غزل
علی محمد ملوک
پیار دا ہر مال دیوے بال کے
لے گیا اوہ نال دیوے بال کے
اج جے نہیں سار لینی سوہنیا!
کل کریں نہ بھال دیوے بال کے
دُکھ‘ پیڑاں‘ ہوکیاں دا گل چ میں
پالیا جنجال دیوے بال کے
نھیریاں نوں روشنی تھیں پیاریا
ہون دے خوشحال دیوے بال کے
شعر دا چانن کھلارن واسطے
جندڑی لئی گال دیوے بال کے
ساڑ دے جے ساڑ سکیں جانیا!
نفرتاں دے جال دیوے بال کے
ہن تے آہرے لائون لئی ویلا ملوک
دے گیا سر تال دیوے بال کے
