قومی اسمبلی:ارباں دے خرچے،نتیجہ گالھاں،مندے بول تے لڑائی جھگڑے

قومی اسمبلی دے اک اجلاس اتے 4توں 5کروڑ دا خرچہ ہُندا اے جیہڑا چھابڑی فروش توں لے کے اِٹاں ڈھون والا مزدور وی چُکدا اے

لہور(بلال مدثر بٹ)جمہوری نظام اندرعام خیال ایہو ای کیتا جاندا اے کہ مقدس ایوان دا مقصدلوکائی دے مسئلیاں دا حل تے بہتر نظام لئی قنون سازی اے۔پر ساڈے ملک اندر ایہہ خیال کملے دے خواب توں ودھ کجھ نہیں۔14 تے 15جون نوں قومی اسمبلی دے اجلاس وچ جوہویا اونھیں پوری قوم نوں شیشہ وکھاکے دسیا اے کہ تسیں کس قسم دے جاہل تے غیر مہذہب لوکاںنوں چُن کے مقدس ایوان اندر اپنا نمایندہ مقرر کیتا اے۔ننگیاں گالھاں،زنانیاں نال بد تہذیبی تے اک دوجے اُتے بجٹ دیاں کاپیاں سٹ کے اپنے اندر دے گند دا پتا دیندے ساڈے نام نہاد معززممبر ثابت کررہے سن کہ ساڈے ملک اندر اوہ جمہوریت کدھرے نہیں جیہڑی وڈے لیڈراں دیاں تقریراں وچ نظر آوندی اے تے عام لوکاںنوں دسیا جاندا اے کہ تہاڈے سارے مسئلیاں دے حل ایسے نظام اندر نیں۔اجلاس وچ جو کرتوت گھولی گئی،اوس توں بعد عام لوک ضرورایہہ سوچن اُتے مجبور ہون گے کہ اسیں ایس نام نہاد جمہوریت کولوںہن تیکر کیہ کھٹیا تے آون والے ویلے وچ کیہ حاصل کر سکدے ہاں۔قومی اسمبلی اندر مچے ایس کپت تے ممبراں دیاں غیر سنجیدہ حرکتاں ویکھ کے کیہ تُسیں اندازہ کر سکدے او کہ قومی اسمبلی دے اجیہے اک اجلاس اُتے ایہہ قوم چار توں پنج کروڑ روپیہ خرچ کردی اے۔یعنی اجیہی کتے خوانی ویکھن لئی ایس قوم دے چھابڑی فروش توں لے کے اِٹاں چکن والے دیہاڑی دار تیکراپنے نیانیاں دے مونہوں روٹی کھو کے ٹیکس دے طور اُتے سرکاری خزانے وچ جمع کراوندا اے(یاد رہوے کہ تیلاں دی ڈبی توں لے کے کھان پین دی ہر شے اُتے حکومت ٹیکس وصولی کردی اے)۔جگتاں بھریاں تقریراں تے گلی محلے دے وگڑے بدمعاشاں جہیاں حرکتاںکرن والے ایہہ ممبر قوم نوں سالانہ کنھے وچ پیندے نیں،ایہہ جان کے یقیناًاکھاں کھلیاں رہ جاندیاں نیں۔اک رپورٹ پاروں پاکستان جیہا غریب ملک جیہڑا قرضے لے کے ڈنگ ٹپا رہیا اے،اوہدی قومی اسمبلی دے ارکان دی سالانہ تنخواہ پچھلے ورھے 12ارب 30کروڑ سی،الاونس تے دوجیاں سہولتاں ایہدے توں ودھ تے وکھ نیں۔انج ای سینیٹ دے ممبراں دی اک ورھے دی تنخواہ 50کروڑ توں ودھ اے۔وزیر،سپیکر،وزیر اعظم تے چیئرمین سینیٹ دا معاملہ ایہدے توں وکھ اے۔وزیر اعظم ہاوس،صدر گھر تے ایوان ِ بالا دے چیئرمین ہوراںدے گھراںتے گڈیاں دے خرچے وی ارب دے لگ بھگ نیں۔ اک ہور رپورٹ دے مطابق ساڈے سٹھ فیصد توں ودھ ارکان اسمبلی ارب پتی نیں تے جیہڑے باقی بچ دے نیں اوہ وی کچھ گھٹ نہیں،اونھاں دے اثاثے وی اتنے ہین کہ عام لوک صرف سوچ ای سکدے نیں۔