خیبرپختونخوا ایمپیکٹ چیلنج پروگرام…نویں خیال نال کمال کر

لکھت:ڈاکٹر مریم چغتائی

خیبر پختونخواہ ایمپیکٹ چیلنج پروگرام میرے لئی نویں تجربات تے مشاہدات دی وجہ بنیا اے۔ ایس پروگرام دی وجہ توں مینوں خیبر پختونخواہ دی ثقافت، ماحول، رسم و رواج تے لوکاں نوں بہت قریب توں ویکھن دا موقع ملیا۔ نوجواناں دی قابلیت تے اوہناں دے اندر کجھ کرن دی لگن نے مینوں حیران کر دتا کہ ساڈی نظر وچ ایہ صوبہ سب توں پسماندہ تے دہشت گردی دا شکار سی۔ پر ایتھوں دے نوجوان کجھ کرن دے عزم نال بھرپور نیں۔ نوجوان مرد تے عورتاں اپنے لئی تے اپنی آن والیاں نسلاں لئی کجھ کرنا چاہندے نیں۔
ایس پروگرام دے دوران بہت سارے پسماندہ تے دور دراز دے علاقیاں وچ مینوں آپ جان دا اتفاق ہویا تے مینوں ایہ ویکھ کے بہت خوشی ہوئی کہ ساڈی نوجوان نسل بڑی باصلاحیت اے تے خاص طور تے خیبر پختونخواہ دا نوجوان اوہناں دقیانوسی تصورات دی نفی کردا اے جہناں بارے عموماً ساڈا تصور بنیا ہویا اے۔ ایہناں ساریاں گلاں دے پیش نظر میں ایہ فیصلہ کیتا کہ کیوں نہ ایہناں ساریاں نوجواناں بارے لکھاں۔ میں اوہناں دی آواز لوکاں تک اپڑاواں کہ خیبر پختونخواہ ایمپیکٹ چیلنج پروگرام کرن توں پہلاں اوہ کیہ سوچدے سن تے کہڑے حالات دا شکار سن تے ایس پروگرام نوں کرن دے بعد اوہ اپنے آپ وچ کیہ تبدیلی محسوس کر رہے نیں۔
ایسے سلسلے وچ سب توں پہلاں آرٹیکل وچ تہاڈا تعارف سحر صبا پیرزادہ نال کروانا چاہواں گی جو کہ خیبر پختونخواہ ایمپیکٹ چیلنج پروگرام وچ ساڈی اینٹر پرینیور نیں تے دسترخوان دے ناں توں ہن اپنا کاروبار چلا رہیاں نیں۔ سحر پیرزادہ مردان دے اک پنڈ دی رہن والیاں نیںتے وومن یونیورسٹی مردان وچ سائیکالوجی دی سٹوڈنٹ نیں۔سحر پیرزادہ اپنی پہلے دی زندگی دے حالات دسدیاں کہندیاں نیںکہ اوہ یونیورسٹی وچ اک عام طالب علم وانگوں پڑھ رہیاںسن تے اپنی یونیورسٹی دی وکھو وکھ تقریبات وچ حصہ لیندیاں رہیاں نیں ۔جدوں اوہناں نوں خیبر پختونخواہ ایمپیکٹ چیلنج پروگرام دا پتہ چلیا تے اوہناں نے ایہدے وچ وی حصہ لین داارادہ کر لیا تے عرضی جمع کروا دتی۔ اوہ کہندیاں نیں کہ اوہ دن میری زندگی وچ بہت خوشی دا دن سی جدوں مینوں پتہ چلیا کہ میں خیبر پختونخواہ ایمپیکٹ چیلنج پروگرام لئی منتخب کر لئی گئی آں۔
میں کدی سوچیا وی نہیں سی کہ میں اک دیہاڑ اپنے مستقبل دی ایس طرح پلاننگ کراں گی تے اک کاروبار نوں چلان دا سوچاں گی۔منتخب ہون دے بعد ساڈی تربیت شروع ہو گئی۔ جیویں جیویں میں تربیت دے مرحلیاں توں لنگھدی گئی میرے ساہمنے اک نویں دنیا کھلدی گئی۔ مینوں سمجھ آن لگی کہ اک کاروبار دا آغاز کیویں کیتا جاندا اے تے اک کاروبار نوں کرن لئی کہڑے کہڑے مرحلیاں توں لنگھنا پیندا اے تے کہڑیاں کہڑیاں گلاں دا خیال رکھنا پیندا اے۔ ایس تربیت دے عمل نے میری زندگی وچ اوہناں پہلوواں نوں نمایاں کر دتا جہناں وچ میں اج توں پہلاں آ شکار نہ سی۔ کاروبار نوں اک آئیڈیا توں لے کے عملی آغاز تک دے سارے پہلوواں نوں میں چنگی طرح سمجھ گئی سی۔ سارے مرحلیاں توں لنگھن دے بعد آخر کار اوہ دن آ ہی گیا جدوں میں اپنے کاروبار دے آغاز لئی رقم ساڈی صوبائی حکومت ولوں دتی جاندی سی۔ اوس دیہاڑ سینئر صوبائی وزیر سر عاطف خان توں رقم وصول کرن دے بعد ایہ احساس ہویا کہ میری زندگی بدلن جا رہی اے تے ہن عمل دا ویلا شروع ہو گیا اے۔
