حمد باری تعالیٰ
یونس بھٹی
ربا تیری مرضی بھاویں مینوں لکھ غریب رکھ
صدقہ پاک رسولؐ دا مالک اپنے پر قریب رکھ
تیرے چاہن والے جہڑے اوہناں دے وچ ہوواں
میری ایہہ ای عرض مولا میرے انج نصیب رکھ
سائیں مینوں اپنے فضلاں دے وچ رکھنا آپے
اُتے تھلے اگے پچھے جو چاہویں ترتیب رکھ
سدھے راہواں اُتے پاویں نالے کرماں رکھیں
ویری ہوئے جگ تے سارے توں تے بس حبیب رکھ
تیرا ذکر تے صفتاں لکھاں تیرے یار دیاں
ربا یونس بھٹی نوں ہن انج دا بس ادیب رکھ
