عالمی جنگ دا ڈر‘ پاکستان دا ٹھوکواں جواب

لکھت:علی رضا رانا

ایس ویلے پوری دنیا دی وجہ عراق تے مرکوز اے تے سب ایہ جانن لئی بے چین نیں کہ جہڑے ملک دی سرزمین تے ایہ حملہ ہویا اے ایہناں دا ردعمل کیہ ہووے گا تے ایران کیہ سوچ رہیا اے۔ اودھر ایرانی جنرل قاسم سلیمانی دی میت ایران دے شہر اہواز اپڑا دتی گئی اے تے تدفین وچ ہزاراں لوکاں دی رلت ہوئی اے۔ قاسم سلیمانی دا تعلق ایرانی صوبے کرمان دے اک پہاڑی پنڈ نال سی۔

جتھے اوہ 1953وچ پیدا ہوئے، 13ورھے دی عمر وچ ایہناں نوں خاندان دے معاشی حالات خراب ہون دی وجہ توں سکول چھڈنا پیا تے اوہ کرمان دے مرکزی شہر وچ مزدوری کرن لگے جد کہ 1978وچ انقلاب ایران دی شروعات دے ویلے اوہ علاقائی پانی دی فراہمی دے محکمے وچ ٹیکنیشن بن چکے سن۔ سلیمانی نے اپریل 1979ء وچ پاسداران انقلاب بنن دے بعد ایہدے وچ شمولیت اختیار کیتی۔

سلیمانی دی ساکھ اک اجہے افسر ورگی سی جہڑا اپنے سپاہیاں دا خیال رکھدا سی۔سلیمانی اپنے سپاہیاں وچ ’’دی گوٹ تھیف‘‘ یعنی فکری چور مشہور سی۔ ایہناں دا ایہ ناں ایس لئی پیا کیوں جے اوہ جنگ دے دوران اپنے سپاہیاں لئی بکریاں لے آندے تے ایہناں نوں کھواندے سن۔ غریب گھرانے توں قدس فورس دی کمان تک 62سالہ قاسم سلیمانی بارے خیال کیتا جاندا اے کہ اوہ اک غریب گھرانے نال تعلق رکھدے سن تے اوہناں نے واجبی توں باقاعدہ تعلیم حاصل کیتی سی پر پاسداران انقلاب وچ شمولیت دے بعد اوہ تیزی نال اہمیت اختیار کردے گئے۔ 1980توں 1988تک جاری رہن والی ایران عراق جنگ وچ قاسم سلیمانی نے اپنا ناں بنایا تے جلد ای اوہ ترقی کردیاں کردیاں سینئر کمانڈر بن گئے۔ 1998وچ قدس فورس دے کمانڈر بنن دے بعد سلیمانی نے بیرون ملک خفیہ کاروائیاں دے ذریعے مشرق وسطیٰ وچ ایران دے اثر وچ وادھا کرنا شروع کیتا۔ ایہدے علاوہ اوہناں نے اپنے اتحادی گروہواں نوں ہر ممکن مدد فراہم کیتی تے ایران توں وفادار ملیشیاواں دا اک نیٹ ورک تیار کر لیا۔ آکھیا جاندا اے کہ اپنے کیریئر دے دوران قاسم سلیمانی نے عراق وچ شیعہ تے کرد گروہواں دی سابق آمر صدام حسین دے خلاف مزاحمت وچ مدد کیتی جد کہ اوہ لبنان وچ حزب اللہ تے فلسطینی علاقیاں وچ حماس دے وی مددگار رہے۔

جنرل سلیمانی نے 2000دی دہائی وچ عراق تے امریکی حملے دے بعد شیعہ جنگجوواں دے گروہ بنائے جہناں نے امریکا تے ایہدے اتحادیاں دے خلاف جنگ وچ بھرپور حصہ لیا۔ 2006ء وچ اوہناں نے حزب اللہ دی اسرائیل دے خلاف جنگ وچ تزویراتی معاونت کیتی۔ 2008وچ اوہناں نے سینئر امریکی جنرل ڈیوڈ پیٹریاس نوں اک پیغام گھلیا جہدے وچ اوہناں نوں دسیا کہ اوہ ایران دی عراق، شام، لبنان، غزہ تے افغانستان دی پالیسیاں نوں کنٹرول کردے نیں۔ داعش دے خلاف جنگ وچ 2010دی دہائی وچ سلیمانی دا بہت وڈا کردار سی۔ اوہناں نے عراق وچ موجود مقدس مقامات دی حفاظت لئی کئی جنگجو گروہ تشکیل دتے جہناں وچوں اک زینبیون بریگیڈ وی اے جہدے وچ پاکستانی شیعہ نوجوان وی شامل سن۔ امریکی فیڈرل بیورو آف انوسٹی گیشن دے سابق سپیشل ایجنٹ علی سوفان اپنے اک مضمون وچ لکھدے نیں کہ موجودہ ایران نوں پوری طرح اوس ویلے تک نہیں سمجھیا جا سکدا جدوں تک جنرل سلیمانی نوں نہ سمجھ لیا جاوے۔ جنرل سلیمانی بارے آکھیا جاندا اے کہ اوہ ایران دی شام، لبنان، عراق تے یمن وچ موجودہ جنگی پالیسیاں تے حکمت عملی دے موجد سن۔ سلیمانی دی موجودگی وچ ایران نے سرکاری تے غیر سرکاری مسلح گروہواں دا استعمال کردیاں ہوئیاں نہ صرف اپنے اتحادیاں نوں ہور طاقتور بنایا سگوں ایران نوں وی مشرق وسطیٰ وچ اک وڈی طاقت وچ تبدیل کرن وچ اہم کردار ادا کیتا۔ علی صوفان لکھدے نیں کہ بشار الاسد دی شام وچ حکومت بچان دا سہرا وی جنرل سلیمانی دے سر جاندا اے۔ موجودہ دور وچ ایران دا شام نال اتحاد ایناں طاقتور ہو چکیا اے جے جنرل سلیمانی چاہن تے تہران توں لبنان تے اسرائیل دی سرحد تک بلاروک ٹوک آزادی نال سفر کر سکدے نیں۔ امریکی میگزین دی نیویارکردے مطابق شام وچ بشار الاسد دے دشمناں دے خلاف جنرل سلیمانی خود دمشق وچ رہ کے جنگ دی نگرانی کردے سن۔ ایران دی پاسداران انقلاب دی القدس فورس دے سربراہ جنرل قاسم سلیمانی جمعہ دے دیہاڑ امریکی فوج دے عراق وچ کیتے گئے اک میزائل حملے وچ مارے گئے۔ ایہناں دے نال عراقی فوج دے گروپ ہشیدال شاہی دے ڈپٹی ہیڈ ابومہدی المہندس وی ہلاک ہون والیاں وچ شامل نیں۔