اپنی زندگی وچ مینوں سب توں ودھ خود اعتمادی دی کمی محسوس ہوندی سی تے دوران تربیت میں سب توں ودھ ایہو سکھیا کہ کیویں اپنی ایس کمی نوں دور کیتا جاوے۔ اپنی ایسے تربیت ای دی وجہ توں میں اپنے آپ وچ تبدیلی محسوس کرنی آں تے پہلاں توں کدھرے ودھ خود اعتماد شخصیت دی مالک آں۔ میرا گھر کیوں جے اک پنڈ وچ اے تے میرے پنڈ وچ عورتاں دے کم کرن یا ں کاروبار کرن نوں چنگا نہیں سمجھیا جاندا سی۔ لوکاں دی ایسے سوچ نوں مینوں تبدیل کرنا سی تے دسنا سی کہ عورتاں اپنی اقدار دا خیال رکھدیاں ہوئیاں کم تے کاروبار وی کر سکدیاں نیں۔ ایہو تصور ساہمنے رکھدیاں ہوئیاں میں اپنے کم دا آغاز کر دتا۔ شروع وچ کجھ مشکلات دا ساہمنا کرنا پیا۔ سب توں مشکل کم اپنے کاروبار لئی موزوں لوکاں دا انتخاب کرنا سی جہدے وچ شروع وچ کافی پریشانی چکنی پئی۔ لوکاں نوں کم دی تربیت دتی تے تربیت دے بعد اوہ کم چھڈ جاندے سن فیر ایہو عمل دوبارہ دہرانا پیا سی۔ ایسے طرح دی دوجی مشکلات تے اپنی ٹریننگ دی وجہ توں قابو پایا تے اج اللہ دا شکر اے کہ میں اک کامیاب کاروبار کر رہی آں۔ میں ہن وکھو وکھ فوڈ سروسز مہیا کر رہی آں جہناں وچ کیٹرنگ ، ایونٹس فوڈ سپلائی ، آفس تے یونیورسٹیاں نوں کھانے دی فراہمی شامل نیں۔ میں وکھو وکھ دفتراں تے یونیورسٹیاں دے نال ایم او یو سائن کر لئے نیں تے ہن اوہناں نوںلنچ مہیا کرنی آں۔ایہدے علاوہ اسیں بیکڈ فوڈ تے فروزون فوڈ وی مہیا کرنے آں۔ میں اپنے کم نوں بہت چنگی طرح اگے لے جا رہی آں مینوں ہن پندرہ لکھ روپے دی نویں گرانٹ ملی اے جہدے نال میں ہن مصالحہ جات دا پلانٹ لا رہی آں تے بڑی جلدی تسیں دستر خوان دے مصالحہ جات وی مارکیٹ وچ ویکھو گے۔
سحرپیرزادہ نے اپنے بارے دسدیاں ہوئیاں مینوں آکھیا پہلاں اوہنوں اوہدے پیو دے ناں نال جانیا جاندا سی پر ہن لوک اوہنوں دستر خوان دی سی ای او دے طور تے بلاندے نیں۔ پہلاں اوہ اپنے والدین دے دستِ نگر سی پر اج اوہ پچھلے دو سمسٹر توں اپنی فیس آپ ادا کر رہی اے نہ صرف آپ کما رہی اے سگوں اوہ بارہ توں پندرہ لوکاں نوں روزگار مہیا کر رہی اے تے اوہناں نوں تنخواہ دیندی اے۔ ایہ اعتماد اوہنوں خیبر پختونخواہ ایمپیکٹ چیلنج پروگرام تے اوہدے والدین دی وجہ توں ملیا اے۔ جہناں نے دقیانوسی گلاں تے توجہ دین دی بجائے اپنی بچی نوں زندگی وچ کجھ کر وکھان دا موقع دتا۔
سحر پیرزادہ دے مطابق ایہ پروگرام اک نہایت قابل تحسین پروگرام اے جہدی وجہ توں ایہدی زندگی بدل گئی۔ اوہدا خیال اے کہ ایسے طرح دے ہور وی پروگرام شروع کیتے جان تاں جے لوکاں نوں ودھ توں ودھ روزگار دے مواقع مل سکن۔ ایس پروگرام تے اپنی نوجوان نسل لئی کیتے جا رہے ہور اقدامات تے اوہ اپنے سینئر صوبائی وزیر عاطف خان تے سرکار دی بہت شکر گزار اے تے آس کردی اے کہ ترقی دا ایہ سلسلہ انج ای چلدا رہوے گا۔ اک ویلا آؤے گا جدوں پاکستان دے دوجے صوبے خیبر پختونخواہ دی تقلید کرن گے۔
بقول علامہ اقبال:
اس قوم کو شمشیر کی حاجت نہیں رہتی۔
ہو جس کے جوانوں کی خودی صورتِ فولاد۔

50% LikesVS
50% Dislikes

اپنا تبصرہ گھلو