گیت

نصیراحمد

ہور نہ گل کرو ایہ گل بتھیری اے
میں پنجابی دا پنجابی میری اے
ایتھوں دا میں جمیا جایا
مینوں نانک سینے لایا
مادھو لال نے جھوک سجائی
باہو نے ہو آن پڑھائی
بلھے عشق نبھانا دسیا
نچ کے یار منانا دسیا
وارث شاہ توں سکھی گل گھنیری اے
میں پنجابی دا پنجابی میری اے
دلا بھٹی احمد رائے
اس دھرتی دے جمے جائے
آ پورس دی گل سناواں
لتھا نال سکندر ساواں
انکھاں والے مول نہ ہٹدے
ویری اوڑک مٹی چٹدے
سارے جگ نے منی آپ دلیری اے
میں پنجابی دا پنجابی میری اے
اس دھرتی دے دکھ اولے
ایہدے پتر کملے جھلے
ایہدا پیندے ایہدا کھاندے
پھیر وی گن غیرا ں دے گاندے
مٹی نال نیاں نوں بھلے
ویکھو پتر ماں نوں بھلے
ایہ وی بھلے ماں دی شان اچیری اے
میں پنجابی دا پنجابی میری اے