اتفاق رائے

پاکستان ماشاء اللہ اپنی عسکری طاقتاں، قیمتی اثاثیاں تے ‘ایٹمی طاقت دے حوالے نال پوری دنیا وچ مشہور و معروف اے

رابعہ رحمٰن

انسان دی پہچان اپنے وطن نال ہوندی اے۔ وطن دی محبت تے ماں دی محبت وچ کوئی مقابلہ نہیں ہوندا۔ ساڈا ملک، حکومت، عوام، عسکری طاقتاں، قیمتی اثاثے، وسائل، آئین ، صوبے تے ساڈا منشور ایہہ ساڈی زندگی دا اوہ حصہ نیں جنہاں وچوں اسیں کسے اک نوں وی غیر اہم قرار نہیں دے سکدے۔ پر انج ضرور اے کہ ایہہ عناصر انج دے نیں جنہاں لئی تدریجی جدول بنا کے ایہناں دی اہمیت نوں جاننا ضروری اے۔ ساڈا ملک تے ایس دے حصول دا بنیادی نظریہ سب اہم اے جے اسیں ایس نظریے دی اساس اُتے جان تے بوہت ساری شیواں سانوں واضح ہو جان جویں کہ ساڈا آئین اسلامی مملکت ہون دے حوالے واضح اے کہ کیہ ہوئے گا تے کس بنیاد اُتے ہوئے گا جس وچ جلدی مہیا کیتے گئے انصاف دی شرط اولین حیثیت رکھدی اے۔ منشور تے حکومتی نظام وی اہمیت دا حامل اے تے ذرا بھر دا جھول وی بوہت سارے مسائل دا پیش خیمہ بن سکدا اے۔ ایس لئی حکومتی ڈھانچے دے ممبران تے حکمراناں دا آپس وچ ملک چلان دے منشور تے آئین اُتے اتفاق رائے ہونا بوہت ضروری اے۔ ایس لئی پالیسیز بنان والے تے ایس اُتے عملدرآمد کران والے شعبے دے حضرات دا ذاتی دلچسپی تے ایماندارانہ رویہ ای مثبت نتائج دا حامل ہو سکدا اے نہیں تے کدھرے وی وگاڑ دی صورت پیدا ہو سکدی اے۔ ایس اُتے سب توں اہم ساڈی عسکری قوتاں نیں کوئی وی ملک اپنی حکومت نوں اپنی افواج دے بنا مضبوط تے محفوظ نہیں بنا سکدی۔ ساڈی فوجاں ایس لئی الحمداللہ دشمناں لئی اک بوہت وڈا خطرہ اے۔ کیوں جے ساڈی فوج موت توں نہیں ڈردی تے زندگی نال پیار نہیں کردی پر ساڈی فوج تے ایہناں دے سربراہواں دا منشور حکومت نوں مدنظر رکھنا بوہت ضروری اے۔ فوج دا اہم ترین کم سرحداں دی حفاظت، اندرونی انتشار دے سبب خانہ جنگی وچ سرگرم ہونا تے انتہائی ناگہانی آفات وچ اپنی خدمات انجام دینا اے پر حکومت دا انج دی پالیسی بنانا ضروری اے جس وچ بے وجہ فوج نوں استعمال کر کے ایہناں دی طاقت، سرمایہ تے خدمات نوں ضائع نہ کیتا جائے۔ ساڈی فوج دا ایہہ کردار ہمیشہ توں ای انج دا رہیا اے ایس لئی ایس نوں کسے وی انج دی سرگرمی وچ ملوث کرنا نہیں چاہیدا جس نال ایہناں دی عزت تے وقار ایہناں دے مقصد تے عزم اُتے گزند لگے۔ فضائی سرحداں، میدانی سرحداں تے بحری سرحداں دی حفاظت ساڈے سب دا وی فرض اے پر ایس وچ ساڈا کردار مختلف اے۔ ایس لئی ساڈی عوام دی واری آندی اے کہ اوہ اندرونی انتشار تے خانہ جنگی نال ملک نوں ایس طرح محفوظ رکھے جویں اک ماں اپنے بچے نوں زندگی دے خطرات توں محفوظ رکھدی اے۔ ایس وچ قبیلیاں، جرگیاں، خانداناں، مذہبی جماعتاں دے رفقائے کار تے عوام اُتے اک بھاری ذمہ داری عائد ہوندی اے۔ جے عوام ایہہ کہوے کہ اسیں تے خود مسائل وچ گھرے آں تے بے شک ایہہ دنیا اللہ دی رحمتاں دے نال نال آزمائشاں دی آماجگاہ وی اے تے ایس توں تے کوئی وی زمانہ کوئی وی بندا مبرا نہیں۔ جدوں حکومت، فوج، عوام،آئین تے منشور وچ ہم آہنگی، اتفاق رائے تے باہمی صلہ رحمی دا رویہ پنپن لگے تے بوہت سارے انج دے مسائل نیں جیہڑے کہ وسائل دی کمی دے باوجود وی گرفت وچ آ سکدے نیں تے ایہناں دے نال ایہناں توں درگزر کر کے چنگی زندگی تے چنگی حکومت چلائی جا سکدی اے۔
ہن گل کرنے آں صوبیاں دی تے ہر صوبہ حکومت تے ملک لئی ریڑھ دی ہڈی جہی اہمیت رکھدا اے تے ہر صوبے دی موسم، معدنیات، زراعت تے وسائل و مسائل دی اپنی اک وکھری حیثیت تے کیفیت اے۔ ساڈا ہر صوبہ کسے نہ کسے وجہ نال خود کفیل ہون دی حیثیت وی رکھدا اے تے خود کفیل ہے وی۔ ایہناں صوبیاں دے معدنی، زرعی، آبی ذخائر توں فائدہ چُکنا تے ایہنوں ملک و قوم دی ترقی و ترویج تے عزت و وقار وچ وادھے لئی استعمال کیتا جا سکدا اے۔ ایس لئی سارے لائحہ عمل بنانا، اختیار کرنا تے ایس اُتے عملدرآمد کرنا مدبرین و اکابرین تے حکومتی صوبیاں دے عہدیاں اُتے فائز متعلقہ لوکاں دی ذمہ داری اے۔ ایہہ گل تے اظہر من الشمس اے کہ اندرونی خانہ جنگی و انتشار تے مختلف مسائل ہر ملک وچ جاری و ساری رہندے نیں پر ایہناں نوں منصفانہ طریقے تے دانشمندی دے نال حل کرنا بوہت ضروری اے کیوں جے ایہہ معاملات جدوں میڈیا دے ہتھ لگدے نیں تے عالمی سطح اُتے بحث و مباحثہ وچ شامل ہون لگدے نیں تے ساڈی کمزوریاں تے ناکامیاں بن کے دنیا وچ پھیل جاندے نیں۔ جے اسیں اپنے وطن پاک نوں ہر طرح دے مسائل تے تیر و تفنگ توں محفوظ رکھنا چاہنے آں تے لازمی اے کہ اپنے معاملات اپنی میز اُتے حل کریئے نہ کہ عالمی سطح اُتے لیا کے ایہناں نوں بدنامی دا باعث بنائیے۔ پاکستان ماشاء اللہ اپنی عسکری طاقتاں، قیمتی اثاثیاں تے ایٹمی طاقت دے حوالے نال پوری دنیا وچ مشہور و معروف اے۔ ایسے شے نوں اہم جان دے ہوئے ہن سانوں اپنا وقار تے اپنا مقام آپ بنانا اے۔