اسیں اپنی تباہی دے ذمہ دار آپ آں

وزیر خزانہ شوکت ترین نے کجھ چنگے فیصلے کیتے نیں، ایہناں فیصلیاں نال یقینا غریب تے مڈل کلاس طبقے دی زندگیاں بدلن گیاں تے مزید بدلن وچ مدد ملے گی

رابعہ رحمن

زندگی انسان دی جویں وی لنگھ رہی ہوندی اے اوہ ایس دے نال سمجھوتہ کردے ہوئے گزاردا چلا جاندا اے پر اک حساس انسان اپنے علاوہ اپنے اردگرد وی بوہت کجھ ویکھدا تے محسوس کردا اے جو کجھ وی ملک وچ ہوندا اے سب کجھ عوام دے ناں اُتے ہوندا اے، تہاڈے نقصان تے پہلے ای تہاڈے نیں پر مفاد نوں وی تہاڈے خلاف ای استعمال کیتا جاندا اے۔ سب توں پہلے سمجھن دی گل ایہہ وے کہ وڈی وڈی مارکیٹاں وچ جیہڑے مزدوری لئی گارڈز بٹھائے جاندے نیں شدید گرمی وچ ایہناں دا وگدا ہویا پسینہ ایس گل دا ثبوت دیندا اے کہ ایس مارکیٹ دے سارے دکاناں دے مالکان یا کرائے دار انتہائی سنگدل نیں، بوہت ساری انج دی وڈی مارکیٹاں وچ بیٹھے ہوئے گارڈ جیہڑے ایہناں دی حفاظت لئی اوتھے کھڑے نیں ایہناں نوں اک پنکھا تیکر لا کے نہیں دتا جاندا، ایہہ کنہی وڈی سفاکی اے کہ پسینہ تہاڈا تے آبیاری ایہناں دے آنگن دی جیہڑے تہاڈے توں روٹی کپڑا مکان تے کھوہ چکے نیں ہن سکون وی کھوہ رہے نیں، تسیں لوک ایہہ جان لوئو کہ سیاسی طور اُتے تسیں لاوارث ہو چکے او، تہاڈے حقوق سلب کیتے جا رہے نیں کسے شعبے تے طبقے وچ تہانوں خامی نظر نہیں آندی۔تہانوں لوکاں نوں اک دوجے دے ساہمنے کھڑا کر کے لڑوایا جا رہیا اے۔ تہاڈی سوچ تے خواہشاں نوں تہاڈی خوشیاں تے کامیابیاں نوں پابند سلاسل کیتا جا چکیا اے۔ تسیں اپنے منہ وچ گھونگنیاں پائے بیٹھے او، مختلف ادارے، قانون، ہسپتال، تعلیمی ادارے ، بسنز، زراعت، معدنیات، گیس، بجلی ایہناں وچوں بوہت سارے برباد ہو چکے نیں تے باقی تباہی دے دہانے اُتے نیں کس دی وجہ نال؟ تہاڈی وجہ نال! ایس ملک دی عوام تسیں او تے میں واں اسیں سب مجر م آں اسیں کیوں انج دی آزادی اُتے خوش آں کہ پنجرہ وی کھول دتا تے پر وی کٹ دتے، اسیں ابوالکلام آزاد دے کہن دے مطابق آزادی دے بعد وی آزاد غلاماں جہے آں ، ایہہ کیہ انصاف اے کہ مہنگائی ہوندی اے، امیراں تے حکمراناں نوں فرق ای نہیں پیندا، غریب روٹی توں جاندا اے۔ٹیکس دی کٹوتی وچ لکھاں دی تنخواہ لین والیاں لئی تے انج اے جویں کن وچ مچھر بھنبھنایا تے اوہناں نے ہتھ نال جھٹک دتا، استحصال تے عوام دا ہو رہیا اے جیہڑے نہ سبزی خریدن دی طاقت رکھدے نیں نہ دالاں، ایہناں دی اوہ ای روز دی ست اٹھ سو دی بیگار اُتے ٹیکس کٹن والے کنہے بے ضمیر نیں۔ کیہ ریاست مدینہ وچ صرف حجاب ای سب کجھ سی؟ اوتھے تے خلیفہ وقت سوکھی روٹی پانی وچ ڈبو کے کھایا کردے سن تے ایہناں دی عوام وچ لنگر ونڈیا جاندا سی۔