ماڑے بندے دے ٹیکساں اُتے موجاں کرن والیاں نوں آپ ٹیکس دین لگیاں جیویں موت پے جاندی اے، ہمیشہ اپنے اثاثے گھٹ ظاہر کردے نیں۔ جیویں لندن وچ شاہی زندگی گزارن والے میاں نواز شریف ہوراں دا کاغذاں وچ نہ کوئی کاروبار اے تے نہ ای کمائی داکوئی ذریعہ۔باقی سیاست دان وی اُنھی ویہہ دے فرق نال انج ای ظاہر کردے نیں کہ اونھاں دے پلے تے ککھ نہیں، پر رب دا بڑا کرم اے جیہڑا روز ایہناں دے خزانے غیب توں بھر دیندا اے۔ایہہ مال کتھوں تے کیویںآوندا اے کجھ پتا نہیں۔تسیں جمہوریت دے ایہناں مامیاں دا موازنہ بھارت نال کرو جیہڑا دنیا دی وڈی جمہوریت اکھواندا اے،تاں سامنے آوے گا کہ 2018وچ اوتھے لوک سبھا دے ممبردی تنخواہ ودھا کے 50ہزار کیتی گئی،الاونس تے مراعاتاں وی ایہدے وچ ای سن۔ساڈے معزز ممبر جیہڑے کروڑاں بلکہ ارباں خرچ کرکے ممبر اسمبلی یا سینیٹ دے رکن بن دے نیں ایہناں نوں ذرا شرم نہیں آوندی کہ اوہ پین والے پانی توں لے کے آون جان لئی وی سرکاری خزانہ ورت دے نیں۔ایہہ ارباں پتی سیٹھ،فیکٹریاں دے مالک تے وڈیاںزمیناں دے مالک حلف چکدیاں نال ای سارے خرچے اوس غریب قوم اُتے پا دیندے نیں جیہدے 40فیصد لوک غریبی دی لیک توں تھلے زندگی گزاررہے نیں۔جس ملک دے اسی لکھ توں ودھ بال صرف ایس کرکے سکولاںتوں باہر نیں کہ جے اوہ ماپیاں نال رل کے کم نہیں کرن گے تے گھر دا چُلہا نہیں بلے گا۔ستر فیصد زنانیاں پوری خوراک توں محروم نیں۔73فیصد لوکائی نوں پین دا صاف پانی نہیں ملدا۔44فیصد بال غذائی قلت دا شکار نیں۔علاج معالجے دا حال ایہہ ہے کہ پاکستان دا شمار دوران زچگی سب توں ودھ موتاں والے ملکاں اندر ہُندا اے۔ایہدے باوجود ساڈے ارکان اسمبلی سنجیدہ ہون اُتے راضی نہیں۔اوہ جاندے ای نہیں کہ اوہ جس قوم دے خرچے اُتے موجاں کرن نوں اپنا حق سمجھدے نیں اوہ کیہو جیہے حالاتاں دا سامنا کررہی اے۔ایہناںدیاں عیاشیاںول ویکھو تے انج لگدا اے جیویں ایہہ لوکائی دا لہو پین نوں اپنا مڈھلا حق سمجھدے نیں۔غریب لوک جنھاں لیڈراں نوں اسمبلی وچ گھل کے روزانہ دی بنیاد اتے کروڑاں خرچ کردے نیں اونھاں نوں لوکاں دے مڈھلے مسئلیاں دی کنھی فکر اے ایہدا اندازہ تہانوں اسمبلی دے ایس تازہ معرکے توں ہو جانا چاہیدا اے۔کتاباں مار کے یا گالھاں کڈھ کے ساڈے لوک نمایندے آخر کیہ ثابت کرنا چاوہندے نیں؟کیہ ایہہ بُھکھی ننگی قوم ایہناں دیاں اجیہیاں حرکتاں اُتے کروڑاںخرچ کرن دی متحمل ہو سکدی اے؟اوہ کیہڑی سیوا اے جیہڑی ایہناں لیڈراں ہتھوں ہوئی،عام بندے دے حالات بدلے یا اوہدے گھروں بھکھاں مُکیاں۔اوہدے بالاں نوں کتاباں لبھیاں یا سرکاری ہسپتالاں وچ علاج دیاں سہولتاں؟جے نہیں تے سانھوں آکھن دیو کہ ایس ملک دے ماڑے بندے نوں جمہوریت دے ناں اُتے ہمیشہ دھوکہ دے کے سیاست داناں اپنی عیاشی تے موجاںدا ٹیچا لایا اے۔

اپنا تبصرہ گھلو