویکھے مینوں تے سیاست دی الف ب وی نہیں آندی پر گل سیاست توں شروع کیتی تے چلدی چلدی چھانگا مانگا تک جا اپڑی۔ میرے پاکستانیوں جے اپنے بالاں دا مستقبل روشن چاہندے او تے سیاست نوں سمجھنا شروع کرو۔ سیاست وچ دل نال حصہ لوو، سیاست سکھوتے سیاست کرنا سکھو، نواں سال شروع ہوندیاں ای دنیا دے حالات بڑی تیزی نال بدلنا شروع ہو چکے نیں سانوں وی بحیثیت قوم نہ صرف ملکی سگوں عالمی منظرنامے دے پس پردہ چلن والی سیاست نوں سمجھنا ہووے گا۔

50% LikesVS
50% Dislikes

اپنا تبصرہ گھلو