ساتھیو! ایہہ وی جان لوئو کہ ہر ظلم دے ذمہ دار حکمران نہیں ہوندے، اداریاں وچ جیہڑے تہانوں لُٹ دے نیں اوہ وی ایس ملک وچ وسن والے تہاڈے جہے لوک نیں تسیں کیوں لٹے جاندے او ایہناں دے ہتھوں؟ کیوں مہنگائی دے ویلے تسیں مہنگی شیواں خریدن نکل جاندے او؟ ہتھ نال ہتھ کیوں نہیں ملا لیندے اک رائے اُتے کیوں متفق نہیں ہو جاندے۔ جدوں فیساں ودھیاں تے ایکا کر کے تسیں دسو کس کمیونٹی نے اک ای سکول توں اپنے بچے اٹھا لئے، جدوں ظلم ودھیا زینب، کائنات تے اسما جہی معصوم بچیاں دے نال ظلم تے ایس دے بعد وی ہوندا رہیا پر جدوں اسیں سب اکٹھے ہوئے تے حکومت کس طرح حرکت وچ آئی تے نہ پھڑے جان والے مجرم وی کس طرح تختہ دار اُتے لٹکائے گئے، جدوں سانحہ پشاور ہویا تے کس طرح سب اک پلیٹ فارم اُتے آ گئے سن۔ پر ایہہ سوچن دی گل اے کہ کیہ سانوں اک ہون لئی سانحیاں دی لوڑ اے۔ کیہ اسیں منیر نیازی دے ایس وطن نوں برباد کر کے چھڈاں گے؟ کیہ فیض دے دل دے چھالے پھوڑن نوں اسیں اپنے ہتھیار تیز کرن لئی بے حسی، بے ضمیری دی مشین وچ نہیں پا سکے؟ تسیں کیوں سوچ دے او کہ سیاستدان نے ایہہ کیہ حکمران دھوکے باز نیں کرپٹ نیں؟ تسیں ایہہ دسو کہ تسیں کدی اپنے آلے دوالے دے علاوے وچ ٹُٹی سڑک نوں محلے توں پیسے اکٹھے کر کے ٹھیک کرن دی کوشش کیتی ، کیہ اپنے علاقے دے موچی یا سائیکل دے پنکچر لان والے گھرانیاں دے گھر وچ اپنی چنگیر توں روٹی تے سالن بھجوایا ، ایہناں کماں لئی تے کوئی تہانوں نہیں روکدا، ارے تسیں تے طاقت او تے تسیں تے ایس وطن دی امید او۔ سیاستدان کنہے ہون گے کجھ پر تسیں کروڑاں او۔ ہن دسو کہ طاقت، ہمت، عقل، ایمان، محنت، کس دی زیادہ اے۔ نہ کرو تسیں اپنے وطن لئی کم، اپنے اپنے علاقے وچ ای خوشحالی لے آئو، سب دے گھراں وچ اک جہیا کھانا بنے اک سکول وچ جان، زندہ کر دین فیر اوہ ای چوپال، اوہ ای مشاورت دے طور طریقے، نہ بنو کھڈونا حکومت دے کسے امیر دا کسے بے ضمیر دا، پرائیویٹ سکولاں دی تعلیم لئی اپنی روایات تے اپنی اسلامی تہذیب نوں داء اُتے مت لائو۔ اوہ تے غلام تیار کر رہے نیں، اوہ غلام جنہاں نوں احساس نہیں ہوئے گا کہ ایہناں دی امارت ایہناں دا سوٹ ایہناں دی تعلیم ایہناں دا ہنر سب گروی اے۔ المیہ تے ایہہ وی اے کہ اسیں بھُل جانے آں حادثے تے نویں دن دی روشنی پھیلان والے سورج نوں سلامی دین وچ لگ جاندے نیں۔ اسیں سقوط ڈھاکہ بھُل گئے نیں ایس دا صرف یاد گیری دا اک دن رہ گیا۔ 16دسمبر۔ ہائے افسوس اک دن کشمیر نوں وی بھُل جان گے۔