فلسطینیاں دی پکار

فلسطینی پچھلی چھ دہائیاں توں اپنے جائز حق دی خاطر نہتے لڑ رہے نیں

رابعہ رحمٰن

اسرائیلی ریاست دے ناجائز تے غیر قانونی قیام نوں 73 ورہے دا عرصہ لنگھ چکیا اے۔ ایہہ ریاست دوجی جنگ عظیم دے بعد اک سازش دے تحت امریکہ تے مغرب نے قائم کیتی سی تاکہ مسلماناں دے عین وچکار اک مستقل تنازعے نوں جنم دتا جا سکے۔ پچھلی چھ دہائیاں توں ودھ عرصے دے دوران امریکہ نے بالخصوص تے مغرب نے بالعموم ہر ناجائز طریقے نال اسرائیل نوں نہ صرف سپورٹ کیتا اے بلکہ مضبوط توں مضبوط تر بنایا اے۔ اج کل اسرائیل ایہناں علاقیاں توں کدھرے زیادہ علاقے اُتے قبضہ کر چکیا اے جیہڑا 1948 وچ قیام دے ویلے ایہنوں دتے گئے سن۔ ایس دوران دو باقاعدہ عرب اسرائیل جنگاں وی ہوئیاں پر امریکہ تے مغرب دی بھرپور مدد تے پشت پناہی دی بدولت دونواں جنگاں وچ عرب ملکاں نوں شکست ہوئی۔
اسرائیل دی حالیہ ریاستی جارحیت کوئی نویں گل نہیں بلکہ ہر دو تن ورہے بعد کوئی نہ کوئی جواز بنا کے ایسے طرح دا ڈرامہ رچایا جاندا اے تے فیر اپنے مقرر کردہ اہداف نوں حاصل کرن دے بعد دنیا اُتے احساس جتان لئی حملے بند کردتے جاندے نیں۔ دنیا بالخصوص امریکہ تے مغرب ایہنوں اپنی سفارت کاری دی کامیابی دسدے ہوئے مسلماناں اُتے احسان جتان گے۔ فلسطینی پچھلی چھ دہائیاں توں اپنے جائز حق دی خاطر نہتے لڑ رہے نیں۔ ایہناں دا ایہہ حق ایہناں نوں بین الاقوامی برادری نے دتا اے۔ تقریباً ہر سال اقوام متحدہ دی جنرل اسمبلی فلسطینیاں دے حق وچ قرار داد پاس کردی اے پر اسرائیل دے اُتے ایس دا کوئی اثر نہیں ہوندا۔ کیوں جے اقوام متحدہ دے مضبوط ترین فورم سکیورٹی کونسل وچ جدوں وی ایہہ مسئلہ چکیا گیا تے امریکہ نے ایہنوں ویٹو کر دتا۔ امریکہ دے اندر یہودی لابی بوہت متحرک تے مضبوط اے تے اوہ اقتدار دے ایواناں وچ پالیسی سازی اُتے بوہت اثر انداز ہوندی اے جس دی وجہ نال کسے وی امریکی حکومت لئی ایہنوں نظر انداز کرنا ممکن نہیں۔ انج دی صورت حال کم و بیش یورپی ملکاں وچ وی اے۔ پچھلے اک دہائی توں زیادہ عرصہ توں تے ایس سلسلے وچ مسلم ملکاں دا رویہ وی انتہائی شرمناک رہیا اے۔ مسلم امہ دی خاموشی تے بے اعتنائی نے اسرائیل نوں ہور وی شہ دتی اے جس دی وجہ نال ایس دے مظالم تے ریاستی دہشتگردی وچ بتدریج وادھا ہویا اے۔ اسلامی کانفرنس تے عرب لیگ دے فورمز غیر موثر ہو چکے نیں۔ ہر اسلامی ملک اپنے مسائل وچ گھریا ہویا اے تے کوئی وی امریکہ تے مغرب نال الجھنا نہیں چاہندا تے ہن تے گل ایتھے تیکر آن پہنچی اے کہ رسمی مذمتی قرار داد وی پاس نہیں کیتی جاندی۔
