چُنی کیسری تے گوٹے دیاں دھاریاں

ایثار رانا

اللہ کپتان نوں نظربند توں بچائے ہولی ہولی اوہ وزیراعظم توں اک لیڈر دے طور تے سامنے آ رہے نیں۔ اک بہادر‘ غیور لیڈر دے طور تے امریکہ نوں جو اوہ کہہ رہے نیں کاش پہلے کسے وزیراعظم نے ایس طرح دی جرأت مندانہ گل کیتی ہوندی ماضی نوں پھولو تے اوہدے وچوں بزدل لیرولیر قیادت ای سامنے آئوندی اے۔ شکر اے کجھ وزرائے اعظم انڈرویئر ریگولر پاندے سن نہیں تے امریکی ایئرپورٹ تے کوئی چنگی ویڈیو سامنے نہ آئوندی۔ اللہ کپتان دی حفاظت فرمائے۔ مینوں تے ذوالفقارعلی بھٹو یاد آ رہے نیں جدوں امریکہ نے اپنے جھولی چُک ڈڈو چارجراں نوں میدان وچ اتاریا تے بھٹو صاحب اکلے رہ گئے تے پھاہے لگ گئے۔ قوم لیڈراں توں بہادری منگدی اے تے اپنی واری تے تھوڑی سی جو پی لی ہے کہہ کے انٹاغضیل ہو جاندی اے۔ عمران خان ٹھیک کہندے نیں کاٹھے انگریزاں دی نقالی کرن نال سافٹ امیج نہیں بن دا۔ بلھے شا ہ‘ وارث شاہ‘ میاں محمد بخش توں ودھ سافٹ امیج کون سامنے لیا سکیا۔ انگریز برصغیر وچ جدوں اوہناں ورگی پینٹ تے ہیٹ پان والیاں نوں بابون صاحب کہندے تے کاٹھے انگریز تے فخر نال اپنی گیلس دی لاسٹک پٹاخ پٹاخ اپنے ڈڈھ تے ماردے۔ بعد وچ پتہ لگا بابون اوس باندر نوں کہندے نیں جو نقالی وچ ماسٹر ہوندا اے۔ افسوس ماضی دے حکمران اقتدار وچ آ کے سافٹ امیج دے چکر وچ ننگے ہو کے نچدے۔ سر تے بوتلاں رکھ کے ڈانس کرکے اپنی ٹھرک پوری کردے رہے۔ بھلا دوجے دی برابری دے چکر وچ اپنا منہ چنڈاں نال لال کرنا کتھوں دا سافٹ امیج اے۔ سنتاسنگھ گوشت لین قصائی کول گیا قصائی نے اپنا سافٹ امیج بناندے ہوئے کہیا کہ بھائی جان گوشت لین آئے نیں‘ سنتا سنگھ بولیا نہیں میں تہاڈے کول بکرے دی موت تے تعزیت کرن آیا واں۔ بھائی میرے سدھی سدھی گل کرو امریکہ نوں اڈے دیاں گے نہ کرائے دے ٹٹو بناں گے۔ بڑی ہو گئی ہر واری کھادا پیتا کجھ نہیں تے گلاس توڑا بارہ آنے نہیں ہووے گا۔ اسیں بڑی چٹی برداشت کر لئی‘ وٹی دے بعد ہن کٹی دا ویلا اے۔ ہن ساڈا قوماں دیاں اکھاں وچ اکھاں پانا ای سافٹ امیج ہووے گا۔ اسیں دنیا دے کانے نہیں۔ فواد چوہدری جس طرح حکومتی میڈیا وچ اصل سافٹ امیج تے کم کر رہے نیں پینڈا تھوڑا اوکھا ضرور اے پر ارادہ پکا ہووے تے بندہ منزل ول ودھدا جاندا اے تے منزل پھڑک کے سامنے آ جاندی اے۔ فواد چوہدری وزارت سائنس وچ گئے تے اوتھے اوہناں نے جنگل وچ منگل کر دتا۔ اج اسیں وینٹی لیٹر اپنا بنا رہے آں۔ ویکسین اپنی بن گئی‘ رویت ہلال دی آئی سائٹ بہتر ہو گئی۔ ہن قوم کہندی اے چن چن دے سامنے آ گیا میں دوہاں توں صدقے جاں۔ الیکٹرانک ووٹنگ مشین گج وج کے میدان وچ آ گئی اے ساڈا یقین اے کہ سرکاری میڈیا راہیں اسیں اصل بیانیہ سافٹ امیج دی شیروانی پا کے کدی دھوتی کرتہ پا کے کدی اجرک سر تے رکھ کے میدان وچ آوے گا۔
حیرت اے فیٹف تے اوہ لوک وی اپنی رائے دا اظہار کر رہے نیں جہناں نوں بازار سودا خریدن گھلو تے بیگم پرچی تے سودا تے پیسے لکھ کے دیندی اے۔ مریم بی بی دا غصہ تے چلو سمجھ وچ آئوندا اے اوہناں نے تے حکومت تے کچیچیاں وٹنیاں ای نیں پر ایہ جو فیٹیف دا دھوم چرخڑا سائیاں دا چل رہیا اے ماضی وچ ایہدے کتن والے کون سن۔ فیٹف ن ے جہڑے الزامات تے پاکستان نوں جکڑ جمبو لایا اے اوہ پچھلی کئی دہائیاں دے چن سن جو فیٹف دی شکل وچ چڑھے۔ بنتاسنگھ نے سنتاسنگھ نوں آکھیا یار نیوٹن دا تریجا قنون کیہ اے؟ سنتا سنگھ بولیا یار تینوں پتہ اے میں سائنس دا طالب علم آں تے کسے قنون دے طالب علم اگے ایہ سوال پچھ لے۔ چلو مریم بی بی نوں تے سمجھ آئوندا اے اوہ بڑی میاں نیں پر چھوٹی میاں مریم اورنگزیب وی عزیز میاں قوال تے ہمنوا بن جاندی اے۔ آپا جی تسیں سائنس دی طالب علم او بھلا تہانوں نیوٹن دے تریجے قنون دا کیہ پتہ۔ کاش ماضی وچ اسیں اپنی منجی تھلے ڈانگ پھیردے رہندے اودوں تے سانوں کن وچ تیلا پھیرن توں ویہل نہیں سی جہدا نتیجہ ایہ ہویا کہ حکمراناں دے دوالے ہمیشہ چنی کیسری تے گوٹے دیاں دھاریاں چلدیاں رہیاں تے غریب عوام بنورانی بڑی دلگیر وے‘ کندھا ڈولی نوں دے جائیں ویر وے‘ گاندے رہے تے ویر وچارے اپنیاں تجوریاں بھرن وچ مصروف رہے۔
ایہ قنون‘ ایہ آئین‘ ایہ انصاف دا نظام وی اوہناں لئی وے سب توں سوہنیا ہائے وے من موہنیا گاندا رہیا۔ اوہ کھا پی کے ڈکار مار کے اڈدا دوپٹہ میرا ململ دا گاندے اڈ کے باہر دی ٹھنڈی فضا وچ جا بیٹھے تے اوتھوں لوکاں نوں انقلاب دے ناں تے نیڑے آ ظالما وے میں ٹھر گئی آں گاندے رہے۔ خیر ہن زمانہ بدل رہیا اے اوہ ویلے گئے جدوں خلیل خان فاختہ اڑاندے سن ہن تے اوہناں دا کہنا اے کہ کاں وی نہیں من دے کاں وی سیانے ہو گئے نیں۔٭٭