آزاد کشمیر وچ برفانی تودیاں دی زد وچ آکے 62بندے مر گئے، کئی لاپتہ

مظفرآباد: آزاد کشمیر وچ شدید برفباری دے دوران برفانی تودے ڈگن نال 62بندے جاں بحق تے درجناں زخمی جد کہ کئی لاپتہ ہو گئے۔

آزاد کشمیر وچ جاری بارشاں تے برفباری دی وجہ توں جاں بحق بندیاں دی تعداد 62ہو گئی اے۔ وادی نیلم دے اک ای پنڈ سرگن بگوالی وچ 19بندے برفانی تودہ وچ دب کے جاں بحق ہوئے۔ نیلم تے لیپا سنے بالائی علاقیاں وچ ٹیلی فون تے بجلی دا نظام درہم برہم ہو گیا۔

وکھو وکھ ضلعیاں دی رابطہ سڑکاں وی برف باری دی وجہ توں بند نیں تے عوام گھراں وچ محصور ہو کے رہ گئے نیں۔ وزیراعظم آزاد کشمیر راجہ فاروق حیدر نے دسیا ریاست بھر وچ بارش تے برفباری نال ہن تک 62بندے جاں بحق تے 47زخمی ہو چکے نیں۔

وادی نیلم وچ 59جد کہ کوٹلی، راولاکوٹ تے سدھنوتی وچ اک اک بندہ جاں بحق ہو یا جد کہ 56توں ودھ مکانات مکمل طور تے تباہ ہو گئے۔ وزیر مملکت ڈیزاسٹر مینجمنٹ اتھارٹی احمد رضا قادری نے میڈیا نال گل کردیاں دسیا وادی نیلم وچ جاں بحق 49بندیاں دیاں لاشاں کڈھ لئیاں نیں، پاک فوج دے ہیلی کاپٹر زخمیاں نوں ہسپتال منتقل کر رہے نیں، برف تھلے دب جان والے بندیاں دی کھوج لئی وی ریسکیو آپریشن جاری اے، ہلاکتاں وچ وادھے دا خدشہ اے۔

50% LikesVS
50% Dislikes

اپنا تبصرہ گھلو