’’خواتین دے لباس متعلق انٹرویو اُتے تنقید کیوں؟‘‘
ویکھیا جائے لفظ ’’پردہ‘‘ دی بحث اینے زاویاں اُتے محیط اے کہ دریچیاں دے دریچے کھل جان
تابندہ خالد
امریکی ٹی وی چینل ایچ بی او اُتے ایکزیوس نامی پروگرام لئی جوناتھن سو ان نے اسلامی جمہوریہ پاکستان دے وزیراعظم دا انٹرویو کیتا۔ ایس اہم انٹرویو وچ وزیراعظم ولوں دو ٹوک لفظاں وچ پاکستان دے موقف دا اظہار کیتا گیا۔ ہن فضائی اڈے دین نہ دین دیاں گلاں پاکستانی سوشل میڈیا توں بین الاقوامی سوشل میڈیا اُتے گردش کر رہیاں سن کہ ایسے اثناء وچ امریکہ نے افواہواں دی حقیقت نیز اشارۃ کنایۃ پاکستان دا ارادہ معلوم کرن دی عرض توں شاطر صحاجی جوناتھن نوں گھلیا۔ جوناتھن خاص منصوبہ دے تحت دو طریفیاں نال انٹرویو دی تیاری کر کے آیا سی کہ if تے But دی صورت وچ امدادی پیکیج تے ترقیاتی منصوبیاں اُتے تبصرہ ہوئے گا پر Absolutely Not دے الفاظ سن کے دم بخورہ گیا۔ ایس نے دوبارہ پچھیا Seriously؟۔ فیر کمال عیاری نال نازک سماجی مسئلے اُتے گل بات کیتی تاکہ پاکستانی معاشرے اُتے ایس دے اثرات دور تیکر جان۔
قارئین، کیہ تسیں جان دے او کہ خواتین دے لباس متعلق ایہہ انٹرویو تنقید دی زد وچ کیوں اے؟ پہلے تے سب توں وڈی وجہ ایہہ وے کہ ساڈی قوم نوں اک مرض لاحق ہو چکیا اے تے اوہ اے نظریاتی طور اُتے اک دوجے دی پگڑیاں اچھالنا۔ کسے دے ماضی نوں کریددے ہوئے طنز اُتے مبنی جملے و فقرے کسنا ’’نو سو چوہے کھا کر بلی حج کو چلی‘‘ یعنی دور حاضر وچ تائب ہوندے ہوئے ہدایت اُتے عمل پیرا ہونا تے ایس اُتے حق گل دی تائید کرنا وی گویا شجر ممنوعہ اے۔
ویکھیا جائے لفظ ’’پردہ‘‘ دی بحث اینے زاویاں اُتے محیط اے کہ دریچیاں دے دریچے کھل جان۔ پر اللہ رب العزت نے سورۃ الاحزاب آیت 59 وچ اینٹی ہراسمنٹ اصول واضح کر دتا کہ’’ خواتین اپنے اوپر چادر لٹکائیں تاکہ وہ ستائی نہ جائیں‘‘۔ ہن جدوں وزیراعظم نے ایس اصول نوں جوناتھن دے ساہمنے بیان کیتا تے اینا واویلا کیوں؟ سنن ابن ماجہ دی حدیث 2861 دی رو نال نک کٹا حبشی وی جے (امیر) حاکم بن جائے تے ایس دی اطاعت دا کہیا گیا ، کیہ اسیں باہمی چپقلش وچ بنی اسرائیل دی قوم توں وی دو ہتھ اگے نہیں نکل گئے؟ ایہہ تے فطری امر اے کہ نیم برہنہ لباس مردیاں دے ہیجان نوں برانگیختہ کردا اے۔ 8مئی 2018 نوں بی بی سی دے نامہ نگار کینیڈی گونڈوے دا کہنا سی کہ یونیورسٹی آف زیمبیا ولوں لائبریری وچ نوٹس چسپاں کیتا گیا جس وچ معتدل لباس پان دا کہیا گیا ایس توں مرد طالبعلماں دا دھیان ہٹ دا اے ایہہ تے ایہناں دے معاشرے دی گل رہی پر اسیں جس معاشرے وچ رہنے آں اوتھے دا موازنہ اسیں مغربی تہذیب دے نال نہیں کر سکدے۔ اوتھے لوک مذہب دی حدود تے قیود توں مبرا ہوندے نیں ایسے باعث جنسی جرائم دی شرح وی مغربی ملکاں وچ زیادہ اے۔ ہن ذہن وچ سوال ایہہ پیدا ہوندا اے کیہ ریپ دے ودھدے گراف دے پچھے خواتین دا لباس ای وجہ اے؟ ایہناں خواتین دے بارے وچ کیہ رائے رکھنی چاہیدی اے جنہاں دی عصمت دری ایہناں دے باپردہ ہون دے باوجود کیتی گئی۔ ایہناں معصو م بچیاں دا کیہ قصور جیہڑی بلوغت توں پہلاں ای درندگی دی بھینٹ چڑھ گئیاں۔
ایس بابت کوئی دورائے ای نہیں کہ اخلاقیات دا فقدان ایس دی بنیادی وجہ اے۔ ساڈے کول عبایا تیکر وچ خواتین نوں گوریا جاندا اے جویں ایہناں نے منی سکرٹ پا رکھی ہوئے۔ حالانکہ مرداں نوں اللہ کریم نے سورۃ نور آیت 30 وچ حکم صادر فرمایا کہ نگاہواں نیچی رکھو۔ خواتین دا لباس انج دا ہونا چاہیدا اے جیہڑا باعث افتخار ہوئے جیہڑا ایس دی زینت دے نال نال ایس دی ڈھال ثابت ہوئے۔ اللہ تعالیٰ نے عورت دے دماغ اک مخصوص حس رکھی اے جس نال ایہنوں مرد دی نگاہ و دل دی کیفیات دا فوراً ادراک ہو جاندا اے تاں اپنے آپ نوں مضبوط بنائو تاکہ معاشرہ خواتین دی ترقی متعلق جمود دا شکار نہ ہوئے۔ انج ہر گز نہیں کہ مرد ای قصوروار نیں۔ ایہہ اک فطری کشش اے جیہڑی اللہ عظیم نے دونواں وچ رکھی اے۔ معاشرے دے تسلسل نوں برقرار رکھن لئی مرد و زن دونواں نوں حیا دے تقاضیاں دے نال اپنی حدود دی نگرانی و ذمہ داریاں نوں کماحقہ ادا کرنا ہوئے گا۔ تے معصوم بچیاں دے نال زیادتی کرن والے ذہنی مریض ہوندے نیں ہوس پرستاں نوں سرعام سخت توں سخت سزا دتی جائے سمجھ نہیں آندا کہ سوسائٹی سزائواں دے حوالے نال کیوں بٹ جاندی اے۔حکومت دی اولین ترجیح ایہہ ہونی چاہیدی اے کہ معاشرے نوں فحش لٹریچر تے مواد توں پاک کیتا جائے ایس ضمن وچ قانون تشکیل دتے جان ڈرامہ تے فلم انڈسٹری نال گزارش اے کہ مثبت کرداراں دے ذریعے عوام الناس وچ شعور و آگاہی ودھان۔
