سیاست دے دو متحرک کردار

طلعت عباس خان

جس طرح مچھی پانی چوں باہر نہیں رہ سکدی اوسے طرح سچا سیاسی ورکر وی پارٹی چوں باہر نہیں رہ سکدا۔ سیاست نوں عبادت سمجھ کے کردا اے۔ اج اسیں جہڑیاں دو سیاسی شخصیات دا ذکر کر رہے آں۔ ایہ شخصیات کسے تعارف دی محتاج نہیں۔ ایہناں دی جمہوری جدوجہد وچ ان گنت قربانیاں نیں۔ ایہ سیاسی میدان دے دو روشن چراغ نیں۔ خوشی اے کہ دوویں اک واری فیر سیاسی میدان وچ متحرک نیں۔
سابق سینیٹر مسروراحسن دا تعلق پیپلزپارٹی سندھ نال اے۔ اوہ چنگے سیاستدان دے نال نال نفیس انسان نیں۔ اسیں کراچی جائیے یاں اوہ اسلام آباد آئون ملاقات ضرور ہوندی اے۔ اوہناں نے طالب علمی دے زمانے وچ این ایس ایف دے پلیٹ فارم توں سیاست دا آغاز کیتا۔ جوانی دا زیادہ عرصہ گھر وچ گھٹ‘ جیلاں وچ زیادہ گزریا۔ اوہناں نے بی ایس سی تے ایل ایل بی دے امتحانات جیل وچ پاس کیتے فیر وکالت شروع کیتی۔ فوجی دور وچ ضیاء دے خلاف تقریر کرن دی پاداش وچ اک ورھا قید تے پندراں کوڑیاں دی سزا وی برداشت کیتی۔ سولاں مہینے وکھووکھ جیلاں وچ رہے۔ قید دا کجھ عرصہ لال کرتی راولپنڈی تے شاہی قلعہ لہور وچ بیڑیاں پا کے گزریا۔ تشدد دے نشان اوہناں دے پنڈے تے اج وی نیں پر بڑے دلیر نہ جھکے نہ وِکے۔ کدی حوصلہ نہیں ہاریا تے سیاست توں کدی کنارہ کشی اختیار نہیں کیتی۔ مسرور احسن اصولا ںدی بالادستی دے امین سمجھے جاندے نیں۔ بانی پیپلزپارٹی ذوالفقارعلی بھٹو نے مسرور احسن نوں لیاقت آباد توں پیپلزپارٹی دا ٹکٹ دتا اوہناں دا مقابلہ پی این اے دے سیکرٹری جنرل پروفیسر غفور نال سی اوہ غریب دی آواز بننا فخر محسوس کردے نیں۔ 1976ء وچ پیپلزپارٹی نال منسلک ہوئے ایسے جماعت دے نال ساری عمر گزاری۔
بینظیر بھٹو دور وچ مسرور احسن سندھ توں سینیٹر منتخب ہوئے۔ اجے ذوالفقارعلی بھٹو دی جدائی دا پھٹ بھریا نہیں سی کہ بینظیر بھٹو دی جدائی دا پھٹ سہنا پیا۔ بہت سارے جیالے لیڈراں دی شہادت نوں برداشت نہ کر سکے۔ آصف علی زرداری تے بلاول بھٹو زرداری نے ہمیشہ ورکراں دا خیال رکھیا۔ کہیا جاندا اے آصف علی زرداری تے بلاول بھٹو زرداری نے حال ای وچ بلدیہ ٹائون کراچی دے قومی اسمبلی دے ضمنی الیکشن وچ مسرور احسن نوں فری ہینڈ دتا جہدے بعد ساریاں نے ویکھیا پیپلزپارٹی ایس حلقے توں کامیاب ہوئی۔ مسروراحسن دا کہنا سی کہ اوہ آصف علی زرداری تے بلاول بھٹو زرداری دے شکرگزار نیں جہناں نے اعتماد کیتا تے اہم ذمہ داریاں دتیاں جہدے نال ہن میرے اندر دا جیالا اک واری فیر توں جاگ پیا اے۔ جت لئی ساریاں نے رَل کے دن رات محنت کیتی ایس طرح ایڈووکیٹ عبدالقادر مندوخیل کامیاب قرار پائے جت دے بعد ایم این اے مندوخیل سپریم کورٹ بار اسلام آباد وچ تشریف لیائے۔ ملاقات ہوئی‘ مبارک دتی۔ اوہناں نے وی مسرور احسن دی خدمات نوں سراہیا۔ مندوخیل سردار لطیف خان کھوسہ سابق گورنر پنجاب دے چیمبر نال وابستہ نیں۔ ایس موقعے تے اسیں ایم این اے مندوخیل دی مسروراحسن نال فون تے گل بات وی کروائی۔ مندوخیل نے مسرور بھائی دا شکریہ وی ادا کیتا۔ مسرور احسن صاحب دا ایہ وی کہنا سی کہ ایس جت دا کریڈٹ محترم آصف علی زرداری تے بلاول بھٹو زرداری نوں جاندا اے جہناں نے اپنے چنگے ورکر نوں پارٹی ٹکٹ نال نوازیا۔ سینیٹر مسرور احسن دے فعال ہون نال پیپلزاپرٹی دی عوامی قوت وچ وادھا ہویا اے تے پارٹی ہور مضبوط تے بہتر نتیجے دیوے گی۔
مئی 2021ء دے تریجے ہفتے گوادر تربت بلوچستان پریس کلب وچ سابق ایم این اے‘ جسٹس بلوچستان ہائیکورٹ‘ سابق ممبر الیکشن کمیشن‘ ایڈووکیٹ سپریم کورٹ شکیل احمد بلوچ نے نیشنل پارٹی دے صدر سابق وزیراعلیٰ ڈاکٹر عبدالمالک‘ مرکزی سیکرٹری جنرل جان محمد بلیدی‘ سینیٹر اکرم دشتی‘ سابق وزیر رحمت صالح دی موجودگی وچ اک پریس کانفرنس وچ نیشنل پارٹی وچ اپنے خاندان و رشتے داراں دے نال شمولیت دا اعلان کیتا۔ ایس توں پہلاں وی اوہ ایسے جماعت وچ رہ چکے سن۔ پر 2013ء توں 2019ء تک عدالتی ذمہ داریاں دی وجہ نال سیاست توں کنارہ کشی اختیار کیتی۔ شکیل بلوچ 70ء دی دہائی وچ بلوچ سٹوڈنٹس آرگنائزیشن نال منسلک سن۔ 1985ء وچ میرغوث بخش بزنجو دی قیادت وچ پی این پی نوں جوائن کیتا۔ 2003ء وچ نیشنل پارٹی وچ میرحاصل خان بزنجو دی قیادت وچ بھرواں سیاسی کردار وی نبھایا۔ ساڈے میرحاصل خان بزنجو تے ڈاکٹر عبدالمالک نال برادرانہ تعلقات رہے تے گپ شپ دا وی موقع ملدا رہیا۔ ایہدا کریڈٹ ملک ایوب خان نوں جاندا اے جہناں نے میرحاصل خان بزنجو نال امریکہ وچ علاج دوران وی رابطہ رکھیا۔ فیر جدوں پاکستان واپس تشریف لیائے تے فون تے گل کراندے رہے۔ میرصاحب نال گل با تکردے ہوئے محسوس نہیں سی ہویا کہ اوہناں دی طبیعت خراب اے۔ میرحاصل خان بزنجو سیاسی ای نہیں خوبصورت شخصیت دے مالک وی سن۔ اوہناں دی کمی ہمیشہ شدت نال محسوس کیتی جاندی رہوے گی۔ اوہناں دے جہان فانی توں کوچ کر جان نال جہڑا سیاسی خلاء پیدا ہویا اے اوہنوں بھرنا ممکن نہیں۔ دعا اے اللہ تعالیٰ میرحاصل خان بزنجو دے درجات بلند کرے۔ ملک ایوب خان نے جس طرح حاصل خان بزنجو دا خیال رکھیا تے پارٹی معاملیاں نوں جس طرح نال نبھاندے رہے اوہدے تے ساریاں نوں مان اے۔ ساڈی شکیل بلوچ نال علیک سلیک بڑی پرانی اے۔ ایم این اے ہون یاں ہائیکورٹ جج یاں ممبر الیکشن کمیشن پیار وچ کدی فرق نہیں ویکھیا۔ امید اے نیشنل پارٹی وچ اوہناں دی شمولیت خوشگوار ہوا دا جھونکا ثابت ہووے گی۔ دعا اے مسرور بھائی تے شکیل بھائی سیاسی میدان وچ انج ای ملک و قوم دی خدمت کردے رہن۔٭٭