بھارت مقبوضہ کشمیر وچ بالاں دے خلاف پیلٹ گن دااستعمال فوری روکے:اقوام متحدہ
نیویارک( پنجابی میڈیا گروپ)اقوام متحدہ دے سیکرٹری جنرل نے بھارت اُتے زور دتااے کہ اوہ مقبوضہ کشمیر وچ بالاں اُتے پیلٹ گن دا استعمال کرنا فوری طور اُتے بند کرے۔معصوم جاناں نال اینج دا رویہ دوبارہ اختیار کرن دی کوشش نہ کیتی جائے۔میڈیا رپورٹس دے مطابق ایہ اہم بیان اقوام متحدہ دے سکریٹری جنرل انٹونیو گٹریش ولوںدیا گیا اے۔اوہناں نے سلامتی کونسل وچ اک بحث دے دوران بیان دیندیاں ہوئیاں آکھیا کہ بھارت ولوں بالاں دے حقوق نظر انداز کرنا دل ہلا دین والا عمل اے۔انتونیو گوتریس نے آکھیا کہ مقبوضہ کشمیر دی صورتحال ایس قدر خراب اے کہ اوتھے سکولاں نوں فوجی مقصد لئی استعمال کیتا جاندا اے۔اوہناں نے سلامتی کونسل دے اک اہم اجلاس وچ ہون والی کھلی بحث وچ اپنی تازہ ترین رپورٹ وی پیش کیتی۔ ایس رپورٹ وچ آکھیا گیا کہ کانگو،شام تے افغانستان ورگے جنگ زدہ ملکاں وچ تقریبا20ہزار بالاں نال سنگین خلاف ورزیاں کیتیاں گئیاں نیں۔





















