حکومت دا سرکاری اثاثے گروی رکھ کے قرض لین دا فیصلہ
لہور( پنجابی میڈیا گروپ)وفاقی حکومت نے سرکاری اثاثے گروی رکھ کے بانڈز جاری کرن تے قرض لین دا فیصلہ کر لیا۔ذرائع دے مطابق سکوک بانڈز دے اجرا دے ذریعے وڈے پیمانے اُتے قرض لین لئی سرکاری اثاثیاں نوں گروی رکھن دی سمری بالآخر وفاقی کابینہ نے منظور کرلئی۔سمری دے مطابق سکوک بانڈز جاری ہون گے،قرض لیا جائے گا تے اوس دے عوض اسلام آباد، لہور تے ملتان ائیرپورٹ،ایم تھری تے اسلام آباد چکوال موٹر وے نوں گروی رکھیا جائے گا۔ذرائع دے مطابق سرکاری اثاثے گروی رکھ کے ہور ذرائع دے مقابلے وچ گھٹ شرح سود اُتے قرض حاصل کیتا جا سکے گا۔ایس توں پہلاں وفاقی کابینہ نے26جنوری نوں ایف نائن پارک گروی رکھن دا پلان مسترد کردئیاں ہوئیاں244ایکڑ اُتے مشتمل اسلام آباد کلب نوں گروی رکھن دا پلان تیار کرن دی ہدایت کیتی سی۔ذرائع دے مطابق افسر شاہی نے اسلام آباد کلب دی بجائے ائیرپورٹس،موٹرویز تے اسلام آباد ایکسپریس وے نوں لسٹ وچ شامل کر دتا اے۔





















