بجٹ تے عدم برداشت‘قصوروار کون؟

لكهت:مطلوب وڑائچ

بلوچستان اسمبلی وچ فاضل ارکان نے جس رویے دا اظہار کیتا اوہدے توں لگا کہ جو کجھ قومی اسمبلی وچ بجٹ اجلاس دے دوجے تے تریجے دیہاڑے ہویا اوہ ٹریلر سی تے ایہ اصل فلم اے۔ قومی اسمبلی وچ ارکان نے اک دوجے نوں ننگیاں تے گندیاں گالھاں کڈھیاں۔ بجٹ دستاویزات تے کتاباں اک دوجے تے ماریاں گئیاں۔ سینی ٹائزر بوتلاں چلائیاں گئیاں‘ جہدے نال حکومتی ارکان ملیکہ بخاری تے اکرم چیمہ زخمی ہو گئے۔ سپیکر نے ست ارکان دا قومی اسمبلی وچ داخلہ بند کر دتا۔ تریجے دیہاڑے حکومتی تے اپوزیشن بنچاں وچکار مفاہمت نال ایہ داخلہ کھول دتا گیا تے اسمبلی وچ کاروائی چنگے انداز وچ ہوئی۔ حکومت تے اپوزیشن اک دوجے نوں گران تے نمبر بنان دی کوشش وچ دنیا وچ تماشا بن گئے تہانوں لوک قنون سازی لئی اپنے توں بہتر سمجھ کے منتخب کردے نیں تہاڈے وچوں کجھ پارلیمنٹ دے باہر تنظیم سازی تے پارلیمنٹ دے اندر غنڈہ گردی ورگی آئین سازی کرن گے تے کوئی عزت نہیں کمائو گے۔
بلوچستان اسمبلی دے ارکان تے حداں ای پار کر گئے اپوزیشن نوں انگلی لندن توں لائی گئی یاں کدھروں ہور‘ اوہنوں ایس راہ تے لا دتا گیا ایہ اسمبلی تے بھکھے بگھیاڑاں وانگوں ٹٹ پئے۔ اسمبلی ہال دے باہر تے اندر میدان جنگ بنا دتا گیا وزیراعلیٰ تے جتیاں تے گملے سٹے گئے گیٹ نوں جندرے لا دتے گئے گیٹ نوں کھولن لئی پولیس دی بکتر بند گڈی گیٹ نال ٹکرائی گئی۔ فاضل ارکان پولیس دے وی گلے پے گئے پولیس نوں لاٹھی چارج کرنا پیا۔ اندر اجلاس تے باہر جنگ ہوندی رہی۔ ایس دھینگامشتی وچ خاتون رکن شکیل نوید سنے چار ارکان زخمی ہو گئے کئیاں دے کپڑے پاٹ گئے۔ مینوں یاد آیا کہ مشرقی پاکستان اسمبلی وچ اجلاس دوران تشدد کرکے سپیکر شاہدعلی پٹواری نوں جانوں ای مار دتا گیا سی جیویں ایہناں دیہاڑیاں وی اسمبلی وچ پٹواری موجود سن۔ کھڈاری تے اناڑی وی کسے نہ کسے صورت موجود سن۔ شاہدعلی دی موت دے ذمے واراں نوں حراست وچ لے لیا گیا سی۔ قومی اسمبلی وچ سب کجھ گنوا کے مفاہمت ہو گئی تے اک دوجے دی گل بناں مداخلت تے رولے روپے توں سنن تے اتفاق کیتا گیا۔ اوسے دیہاڑے اجلاس وچ شہبازشریف تے بلاول دی تقریر خاموشی نال سنی حکومتی ارکان بولے تے شہبازشریف تے بلاول ایوان چوں باہر ٹر گئے۔ مفاہمت‘ اگے اگے دیکھو کیہ ہوندا اے۔
دوستو! موجودہ حکومت دو نعریاں دے سر تے اقتدار وچ آئی سی اک احتساب تے دوجا تبدیلی۔ بائی ورھے دے صبرآزما انتظار مگروں جدوں 2018ء وچ پی ٹی آئی دی حکومت بنی تے سانوں ایس حکومت توں ایہ آس نہیں سی کہ ایتھے ددھ تے شہد دیاں نہراں چلن گئیاں‘ شیر تے بکری اک گھاٹ تے پانی پین گے پر عمران خان صاحب دی ہمت ویکھ کے ایہ اندازا ضرور لایا سی کہ اوہ گھٹو گھٹ احتساب دا نعرہ پورا کرن گے پر ماڑی قسمتی کہ پچھلے تن ورھیاں وچ کسے اک محاذ تے وی حکمران اپنی گرفت وکھان وچ نکام رہے۔ اج حالت ایہہ وے کہ احتساب دے سارے ملزمان ماسوائے مسلم لیگ ن دے خواجہ آصف تے پیپلزپارٹی دے خورشید شاہ دے باقی سارے ملزمان ضمانتاں دے فائدیاں توں لطف اندوز ہو رہے نیں۔ دنیا دی تریخ وچ انج دے معجزے کدھرے وی ویکھن نوں نہیں ملے کہ پیپلزپارٹی دی مرکزی قیادت تے اومنی گروپ دی لٹ مار دی وجہ نال ریڑھی بان تے فالودہ فروشاں دے اکائونٹ وچ ارباں روپیے برآمد ہوئے پر کسے دے کن تے جوں نہیں رینگی۔
دوستو! دوجے پاسے میاں شریف خاندان دا کڑا احتساب دے ناں توں مواخذہ شروع ہویا۔ کجھ کیساں وچ کجھ لوکاں نوں نام نہاد سزاواں وی ہوئیاں پر فیر اوہناں لوکاں نوں صرف پنجاہ روپیے دے اشٹام پیپر تے گارنٹی لکھ کے ملک چوں باہر علاج لئی گھل دتا جاندا اے تے اج عمران خان تے اوہناں دی پوری ٹیم ایہ فرماندے نیں کہ سانوں غلط انفارمیشن تے میڈیکل رپورٹاں دے کے میاں صاحب نوں لندن گھلیا گیا۔ میرا تے بائی کروڑ لوکاں دا وزیراعظم تے اوہناں دی ٹیم اگے اک مودبانہ سوال اے کہ کیہ تہانوں ایس گل دا پتہ نہیں سی کہ اک ملزم جہنوں عدالت توں سزا ہو چکی اے اوہنوں علاج لئی ملک چوں باہر گھلنا بذات خود اک جرم سی؟ کیہ دنیا دی تریخ وچ کدی کسے سزایافتہ مجرم نوں علاج دی غرض نال کسے دوجے ملک گھلن دی روایت موجود اے؟ جے ایہدا جواب نہیں وچ اے تے فیر وی ایس جرم وچ برابر دے شریک او۔ بائی کروڑ لوکاں دا رکھوالا وزیراعظم جدوں ایہ قنون توڑے گا تے اوہنوں سخت سزا دا مستحق رہنا چاہیدا اے۔٭٭