ساڈے انقلابی رہنما

hameed ullah bhatti

لکھت:حمیداللہ بھٹی

انقلاب گلاں نال نہیں آندے سگوں بڑے پاپڑ ویلنے پیندے نیں جے عوام ساتھ نہ دیوے تے کجھ نہیں بن سکدا تے انقلابی خود تریخ وچ دفن ہو جاندا اے بڑے گھٹ لوک اجہے ہوندے نیں جہڑے تریخ دا دھارا موڑ لیندے نیں اسیں تے کئی واری تریخ دا دھارا موڑیا اے ہن ویکھو ذوالفقار علی بھٹو نے کیہ نہیں کیتا انڈیا توں فون نوں رہائی دوائی تے فیر حکومت وی دلیری نال کیتی بس شملی معاہدے توں پردہ نہیں چک سکے باقی تے بہت کجھ کیتا اے اسلامی سربراہ کانفرنس لہور منعقد کرائی فیر اوہناں دی دھی محترمہ بے نظیر بھٹو نے جمہوریت دی بحالی لئی کم کیتا تے ملک دی فوجی حکومت توں جان چھڈائی میرے پاپا آصف زرداری نے پنج سالہ حکومت دے دوران لوکاں دی خدمت کیتی فیر وی ساڈے توں آمدن دا حساب منگیا جا رہیا اے اجہے بے اصولی اسیں برداشت نہیں کر سکدے جے موجودہ حکمران کجھ کرنا چاہندے نیں تے اسیں کدوں روکیا اے پر میرے پاپا تے پھوپھو توں ای کیوں پوچھ تاچھ کیتی جا رہی اے کیہ قائم علی شاہ توں چنگا وزیراعلیٰ سندھ نوں نہیں دتا جہڑا ہر تھاں سوندا نہیں سگوں جاگدا رہندا اے اخباری بیان وی جاری کردا اے میری تقریراں خشوع و خضوع نال سُندا اے موقع ہووے یاں نہ ہووے تاڑیاں وجا کے میری حوصلہ افزائی کردا اے جے بیرون ملک ساڈے کجھ اک اکاؤنٹ نیں تے عمران خان نوں کیہ مسئلہ اے اوہ ساڈے خاندان تے کیوں الزام لاندا اے اسیں تے کدی اوہدے ماضی تے لب کشائی نہیں کیتی حالاں جے اسیں چاہیے تے بہت کجھ لوکاں نوں دس سکنے آں فیر وی چپ آں پر عمران خان ساڈے لتے لیندے رہندے نیں؟ میں تہاڈے تے واضح کر دیواں جے عمران خان نے اپنی روش نہ بدلی تے ملک ترقی نہیں کر سکدا تے وفاق تے بھیڑے اثرات مرتب ہو سکدے نیں تے ساڈے ورگے انقلابیاں نوں انقلاب لیان وچ مشکلات پیش آ سکدیاں نیں۔ساڈے توں وڈا کہڑا انقلابی ہو سکدا اے میرے پیو نے ملک لئی کیہ نہیں کیتا موٹروے بنائے چھانگا مانگا دی سیاست شروع کیتی پاکستان دا ناں پوری دنیا وچ روشن کیتا فیر وی پانامہ کیس بنایا گیا جہڑا اصل وچ حکومتی بغض وچ اے حالاں جے ایس کیس اُتے تے ساڈی حوصلہ افزائی ہونی چاہیدی سی کیوں جے اسیں کسے نوں پتہ وی نہیں چلن دتا تے جائیداداں بنا لئیاں پر کنجوس حکومت نے شاباش دین دی بجائے ساڈے توں منی ٹریل دا تقاضا شروع کر دتا ساڈی مخالفت اصل وچ ملک دشمن اے جہدی عمران خان نوں سمجھ نہیں اقامہ بنوانا کہڑا جرم اے تے ایہدے تے کہڑی دفعہ لگدی اے؟ کجھ سانوں وی تے دسیا جاوے اوہ میںدسنا سی کہ میرا اوہ بیان جہدے وچ میں آکھیا سی کہ بیرون ملک تے کیہ میرے تے ملک وچ وی کوئی جائیداد نہیں اصل وچ مینوں کئی گلاں یاد نہیں رہندیاں ایون فیلڈ میرے بھراواں دا اے انج وی اسیں تے جدی پشتی رئیس آں ایس لئی سانوں سوال و جواب دے کٹہرے وچ کھڑا کیتا جانا ٹھیک نہیں قنون تے عام لوکاں لئی اے ساڈا کسے نے احتساب کرن دی کوشش کیتی یاں ساڈے توں خصوصی سلوک نہ کیتا گیا تے یاد رکھو اسیں کسے توں ڈرن والے نہیں اسیں تے چاہنے آں ووٹ نوں عزت دیو پر جے ووٹ نوں عزت نہیں ملدی تے کوئی گل نہیں سانوں ای عزت دے دیو اسیں انقلابی لوک آں تے ملک وچ انقلاب لیان لئی کوشاں آں جے انقلاب نہیں آندا تے سیلاب آ جاندا اے تے ساڈا کیہ قصور اے انج وی عوام دے بغیر انقلاب نہیں آ سکدا پر جدوں توں ساڈے ٹبر تے کیس بنے نیں عوام ساتھ نہیں دے رہے جہدے تے مینوں بہت غصہ آندا اے ایسے لئی اسیں فیصلہ کیتا اے فی الحال اپنا علاج کرایئے تے جائیداد بچان ول توجہ دیئے جدوں عوام نوں ہوش آ گئی تے اوہناں نے سانوں یاد کیتا تے انقلاب لیان دا سلسلہ دوبارہ شروع کراں گے پر ایس توں پہلاں موجودہ حکومت نوں گھر گھلاں گے تاں جے سانوں انقلاب لیان وچ آسانی ہووے اک ہور گل کرنی اے کہ مینوں وی جلدی توں جلدی بیرون ملک جان دی اجازت دتی جاوے تاں جے میں اپنے پیو دے علاج معالجے وچ ہتھ ونڈا سکاں تے اپنے بھراواں توں حساب لے سکواں نہیں تاں فوج سنے ہر ادارے تے الزام تراشی شروع کر دیواں گے۔ویکھو جی جدوں پاکستان بنیا وی نہیں سی تے اسیں ملک وچ انقلاب لیان دی جدوجہد کر رہے سی انقلاب وچ خون بہندا اے جہدا رنگ لال ہوندا اے ایسے مناسبت نال اسیں تے اپنا ناں وی سرخ پوش رکھ لیا اے ٹھیک اے پاکستان ساڈا ملک اے پر اسیں افغانسان تے انڈیا نال وی بہت پیار کرنے آں اک واری اک صوبے دی حکومت سانوں ملی سی اسیں موقع توں پورا فائدہ چکیا تے انقلاب لیان دی جدوجہد تیز کیتی جہدی پاداش وچ کئی کیس بھگت رہے آں پر ہن تے حالات بہت پتلے نیں حکومت سانوں لفٹ نہیں کراندی تے عوام وی اک واری لفٹ کرا کے بے زار ہو گئی اے اجہے حالات وچ انقلاب دی منزل نہیں مل سکدی اپنے مولانا صاحب نے انقلاب دا لالچ دے کے سانوں اسلام آباد وچ ذلیل کرایا تے خود اپنے گھر وچ آرام نال بیٹھے نیں پر اسیں لوکاں دے طعنے سن رہے آں خیر طعنے سنن دے اسیں پرانے عادی آں کجھ لوک کہندے نیں اسیں مولانا دے پچھے لگ کے ٹھیک نہیں کیتا یار گل دلیل نال ہونی چاہیدی اے کیہ تسیں نہیں جاندے مولانا تے ساڈے وچ کئی اقدار سانجھیاں نیں دوواں دے بزرگاں نے پاکستان بنن دی مخالفت کیتی ہن اسیں چاہنے آں دوجے لوک آرام کرن تے ملک دا اقتدار ساڈے حوالے کر دین تاں جے انقلاب دی راہ پکی ہووے۔