اک ٹکٹ وچ دو مزے!

ارشاد بھٹی

خوشی اے کہ ساڈی شرح ترقی 3.94فیصد ہو گئی‘ خوشی اے کہ اگلے مالی ورھے وچ شرح ترقی 4.8فیصد ہووے گی۔ خوشی اے کہ بین الاقوامی ادارے موڈیز نے پاکستان دا معاشی آئوٹ لک مستحکم قرار دتا بھاویں مینوں پتہ اے کہ جاری مالی ورھے دے شروع تے آپ حکومت نے شرح ترقی دا ہدف 2.1فیصد رکھیا سی۔ مینوں پتہ اے کہ آئی ایم ایف نے شرح ترقی دا اندازا 2فیصد لایا سی۔ ورلڈ بینک نے شرح ترقی ڈیڑھ فیصد دسی سی۔ مینوں پتہ اے کہ پچھلے مہینے آپ حکومت نے اک عالمی معاشی ادارے نوں دسیا کہ ساڈی شرح ترقی 2.9فیصد ہووے گی۔ مینوں پتہ اے کہ ڈاکٹر حفیظ پاشا‘ ڈاکٹر اشفاق حسن‘ قیصربنگالی تے فرخ سلیم ورگے ماہرین معیشت شرح ترقی دی کہانی کجھ ہور ای سنا رہے نیں۔ مینوں پتہ اے کہ حکومت پچھلے ورھے 1.9 فیصد شرح ترقی نوں 3.3فیصد وکھا چکی اے۔ مینوں پتہ اے کہ چپکے چپکے ساڈی شرح ترقی منفی اعشاریے نوں وی چھو آئی۔ مینوں پتہ اے کہ میری حکومت 2.94فیصد شرح ترقی تے لڈیاں پا رہی اے جد کہ گھر گھر وچ مہنگائی‘ بیروزگاری‘ غربت دیاں دھمالاں جاری نیں۔ مینوں ایہ سب کجھ پتہ اے پر فیر وی مینوں خوشی اے کہ گھٹو گھٹ کجھ چنگا سنن نوں تے ملیا‘ اسیں تے چنگا سنن نوں وی ترس گئے سی۔ ایتھے خوشی ایہ وی اے کہ ایس ورھے کنک ریکارڈ ساز‘ گنے دی پیداوار توقع توں ودھ‘ تعمیراتی کاروبار تے ایہدے نال جڑے 32شعبیاں وچ تیزی‘ خوشی ایہہ وی اے کہ احساس ہیلتھ کارڈ پروگرام کمال دا رہیا اے خوشی ایہہ وی اے کہ ایس ورھے بیرون ملک پاکستانیاں نے ریکارڈ پیسہ گھلیا۔ سٹاک ایکسچینج سنے معاشی اشاریاں وچ بہت بہتری‘ ایف بی آر دی وصولی 14فیصد ودھی‘ دعا ایہو اے کہ ایہ سب چنگیاں گلاں کاغذاں‘ دعویاں تک ای نہ رہیاں‘ ایہناں دے اثرات عوامی زندگیاں وچ وی آئون‘ عمران خان دے کول ہن دو ورھے‘ ایہ Do or Die والے دو ورھے‘ کپتان ایہناں دو ورھیاں وچ کجھ کر گئے تے ٹھیک نہیں تے اب کے ہم بچھڑے تو شاید کبھی خوابوں میں ملیں‘ اک واری فیر ایہو دعا اے کہ جو کجھ حکومت کہہ رہی اے اوہ سچ نکلے پر دکھ دی گل ایہہ وے کہ معیشت ہووے یاں سیاست‘ ساڈا نظام اجیہا مضحکہ خیزجھوٹ سچ دا پتہ ای نہیں چلدا۔
مضحکہ خیز نظام توں یاد آیا دو ورھے دس مہینے بعد چوہدری نثار نے ممبر پنجاب اسمبلی دا حلف چک لیا۔ مطلب اوہ دو ورھے دس مہینے پہلاں ایم پی اے منتخب ہوئے تے گھر بیٹھے رہے۔ کیوں‘ پتہ نہیں‘ سیٹ کیوں نہیں چھڈی‘ پتہ نہیں‘ وچارہ قنون وی اجیہا بے بس کہ نہ چوہدری صاحب نوں اسمبلی سد سکیا نہ فارغ کر سکیا۔ مضحکہ خیز نظام توں یاد آیا کہ اسحاق ڈار عدالتی مفرور تے لندن وچ پر سینیٹر منتخب ہو گئے۔ ایوان بالا دے رکن‘ چشم بددور‘ ایتھے وی وچارہ قنون اجیہا بے بس کہ چپ چاپ منہ تک رہیا اے۔ مضحکہ خیز نظام توں ای یاد آیا کہ خیر نال شہبازشریف دا فیر توں مفاہمت مشن شروع ہو چکیا اے نوازشریف دی مزاحمت اک واری فیر ریسٹ تے‘ رائے ونڈ محل وچ اک سوئچ لگا ہویا اے ایہ آن آف سوئچ نہیں‘ ایہ انقلابی‘ مفاہمتی سوئچ‘ بٹن دبائو تے نوازشریف میدان وچ‘ سویلین بالادستی‘ جمہوریت دی بالادستی‘ ووٹ نوں عزت دیو دی کیسٹ چل پوے۔ مطلب اوہو گھسیاں پٹیاں گلاں‘ بٹن دائو تے نوازشریف چپ‘ مفاہمت شروع‘ شہباز دیاں پروازاں شروع‘ راتاں دیاں ملاقاتاں‘ بیک ڈور رابطے۔
