قحط

اج کھان پین تے پان والیاں شیواں دی وافر مقدار موجود اے پر ماڑے بندے دی پہنچ وچ نہیں

آصف عنایت

اُنج تے موجودہ حکمران طبقہ 2014ء توں نویں تاریخ رقم کر رہیا اے۔ تسیں سارے لوک حالیہ کجھ ہفتیاں، دناں یا فیر لمحیاں وچ بدلدی ہوئی صورت حال توں واقف ہوئو گے کیوں جے انٹرنیٹ، فیس بک، یوٹیوب، ٹویٹر تے سوشل میڈیا دے دیگر ذرائع ہر ہر موضوع اُتے تاریخ، حال تے مستقبل دا پوسٹ مارٹم کر رہے نیں۔ یقین کرو زندگی دے لمحے کس قدر قیمتی بلکہ انمول نیں ایس دا اندازہ صرف ایس بندے نوں ہو سکدا اے جس نے موت دی وادی نوں نیڑے توں ویکھیا ہوئے یا جس دے کسے قریبی دا ناں قبر دے کتبے وچ بدل گیا ہوئے۔ زندگی دے لمحے لمحے دی وقعت دا اندازہ پانی دی اک چھِٹ دے ساہ دی نالی وچ چلے جان والے قطرے تے کدی اپنے ای منہ دا لعاب حلق وچ اتردے ویلے ساہ دی نالی لمحہ بھر اٹکن دی وجہ نال کجھ سیکنڈ دے لگن والے پھندے تے رکن والے ساہ توں لایا جا سکدا اے کہ زندگی دا اک ساہ کِنا انمول اے احساس ہوندا اے ایہہ جیہڑیاں ساہنواں بقول گلزار صاحب :
سانس لینا بھی کیسی عادت ہے
جیئے جانا بھی کیا روایت ہے
گلزار صاحب نے تے دکھی انساناں دے زندگی گزارے چلے جان نوں موضوع بنایا پر ایس عادت تے روایت وچ اللہ نہ کرے کہ رکاوٹ آ جائے تے فیر بندے نوں جے اللہ توفیق دیوے زندگی اینی قدر کرے کہ کدی کوئی لمحہ ضائع نہ کرے اللہ دی عبادت اطاعت رسول ﷺ تے خدمت خلق دے علاوہ نہ گزارے تے دنیا وچ جو وی ایس دا جائز وسیلہ روزگار اے ایس وچ دیانت داری وی مکمل عبادت اے ہن ایسے وچ کنہوں پروا اے کہ مردہ جنرل رانی زندہ حامد میر اُتے بھاری پئے، فردوس عاشق اعوان تے شیخ رشید و دیگر ایہناں دے رویاں اُتے کوئی غور کرن دی۔ قوم نوں ایہناں لوکاں نے انج الجھا رکھیا اے کہ انسان دی اپنی ذات نال ملاقات ممکن نہیں رہی ایہہ وکھری ملک و قوم ای نہیں۔ نسلاں نکل گئیاں نیں یقین کرو کہ بالکل دل نہیں چاہندا حکمران طبقیاں دے متعلق لکھن تے ایہناں اُتے ویلا ضائع کرن نوں ایہناں دی انتہائی اکثریت نال مال متاع تے اقتدار دی کرسی واپس لے لئی جائے تے ایہناں وچ خوردبین توں وی لبھیے تے کوئی اک انسانی صفت نہیں ملے گی۔ اج اسیں بحیثیت قوم عجیب بے ہنگم دور توں لنگھ رہے نیں۔ اگلے دن انگریز دور دی گل چل رہی سی۔ نہری نظام، ریلوے دانظام، عدالتی نظام، دیانت دار بیورو کریسی، سفارش تے رشوت توں پاک انصاف، معاشرتی بھائی چارہ، تہذیب و تمدن مذہبی تے اوس ویلے دا جدید ترین انفراسٹرکچر رواداری تے میرے دوست جناب عبدالحق انجم نے آہ بھر کے کہیا کہ بدنصیبی اسیں اوہ دور نہیں ویکھیا تے ایس توں وڈی بدنصیبی کہ اپنے زعما نوں خود ای موت دے گھاٹ اتاردے رہے۔ طریقے بدلے پر نتیجے نہ بدلے۔ اسیں سب ادوار، نظام ہائے حکومت ویکھے۔ براہ راست مارشل لاء بالواسطہ مارشل لاء، جمہوریت تے ہائبرڈ نظام وی ویکھے پر جس قحط دا اج وطن عزیز دے عوام ساہمنا کر رہے نیں۔ ماضی وچ کدی نہیں سی۔ رواداری ناپید ہو گئی، تہذیب، تمدن، بھائی چارے، رواداری ماضی ہوئے معاشی حوالے نال مڈل کلاس تلف کر دتی گئی۔ ایس دی تھاں غریب ترین کلاس آ گئی تے غریب ترین بیکاری بن گئے۔ اللہ کریم نے ساڈے اجتماعی اعمال تے اپنی اپنی ذات توں منافقت تے قومی منافقت دے رویاں دے بدلے وچ ایہہ دن وکھائے۔
پچھلے دناں اک شاعری پڑھی، محترمہ صائمہ آفتاب:
اُداسی، نیم تاریکی، ہوا تازہ نہیں ہے
کہ اس زنداں میں کھڑکی اور دروازہ نہیں ہے
یہ آب تند رو پر جھولتے پُل کی مسافت
کنارے پر کھڑے لوگوں کو اندازہ نہیں ہے
تواتر سے چلی آتی ہے ہر مشکل، تو کیا یہ
سہولت مانگتے رہنے کا خمیازہ نہیں ہے
بہاراں میں کھلا ہے زرورخسار کا گل
میسر اس کو تیری دید کا غازہ نہیں ہے
مرے دل کا خلا یکسر مکمل ہو چکا اب
یہاں خوابوں کے بھی ٹوٹے کا آوازہ نہیں ہے
تقریباً ایس دور وچ لوکاں دی انفرادی تے اجتماعی کیفیت ایہو اے۔ عجیب قحط دا دور اے، قحط محض ایہہ نہیں ہوندا کہ اناج نہ ہوئے، فصل نہ ہوئے، اصل وچ قحط اوہ اے کہ اللہ دی ساری نعمتاں دی فراوانی ہوئے پر انساناں دی پہنچ وچ نہ ہون۔ اج ہر کھانے، پین، اوڑھن والی شیواں دے انبار لگے نیں پر لوکاں دی پہنچ توں دوری ای نہیں ناممکن نیں۔ بجٹ پوری دنیا دے ملکاں وچ سال وچ اک وار آندا اے۔ ساڈے کول سالانہ بجٹ دے بعد ماہانہ تے فیر روزانہ بجٹ آندا اے۔ جنہے معاشی تجزیہ کار نیں سب دے سب حقیقت دے برعکس تجزیے کردے نیں۔ اوہ تندرست کیہ جیہڑا اپنے پیراں اُتے کھڑا نہ ہو سکے۔ اوہ معاشی تیزی کیہ جس وچ زندگی تے زندگی موت وی مہنگی ہو جائے۔ وطن عزیز دے عوام، وسائل تے اکثریت نوں انتہائی اقلیت نے یرغمال بنا رکھیا اے۔ بس آزادی اے تے قانون شکناں تے بدعنواناں نوں نہیں تے ہر پاسے قحط دا رواج اے۔ قانون دی حکمرانی دا، اخلاقیات دا قحط، انسانی اقدار دا قحط، مثبت سوچ دا قحط حتیٰ کہ انسانیت دا قحط تے آزادی دا قحط، پورے نظام تے ادارہ جاتی بدمعاشیاں نوں ویکھو،
وطن عزیز سر زمین بے آئین دکھائی دے
جے وطن عزیز دی حالت ایہہ ہو چکی اے تے فیر تبدیلی آ چکی، ہن انارکی دہلیز پار کر چکی، جدوں پولیس کسے بندے نال پرسنل ہوئے، حکمران پرسنل ہون جتھے انصاف کردے ہوئے چیف جسٹس اپنے آپ نوں غیر محفوظ سمجن اوتھے معاشرت دی حالت دا اندازہ لانا مشکل نہیں۔