مینوں تے ملک وچ ہر صورت انقلاب لیانا اے پر متحدہ مجلس عمل دے بعد مواقع نہیں مل رہے جہدے تے بہت پریشان آں آزادی مارچ دا کوئی فائدہ نہیں ہویا پلان اے بی سی سب چوپٹ ہو چکے فیر وی انقلاب لئی جدوجہد کر رہے نیں پر اسمبلی توں باہر ہون دی وجہ توں کامیابی نہیں مل رہی انج تاں میرا پتر قومی اسمبلی وچ اے پر اسیں چاہنے آں اسلام آباد ساڈے حوالے کیتا جاوے تاں جے اسیں اسلام نافذ کر سکیے ساڈے مارچ توں فائدہ چک کے کجھ لوک ملک توں ای کوچ کر گئے نیں خیر اوہ ملک وچ ہوندے وی تے ساڈا کیہ سنورنا سی تہانوں پتہ اے انقلاب لئی اسیں آزادی مارچ کیتا پر حمایت دا یقین دوا کے ملک توں جان والے ساڈے نال وی ہتھ کر گئے نیں جہدی وجہ توں طبیعت وچ ملال اے تے کجھ برا حال اے پاکستان بنان دی ساڈے بزرگاں نے مخالفت کیتی اے سانوں تے پاکستان تے حکومت کرن دتی جاوے جے تسیں اجیہا نہیں کردے تے انقلاب دی راہ وچ رکاوٹاں آ جان گیاں۔کراچی تے حیدر آباد نوں بنان سنوارن لئی اسیں ہر جتن کیتا اے ملک دے خلاف اسیں کجھ نعرے لائے سن جس پاروں ساڈا گلوکار رہبر معتوب ٹھہریا پر ہے اوہ وی انقلابی اپنے دیس نوں چھڈ کے ہن انڈیا وچ مودی نوں رام کرن تے قنالب دی راہ تے لیان دی کوشش کر رہیا اے کراچی وچ ٹارگٹ کلنگ دا سانوں ذمہ دار ٹھہران والے ایہ کیوں بھل جاندے نیں کہ ملک دی آبادی تیزی نال ودھ رہی اے جہدی وجہ توں مسئلیاں وچ وادھا ہو رہیا اے ایہناں حالات وچ اسیںآبادی گھٹ کریئے تے وی چنگا نہیں سمجھیا جاندا وکلاء کسے دے قابو نہیں آندے اسیں تے مئی دے مہینے وچ وکیلاں نوں کراچی وچ عبرت دا نشان بنایا جو انقلاب لئی اشد ضروری سی فیر وی کجھ حلقے ساڈے توں خوش نہیں جہدی وجہ توں انقلاب دی منزل کھوٹی ہو رہی اے۔

کسے نوں این آر او نہیں دینا کوئی چور ڈاکو نہیں بچے گا حکومت رہوے یاں نہ رہوے سب نوں احتساب دے شکنجے وچ لیاواں گے تاں جے ملک وچ حقیقی انقلاب آ سکے کجھ لوک ساڈی معصومیت دا فائدہ چک کے ملک توں باہر چلے گئے نیں پر اسیں فیر وی یقین کرانے آں کسے نوں این آر او نہیں دیواں گے مہنگائی دے ذمہ دار سابق حکمران نیں اسیں تے اجے کجھ کیتا ای نہیں ایس لئی ساڈے تے ذمہ داری پان توں گریز کرو میرے پاکستانیوں گھبرانا نہیں مرغیاں تے کٹے پالن دے منصوبیاں نال انقلاب آوے گا تے ایسے طرح دیاں سکیماں توں ای ملک دنیا دی نمبر ون قوم بن سکدا اے پٹرول تے اشیائے خوردونوش دے ریٹ ودھن نال انقلاب دی منزل قریب توں قریب تر آوے گی میرے پاکستانیو تسیں گھبرانا نہیں تسیں حوصلہ رکھنا اے۔

اپنا تبصرہ گھلو