حالیہ اسرائیلی کاروائی دے بعد توں لے کے ہن تیکر مسلم امہ وچ خاموشی جاری اے۔ خاص طور تے عرب ملیگ دے ملک جیہڑے ایس تنازعے توں براہ راست متاثر نیں اوہ وی چپ نیں۔ کسے نے اسلامی کانفرنس یا جنرل اسمبلی دا اجلاس بلان دی گل یا کوشش نہیں کیتی۔ صرف پاکستان دے دفتر خارجہ تے وزیراعظم نے ایس معاملے اُتے تشویش دا اظہار کیتا اے تے مسلمان ملکاں دی بے حسی نوں اُجاگر کیتا اے پر ایس سلسلے وچ سفارتی سطح اُتے عملاً اسیں وی کجھ نہیں کیتا۔ مشرق وسطیٰ وچ مستقل قیام امن دی گل تے سب کردے نیں پر عملاً کوئی کجھ نہیں کردا۔ ایہہ امن ایس ویلے تیکر قائم نہیں ہو سکدا جدوں تیکر اک آزاد تے خود مختار فلسطینی ریاست قائم نہیں ہو جاندی۔ ایہہ کم صرف ایسے ویلے ہوئے گا جدوں امریکہ اپنی دوغلی تے منافقت اُتے مبنی پالیسی نوں چھڈ کے اخلاص دے نال کوشش کرے تے اسرائیل اُتے دبائو پائے۔ امریکہ دا ہر صدر ایس گل دا اطہار تے کردا اے پر فیر مضبوط یہودی لابی دے اگے بے بس ہو جاندا اے۔ ایہہ وی اک حقیقت اے کہ ایس طرح دے جبر تے ظلم نال اسرائیل خود وی کدی محفوظ نہیں ہو سکدا تے نہ ای فلسطینیاں نوں دبا سکدا اے۔ ایس مسئلے دا پائیدار حل بہرحال اک آزاد تے خود مختار فلسطینی ریاست دے قیام وچ ای مضمر اے جیہڑا کہ اک نہ اک دن ہونا ای اے۔ ایہہ گل وی سب اُتے عیاں اے کہ اسرائیلی رویہ تے مشرق وسطیٰ دی صورت حال مسلماناں وچ انتقام تے شدت پسندی نوں جنم دیندی اے جس دا نتیجہ فیر امریکہ تے مغرب دے خلاف انتہا پسندانہ کاروائیاں دی صورت وچ نکلدا اے۔ ایہہ مسئلہ فلسطینیاں نوں خاص طور تے مسلماناں نوں بالعموم اک تحریک تے وجہ فراہم کردا اے۔ لوڑ ایس امر دی اے کہ اسرائیل تے امریکہ ایس حقیقت نوں سمجھن تے فلسطینیاں نوں ایہناں دا جائز حق دین۔ بجائے نویں یہودی بستیاں آباد کرن دے فلسطینی اکثریت والے علاقیاں اُتے مشتمل اک آزاد تے خود مختار فلسطینی ریاست قائم کیتی جائے نہیں تے ایہہ قتل و غارت ایسے طرح جاری رہوے گی تے ایس دا نقصان خود اسرائیل نوں وی ہوئے گا۔ پچھلی چھ دہائیاں دے دوران اسرائیل نے مقبوضہ علاقیاں وچ کئی نویں یہودی بستیاں آباد کیتیاں نیں تاکہ آبادی دا تناسب تبدیل کیتا جا سکے پر ایس دا کوئی حربہ کامیاب نہیں ہو سکیا۔ غزہ تے مغربی کنارے وچ رہن والے لکھاں فلسطینی غربت تے افلاس دی زندگی لنگھا رہے نیں تاں مرنا تے مارنا ایہناں لئی ہن کوئی زیادہ اہمیت نہیں رکھدا۔ ایہناں دی زندگیاں دی اونج ای کوئی زیادہ قیمت تے اہمیت نہیں رہی البتہ اسرائیل لئی اوہ درد سر بنے رہن گے۔