غلام محمود ڈوگر تے لاہور

لاہور بم دھماکے دی تھاں تے پُلس آلے نوں خون وچ لَت پَت ویکھ کے جاپیا، ایہہ اوہناں ماواں دے پتر نیں جیہڑیاں دھرتی ماں دی سنبھال تے دھرتی دے لوکاں تے قربان ہون دی مَت دے کے پُتراں نوں وردی پان دا حکم دیندیاں نیں۔ جتھے دل وچ بہوں کجھ ٹُٹ گیا اوتھے اک آس تے حوصلے دا رُکھ وی ایہہ آکھدا رہیا کہ جیہڑی دھرتی دے گبھرو قربانی، محنت تے ذمے واری دے جذبے نال بھرے ہون اوہ ہمیش جیوت رہندی اے۔ پِشلے ویہہ پنجھی ورھیاں وچ ملک تے ڈِگن آلیاں زمانی آفتاں، حادثاتی بجلیاں تے ویلے دی جھولی توں ڈِگ کے کھِلرن آلیاں وباواں نے ساڈے سبھناں دے گل وچ اوکڑاں دی پھائی پائی رکھی۔ ہر ویلے موت سیٹی وجان تے برباد کر دین آلے پوز وچ ساہنوں اُچا ساہ لین توں روکدی رہی۔ اسیں خوف تے اذیت وچ تے رہے پر اپنے اپنے گھراں دے قلعیاں وچ ٹِک کے بیٹھے رہے جد کہ پُلس آلیاں نے ایہناں آفتاں دے اَگے کھلو کے ساہمنا کیتا۔ اوہ نہ کووڈ توں ڈر کے پِشاں ہٹے نہ بارود نال بھری گڈی نوں ڈَکن توں جھکے تے نہ دھماکیاں، لڑائیاں تے فساداں آلیاں تھاواں تے اپڑن وچ لیٹ ہوئے۔
جدوں وی کدی اجیہے پُلس افسراں دا ذکر سُندی آں تے دُعا کرنی آں۔ ربّا میری دھرتی تے میرے لوکاں دے راکھیاں نوں سلامت رکھیں، اوہناں دا ایمان کدے نہ کَنبے، اوہناں دے حوصلے کدے نہ تِلکن تے اوہناں دیاں آساں کدے نہ ٹُٹن۔

مُنّوں بھائی دی یاد وچ ہون آلی تقریب وچ نویں نویں تعینات ہوئے سی سی پی او لاہور غلام محمود ڈوگر نوں ویکھ کے پتر کاراں، شاعراں، لکھاریاں تے کھوجیاں دا مڈھلا تاثر سی کہ اوہ بہوں مثبت سوچ رکھن آلے انسان دِسدے نیں۔ اَج ویلے نے ثابت کیتا کہ اوہ ساڈیاں اُمیداں تے بہوں حد تیکر پورے اُترے نیں۔ لاہور اک بہوں اوکھا شہر اے، کجھ زندہ دلاں نوں سمجھانا بہوں اوکھا کہ قنون دی حد اندر رہنا ضروری اے۔ ایہدا پربندھ، ایہدے بکھیڑے، ایہدیاں رونقاں دنیا توں وکھریاں نیں۔ جس شہر وچ اِکو ویلے بہوں ساریاں تقریباں ہو رہیاں ہون گئیاں، جیہڑا شہر ہر طبقے لئی چوکھی کھِچ رکھے گا، اوتھے پُلس نوں چوکھا چوکس رہن دی لوڑ ہوندی اے۔ سیاسی حوالے نال وی لاہور شہر پورے پاکستان دے دھیان اندر وسیا رہندائے۔ ایسراں ایس قلب و نظر دی وسعت تے وڈے دل آلے شہر دیاں خوبصورتیاں بحال رکھن لئی وڈے حوصلے تے دھیمے مزاج دے افسر دی لوڑ ہوندی اے جیہڑا بروقت نویں نویں چیلنجاں دا ساہمنا وی کرے تے لوکائی دے دُکھاں دی شنوائی وی کرے۔
ہر پُلس افسر کِسے نہ کِسے سنہری اصول نوں بوجھے وچ پائی رکھدائے مطلب اوہ ایہدی ترجیح ہوندائے۔ غلام محمود ڈوگر نے لاہور ورگے شہر وچ پُلس دی کمان سنبھالدیاں ای لاہور شہر دی زمین، ہواواں تے دُکھی لوکاں دے سُفنیاں نوں قبضہ مافیا دے چنگل توں رہا کران دا آہر کیتا تے ہر پاسے دہائی پے گئی۔ جذبہ صادق ہووے تے حکمت عملی بندی جاندی اے تے رستے آپ منزل تیکر اپڑان دا سراغ بن جاندے نیں۔ قیادت جس شے نوں مقصد بنا لوے، پورا محکمہ اوسے ڈگر تے ٹُرن لگ پیندائے۔ صرف کجھ مہنیاں وچ سینکڑاں شہریاں دا لُٹیا گیا اثاثہ پرتا کے اوہناں دا گواچیا اعتماد بحال کرنا بہوں اچیچی گل اے۔ ایسراں متعلقہ محکمیاں دے تعاون نال ارباں رپیاں مالیت دی سینکڑاں کِلّے سرکاری تے نجی زمیناں مافیا کولوں کھوہ کے حکومت تے اصل مالکان دے حوالے کرنا وی کسے عجوبے توں گھٹ نہیں۔ 