کیہ ایرانی نومنتخب صدر ابراہیم رئیس کامیاب صدر ہون گے؟
سید صفدر رضا
حال ای وچ ساڈے اسلامی برادر ملک وچ صدارتی انتخابات ہوئے نیں جس وچ محترم سید ابراہیم رئیس الساداتی نے میدان ماریا ، آپ دا تعلق مشہد مقدس امام رضا علیہ السلام دے شہر توں اے آپ نجیب الظرفین سادات توں یعنی والدہ تے والد دا تعلق حسینی سادات توں اے۔ آپ دی پیدائش 14 دسمبر 1960 وچ نوگن ضلع مشہد مقدس وچ فارسی عالم دین دے ہوئی تے پیدائش دے 5 سال بعد ای آپ دے والد سید حاجی آپ نوں یتیمی دا داغ مفارقت دے گئے۔ایس دے باوجود یتیمی دے احساس ایہناں نوں باپ دی کمی دے باوجود آپ تعلیمی میدان وچ اگے ای ودھدے رہے تے نامساعد حالات دے باوجود آپ نے 15 سال دی عمر وچ قم وچ تعلیم دا سلسلہ شروع کیتا فیر اپت اللہ سید محمد موسوی نژاد دے اسکول گئے بعد وچ 1976 وچ آیت اللہ بروجردی سکول وچ اپنی تعلیم جاری رکھی۔حسین نوری ہمدانی مرتضیٰ مطھیری سید حسین بروجردی ابوالقاسم خازانی جہے استاداں دی سرپرستی رہی۔ 1979 وچ امام خمینی رحمتہ انقلاب ایران لیاندے نیں آپ ایس دور وچ اپنے تعلیمی دارج خوش اسلوبی نال طے فرماندے رہے۔ فیر آپ 1980 تا 1990 وچ تہران دے ڈپٹی پراسیکیوٹر تے پراسیکیوٹر دی حیثیت نال فرائض منصبی خوش اسلوبی نال نبھاندے رہے۔ 1981 وچ ہمدان دے پراسیکیوٹر وی رہے۔ آپ اسلامی انقلاب فورسز دے امیدوار دی حیثیت نال صدر منتخب ہوئے پر حسن روحانی توں شکست کھا گئے آپ نے دینی تعلیم وچ اجتہاد دی سند دے نال نال یونیورسٹی وچ انٹرنیشنل لاء وچ ایم فل دے بعد فقہ تے حقوق وچ ڈاکٹریٹ دی ڈگری حاصل کیتی۔ آپ ایرانی سپریم لیڈر نوں منتخب کرن والی مجلس دے نائب رئیس رہے۔ نمائندہ ولی فقیہ و امام جمعہ مشہد آیت اللہ علم الھدی دی دختر نیک اختر آپ دی زوجہ محترمہ جمیلہ علم الھدی نامور فلسفی تے مجتہدہ PHD تے اول درجہ دی سکالرز نیں جدوں آپ ایران دے چیف جسٹس بنے تے آپ نے اپنے کل اثاثہ جات نوں ظاہر کیتا۔زوجہ صاحبہ دی مقامی ساخت دی گڈی۔ 140 میٹر دا مکان تے آپ دی اک دختر جامعہ تہران وچ PHD دی ڈگری کر رکھی اے جیہڑی ایس ویلے طالبہ سن جد کہ آپ دی دوجی صاحب زادی علوم قرآن و حدیث وچ تعلیم پاندی رہیاں نیں۔ آپ نے بچپن انتہائی نامساعد حالات وچ لنگھایا پر آپ دی شناخت ماہر قانون دی اے آپ نے بڑی سرعت نال مقدمے نمٹائے تے آپ دے فیصلیاں نے ایہہ ثابت کیتا کہ آپ مظلوم دے ہمدرد تے ظالمین لئی ننگی تلوار ثابت ہوئے آپ نے بوہت ساری قانونی اصلاحات متعارف کروائی عدالتی سسٹم توں کالی بھیڑاں نوں کڈیا آپ سخت گیر جج رہے آپ نوں خریدیا نہیں جا سکیا۔ ہن جد کہ آپ ایران دے صدر منتخب ہو چکے نیں امریکہ ایہناں نوں کس انداز وچ لیندا اے تے ہن ایرانی ایٹمی پروگرام دے بارے کیہ اقدامات چکے جاندے نیں ہن دی 61 سالہ حیاتی جنہاں دی ابتدائی زندگی انقلاب ایران دے بعد امام خمینی ؒ دے ویلے توں موجودہ اسلامی ایران سب آپ دے اگے وے تے آپ انتہائی مدبر تے آیت اللہ خامنہائی دے تربیت یافتہ کس انداز وچ ایران نوں اگے لے کے چلدے نیں تے آپ دی زیر نگرانی ایران کس نہج اُتے اگے ودھدا اے ایہہ تے آن والا ویلا ای ثابت کرے گا۔ آپ نوں منتخب کرن والے آپ توں بوہت امیداں لائے بیٹھے نیں کہ اک منفرد ایران تے ایس دی دیگر پالیسیاں حسن روحانی دے اقدامات نال کنج مختلف ہون گیاں۔ گوانڈھی ملک خاص طور تے پاکستان نال سفارت تعلقات کیہڑے پاسے جاندے نیں عرب ملکاں نال کنج سفارتی تعلقات استوار ہوندے نیں ایہہ ایہناں دی حکومت قائم ہون تیکر انتظار کرنا پئے گا امریکہ نوں وی ایران دے بارے وچ نظر ثانی کرنی پئے گی۔ ایدھے افغانستان دے بدلدلے سیاسی حالات کیہڑے پاسے جاندے نیں ایہہ یقین کیتا جا سکدا اے کہ ایرانی حکومت پہلے توں مختلف تے اٹل فیصلیاں اُتے قائم ہوئے گی جیہڑی شاید خطے وچ سیاسی تے معروضی حالات وچ وی تبدیلی ویکھی جا سکے گی۔ یا علامہ اقبال دے شعر دی ترجمان حکومت ساہمنے آئے۔
