سمندر پار پاکستانیاں دی محبت

لكهت:مظہر برلاس

ایران دے حالیہ صدارتی انتخاب دے موقعے تے مینوں اوورسیز پاکستانی بار بار یاد آئوندے رہے۔ یاد آن دی وڈی وجہ ووٹ دا حق اے۔ دنیا دے 133 ملکاں وچ ایرانیاں نے ووٹ دا حق استعمال کیتا۔ پاکستان دے چار پنج شہراں وچ ایرانیاںنے صدارتی انتخاب وچ ووٹ پایا۔ اسلام آباد‘ لہور‘ کراچی‘ کوئٹہ تے ملتان وچ پولنگ بوتھ بنائے گئے سن۔ ایسے دوران ٹوکیو توں عرفان صدیقی نے اپنے کالم راہیں وزیراعظم پاکستان دا شکریہ ادا کیتا۔ اوہناں دے نیڑے اک کروڑ اوورسیز پاکستانی عمران خان دے شکرگزار نیں کہ 74 ورھیاں وچ پہلی واری اوہناں نوں ووٹ دا حق ملن جا رہیا اے۔
بدیس رہندے پاکستانیاں نوں ووٹ دا حق دین لئی جدوں قنونی ترمیماں سامنے آئیاں تے اپوزیشن ننگی ہو گئی خاص طور تے اوہ جماعت جہدے لیڈر اوہناں نوں ہمیشہ بیرونی دنیا نے پناہ دتی۔ مسلم لیگ ن دے اک رہنما تے باقاعدہ پریس کانفرنس تے اتر آئے۔ اپنی فلسفیانہ گلاں راہیں ثابت کرن دی کوشش کردے رہے کہ اوورسیز پاکستانیاں نوں پاکستان بارے کجھ پتہ نہیں‘ اوہناں نوں پاکستان دے مسئلیاں دا پتہ نہیں ایس سلسلے وچ مینوں ذاتی تجربے دیاں دو چار مثالاں دینیاں پے رہیاں نیں‘ کجھ مشاہدے بیان کرنے پے رہے نیں۔ میرے تجربے وچ تے ہمیشہ ایہو آیا کہ بدیس رہن والے پاکستانیاں نوں پاکستان نال بڑی محبت اے۔ وطن توں دور رہ کے اوہناں دی محبت زیادہ جاگدی وی اے‘ بولدی وی اے۔ یاں تسیں انج سمجھ لوو کہ ہجر دا موسم جذبات دی شدت وچ عروج لے آئوندا اے اوہ پاکستان ڈے نوں بڑی محبت نال مناندے نیں۔ صرف نیویارک شہر وچ اٹھ توں دس تقریباں 14اگست دے حوالے نال منعقد ہوندیاں نیں۔ ایسے طرح ڈیلس‘ کیلی فورنیا‘ ورجینیا‘ میری لینڈ سنے کئی امریکی ریاستاں وچ پاکستان دا آزادی دیہاڑ منایا جاندا اے۔ کئی پاکستانی امریکی سیاست وچ وی بڑے سرگرم نظر آئوندے نیں۔ قمربشیر، ڈاکٹر سید امتیاز، شاہد رضا رانجھا، امتل رحمان، عابد بٹ، محسن ظہیر، منظور حسین، غزالہ حبیب، ریحانہ قمر، یونس اعجاز، عابد ملک، مبشر وڑائچ ،مبینہ جنجوعہ، ڈاکٹر نوید کلیر، نازیہ خان، عرفان میر، راجہ رزاق تے مہر ظہیر سرگرم نیں ۔ واشنگٹن ولوں رانا سعادت‘ جانی بشیر، رضوان سیان، آمنہ انعم تے عارفہ خالد سرگرم نیں۔ عابد سعید تے خواجہ اکبر وی سرگرم نظر آئوندے نیں۔ صحافیاں وچ انوراقبال، اسد حسن، مونا کاظم،جمال خان، خرم شہزاد، نوزیرہ اعظم، یوسف چودھری، سید اصغر امام تے سجاد بلوچ بڑے سرگرم وکھائی دیندے نیں۔ نیویارک وچ زاہد چودھری ہر ویلے پاکستانی سیاست تے سوچدے نیں۔ نگہت خان دا وی ایہو عالم اے ایسے طرح طیبہ ضیا چیمہ پاکستان دے حوالے نال فکرمند نظر آئوندیاں نیں۔ میری لینڈ تے واشنگٹن ڈی سی وچ ساجدتارڑ واہوا سرگرم نیں۔ ساجدتارڑ اک پاسے امریکی سیاست وچ متحرک نظر آئوندے نیں تے دوجے پاسے پاکستانی کمیونٹی دے بندیاں دی وی ہر تھاں مدد کردے نیں۔ اوہناں دا اک شعبہ منڈی بہائوالدین وی اے جتھوں دے لوک اج وی اوہناں نوں آپاں جی دا پتر کہہ کے پکاردے نیں۔ ساجدتارڑ نے پاکستانیاں لئی بوہے کھول رکھے نیں۔
امریکہ توں علاوہ مشرق وسطیٰ وچ پاکستانیاں دی اک وڈی گنتی موجود اے۔ ایہدیاں تفصیلاں میاں منیرہانس دے کول سب توں ودھ نیں۔ یورپ وچ وی میاں طارق جاوید، مخدوم احسان تے چوہدری شاہنواز متحرک نیں۔ فرانس وچ یونس خان تے سپین وچ شفقت علی رضا تے عابدعلی عابد سرگرم نیں۔ برطانیہ وچ کجھ لوک پاکستانی کمیونٹی لئی بڑے کم کردے نیں تے کجھ برطانوی سیاست وچ بڑے سرگرم نیں۔ اوہناں بارے خبراں طاہر چوہدری، وجاہت علی خان، آصف سلیم مٹھا، افضل چودھری آف نڈالہ تے اپنے طاہر نورانی راہیں ملدیاں رہندیاں نیں۔ آسٹریلیا وچ ڈاکٹر ثمینہ یاسمین، نوشی گیلانی تے محبوب بٹ نے اک جہان آباد کر رکھیا اے۔ کینیڈا وچ وی پاکستانیاں دی وڈی گنتی اے۔ ڈاکٹر مرتضیٰ اقبال تے سیف اللہ طور، چودھری جاوید، غوثیہ شبیر، اپنے سلیم پاشا تے عاصمہ باجوہ سرگرم نیں۔ جاپان وچ رانا عابدحسین، ملک نورحسین تے عرفان صدیقی نے رونق لائی ہوئی اے۔ سنگاپور وچ اکلا آصف خان ای کافی اے۔ افریقی ملکاں وچ وی پاکستانی بھرواں کردار ادا کر رہے نیں اوتھے کردار نوں ہور ودھان دی لوڑ اے۔
دوستو! پاکستانی لوک تقریباً ہر تھاں ای آباد نیں ایہ لوک پاکستان نال بڑی محبت رکھدے نیں پاکستان لئی فکرمند رہندے نیں۔ پاکستان دا دکھ درد صرف محسوس ای نہیں کردے اوہدا مداوا کرن دی کوشش وی کردے نیں۔ ایہ وطن توں دور رہ کے وطن لئی محبت دے گیت گاندے نیں پاکستان دے موجودہ وزیراعظم عمران خان نے اوہناں لئی دو کم بڑے اہم کیتے نیں پہلا ایہ کہ سارے سفارتخانیاں نوں ہدایت کیتی اے کہ اوہ پاکستانی کمیونٹی دی خدمت کرن اوہناں دی توہین نہ کرن سگوں اوہناں لئی کم کرن دنیا دے جہڑے ملکاں وچ پاکستانی قیدی موجود نیں اوہناں دی مدد کیتی جاوے۔ دوجا اہم کم ایہ کیتا اے کہ اوہناں نوں ووٹ دا حق دے دتا اے۔ وزیراعظم اگے تریجے کم دی گزارش ایہہ وے کہ اوہ اوورسیز پاکستانیاں لئی پاکستان دی اسمبلیاں وچ نمائندگی دا اعلان کرن ایہدے لئی قنون سازی کرن تاں جے اوورسیز پاکستانی بھرویں طریقے نال وطن دی خدمت کر سکن۔ کالم دا ختتام وی سمندر پار پاکستانی شاعرہ ریحانہ قمر دے شعر تے ہو جاوے کہ:
میں جانتی ہوں کہ آنا نہیں کسی نے قمر
مگر منڈیر پہ شمعیں جلا کے رکھتی ہوں