بھینو تے بھرائو‘ چوہدریو‘ نمبردارو ملک خطرے وچ‘ ملک بحران وچ‘ عوام پس گئے‘ کدھرے 71ء دا سانحہ دوبارہ نہ ہو جاوے۔ آئو رل مل بہیے‘ نظام چلان‘ ملک و قوم لئی آئو میثاق معیشت کر لیے۔ آئو میثاق جمہوریت کر لیے‘ سانوں کجھ نہیں چاہیدا‘ آئو پاکستان دی خاطر اکٹھے ہو جائیے۔ ایس واری شہبازشریف نے جدوں کہیا کہ ملکی مفاد لئی لندن جا کے نوازشریف دے پیر وی پھڑنے پئے تے پھڑاں گا تے یقین منو ایہ سن کے اکھاں وچ اتھرو آ گئے اوہ تے اللہ دا شکر اے کہ پچھلی تن دہائیاں توں مزاحمت‘ مفاہمت دے کھیڈ تماشے ویکھدے سن دے رہے‘ میثاق جمہوریت‘ میثاق معیشت‘ میثاق عوام‘ میثاق پاکستان ورگے سارے ڈرامے بھگت چکے‘ نہیں تے پیراں تے پین نال تے پتہ نہیں دل کنے عرصے تک دکھی رہندا‘ پتہ نہیں کدوں تک اتھرو وگدے۔
بس کرو یار‘ بہت ہو گیا ہور نہیں تے گھٹو گھٹ بے وقوف بنان دا کوئی نواں طریقہ ای لبھ لوو‘ اپوزیشن وچ جمہوریت‘ اقتدار وچ بادشاہت‘ جدوں پھس جائو اودوں میثاق نہیں تے کون میں‘ کون توں‘ سانوں پتہ اے مسئلہ کیہ اے ایہ دوویں بھائی خاندان سنے نکونک کیساں وچ پھسے ہوئے نیں ایہ کیس ختم کران‘ 2023ء وچ ہر حال وچ اقتدار وچ واپس آنا‘ ایہ سروائیول دا مسئلہ‘ ہن جدوں وڈا بھائی تے بھترئی عدلیہ‘ اسٹیبلشمنٹ تے چڑھائیاں کر چکے‘ جدوں پی ڈی ایم بنوا‘ تڑوا چکے‘ جدوں جلسے جلوس‘ ریلیاں کڈھ چکے‘ جدوں دھمکیاں‘ بڑھکاں مار چکے‘ اودوں وڈے نے چھوٹے نوں کہیا‘ جائو ذرا اپنی مفاہمتی مشین نال انقلابی فصل کٹو‘ چشم بدور‘ یقین منوں‘ جے ایہ لوک ہالی ووڈ وچ ہوندے تے ہن تک کئی واری آسکر ایوارڈ لے چکے ہوندے۔ کیہ پرفارمنس اے ایہناں دی‘ چشم بددور‘ ایس واری چورن ایہ ویچیا جا رہیا اے کہ شہبازشریف تن نکاتی مفاہمتی ایجنڈا لے کے آخری سیاسی گل بات کرن لندن نوازشریف دے کول جانا چاہ رہے نیں جے نوازشریف گل من گئے تے شہبازشریف نوں فل چارج ودفل اختیار مل گیا تے شہبازشریف واپس آ کے اپنے تن نکاتی مفاہمتی ایجنڈے تے کم شروع کر کے ملک دی بیڑی جھلن چوں کڈھن گے تے جے نوازشریف نے گل نہ منی تے فیر شہبازشریف سیاست توں ریٹائرمنٹ لے لین گے۔ پہلی گل ساڈی اینی خوش نصیبی کتھے کہ کوئی سیاستدان ریٹائر ہووے۔ دوجی گل جے نوازشریف من گئے تے شہبازشریف نوں فل چارج ملے گا نہ منے تے فل چارج مریم نواز تے نوازشریف دے اپنے کول مطلب دوہاں صورتاں وچ فل چارج گھر وچ‘ پارٹی دے باقی لوک پرانیاں تنخواہواں تے ای کم کرن گے۔
پیارے بچو! ایہ ہوندا اے جمہوریت دا حسن‘ چترچلاکیاں ویکھو‘ کیوں جے ویلا گھٹ مقابلہ سخت‘ ایس لئی جدوں تک کوئی ہتھ نہیں پھڑاندا اودوں تک مریم نواز پی ڈی ایم پلیٹ فارمز توں مزاحمت تے شہبازشریف پارلیمنٹ دے فورم توں مفاہمت کرن گے۔ مزاحمت‘ مفاہمت نال نال‘ مطلب جتھوں داء لگ جاوے‘ صدقے جاواں‘ مزاحمت وی اپنے واسطے‘ مفاہمت وی اپنے واسطے‘ شریف ڈکشنری‘ جمہوریت اصلی اوہ جہدے وچ اقتدار اپنے کول‘ سویلین بالادستی توں مراد اپنی بالادستی‘ ووٹ نوں عزت دیو توں مطلب اپنی عزت‘ واہ رے مزاحمت‘ واہ رے مفاہمت‘ عوام کنے خوش نصیب نیں کہ اک ٹکٹ وچ دو فلماں‘ اک ٹکٹ وچ دو مزے‘ پیارے عوام انجوائے کرو۔ (بشکریہ روزنامہ جنگ)