700 توں چوکھے اجیہے بااثر ملزماں نوں بندی واں بنایا جا چکیا اے جیہڑے اینی اُچی اُڈان رکھدے سن کہ اوتھے تیکر اپڑن لئی وڈیاں وڈیاں دے پَر سَڑدے سن۔ باہرلے مُلکاں وچ رہن آلیاں پاکستانیاں نوں ہمیش شکایت رہندی اے کہ اوہ جدوں وی کوئی پلاٹ یا گھر مُل لیندے نیں اوہناں نال ہتھ ہو جاندائے۔ اوہناں دی اپنی دھرتی نال جڑت قائم رکھن لئی خصوصی ہیلپ لائن 1242 دا قیام بہوں خوش آئند اے۔ اِک فراڈ نجی ہائوسنگ سکیم کولوں ساڈھے اَٹھ کروڑ روپے کڈھا کے متاثرہ لوکاں نوں موڑنا بہوں وڈا کارنامہ اے۔
تھانہ کلچر وچ چھیتی تے عملی بہتری لئی لاہور دے 84 تھانیاں وچ سب انسپکٹر تے اے ایس آئی رینک دے کمیونٹی گائیڈ بھرتی کیتے گئے نیں جیہناں دا کم شہریاں دی رہنمائی تے فوری مدد اے۔ ایہہ اجوکے پڑھے لکھے گائیڈ تھانے دے گیٹ تے صرف جی آیاں نوں آکھن لئی نہیں موجود ہندے سگوں عرضی لکھن، فرنٹ ڈیسک، ایس ایچ اوز، انچارج انوسٹی گیشن، حوالاتیوں تیکر اپڑ، ایف آئی آر، ڈیٹا انٹری، گمشدگی رپورٹاں دے اندراج، زیر تفتیش کیساں تے پُلس سروسز بارے ساری جانکاری دین نال چنگا تعاون کر رہے نیں۔ چالھی جواناں تے ویہہ موٹر سائیکلاں دی ابابیل فورس شہر دے چوکھے کرائم آلے ہاٹ سپاٹس علاقیاں نوں پرامن بنان وچ مددگار ثابت ہو رہے نیں۔ ساڈے ایتھے انویسٹی گیشن دے شعبے دی ڈِھلی کارکردگی کارن کیس لمک جاندے نیں تے انصاف وچ چِر ہوندائے۔ ہن ایس شعبے نوں پیڈا کرن لئی اچیچے کم چھوئے گئے نیں۔ ایس ایچ او لگن لئی دو سال انویسٹی گیشن ونگ وچ کم کرن نوں لازمی شرط بنا دتا گیا اے۔ غلام محمود ڈوگر دے کارنامیاں دی سارنی بہوں لمی اے پر اوہناں دی سبھ توں وڈی خوبی ایہہ وے کہ اوہ روٹین دے کم کرن دی تھاں بہتری لئی عملی تدبیر نوں مکھ رکھدے نیں، ڈیلیور کرن دی عادت اوہناں نوں ہر گھڑی چوکس رکھدی اے۔
میں حیاتی وچ پہلی وار ایس عمارت وچ گئی۔ مینوں کوئی کم نہیں سی، صرف لوکائی دے راکھے تے لوکائی دی بہتری دے سُفنے نوں تعبیر وچ ڈھالن دا عزم کرن آلے افسر نوں دعاواں نال نوازنا مقصود سی۔ اوہناں دے آل دوال دُکھی لوک فریاداں پھڑ کے بیٹھے سن تے اوہ پورے دھیان نال اوہ وی گلّاں سُن رہے سن جیہناں دا پُلس دے محکمے نال سمبندھ نہیں ہوندا۔ اوہناں نال کجھ گلّاں ہوئیاں تے کئی ادھ وچ رہ گئیاں ایتھوں تیکر کہ چاء دا کپ آئون توں پہلوں اوہناں نوں چیف سیکرٹری صاحب دے دفتروں فون راہیں سدّا آ گیا تے مینوں وی پی ٹی وی تے فلسفہ جھاڑن جانا سی۔ پہلے وی میں کئی کالم لکھے جیہناں وچ حکومتاں نوں بِنتی کیتی کہ ہور شعبیاں وانگوں پُلس دا وی اَٹھ گھنٹے دا دورانیہ کیتا جاوے کیوں جے اوہ وی انسان نیں۔ انسانی حیاتی کرنا اوہناں دا وی حق اے۔ وزیراعظم عمران خان توں وی بِنتی اے کہ براہِ مہربانی پُلس دے محکمے نوں پیش آن آلیاں اوکڑاں دا ویروا کرن تے اوہناں نوں چنگا حفاظتی سامان دین توں اڈ اوہناں دے اوقات وی اَٹھ گھنٹے کر دِتے جاون تاں جے ملک وچ امن دی صورت حال ودھیا ہو سکے۔ اوہناں دی چوی گھنٹے آلی ڈیوٹی اِک جبر توں گھٹ نہیں۔ ایہہ جیہے راکھیاں نوں ویکھ کے نور جہان دا گانا آل دوال وَجن لگ پیندا۔
ایہہ پُتر ہٹاں تے نہیں وِکدے