دوجے پاسے امریکی ایوان نمائندگان دی سپیکر نے امریکی صدر توں ایرانی جنرل تے حملے دی تفصیلات فوری طور تے طلب کر لئیاں نیں۔ نینسی پلوسی آکھیا ٹرمپ انتظامیہ آئندہ دی پالیسی بارے وی ایوان نمائندگان نوں فوری آگاہ کرے۔ ایران نے فوری طور تے ایس حملے دی مذمت کیتی تے بعدوں ایس اقدام دا ’’کڑا بدلہ‘‘ لین دا عزم کیتا۔ ملک بھر وچ مظاہرین سڑکاں تے نکل آئے تے امریکی تے اسرائیلی جھنڈے ساڑے گئے۔ امریکہ دا کہنا اے اوہنے ایہ ڈرون حملہ امریکی صدر ڈونلڈ ٹرمپ دے حکم تے کیتا تاں جے اک اجہے بندے توں بیرون ملک موجود امریکیاں دا تحفظ کیتا جا سکے جہنوں اوہ اک طویل عرصے توں خطرہ قرار دیندے نیں۔ ایہ اچانک اقدام امریکہ تے ایران دی ودھدی ہوئی کشیدگی دے بعد کیتا گیا۔ پچھلے مہینے ایران دی حمایت یافتہ ملیشیا نے امریکی کنٹریکٹر نوں عراق وچ قتل کر دتا جہدے بعد مغربی عراق تے مشرقی شام وچ حزب اللہ ملیشیا دے خلاف امریکی فضائی حملے کیتے گئے۔ سال بعد بغداد وچ امریکی سفارتخانے دے باہر پرتشدد مظاہرے پوٹ پئے۔ امریکہ نے ایہدا الزام ایران تے لاگو کیتا۔ قاسم سلیمانی ایران دی قدس فوج دے قائد سن۔ اوہ ایران دے رہبر اعلیٰ آیت اللہ خامن ای دے کافی نیڑے سن۔ ایہناں نوں ایران وچ دوجا طاقتور ترین بندہ تصور کیتا جاندا سی۔ دوجے پاسے عراقی شیعہ رہنما تے مہدی ملیشیا دے سربراہ مقتدیٰ الصدر آکھیا اے قاسم سلیمانی نوں نشانہ بنانا جہاد نوں نشانہ بنان دے مترادف اے پر ایہ ساڈے عزم نوں کمزور نہیں کرے گا۔ اوہناں نے اپنے پیروکاراں نوں عراق دی حفاظت کرن لئی تیار رہن دی ہدایت وی کیتی۔ پر مشرق وسطیٰ دے دوجے ملکاں جیویں کہ قطر، سعودی عرب تے مصر ولوں وی اجے تک کوئی باضابطہ ردعمل ساہمنے نہیں آیا۔ لبنانی گروہ حزب اللہ دے سربراہ حسن نصر اللہ نے اک بیان وچ آکھیا اے جنرل سلیمانی دے قاتلاں نوں قرار واقعی سزا دوانا دنیا بھر وچ پھیلے سارے جنگجوواں دا فرض اے۔ پر شام ولوں ساہمنے آن والے ردعمل وچ ایس حملے نوں بزدلانہ کاروائی قرار دتا گیا اے۔ ایس واقعے دے بعد ودھدی ہوئی کشیدگی دے پیش نظر عالمی رہنماواں نے دوجے ملکاں وں پرسکون رہن دی اپیل کیتی اے۔ ابتدائی طور تے عالمی منڈیاں وچ تیل دیاں قیمتاں وچ وادھا ویکھن وچ آیا اے۔ مبصرین مشرق وسطیٰ وچ کشیدگی وچ وادھے تے ایران تے امریکہ دے وچکار ممکنہ جنگل بارے تبصرہ کردے وکھائی دے رہے نیں۔ دنیا بھر وچ سوشل میڈیا تے ایس ویلے ایہو موضوع زیر بحث اے تے ایسے خبر نال جڑے نیں۔ ایس حملے دے ہن تک کئی نتائج ساہمنے آئے نیں۔ جنرل سلیمانی دی ہلاکت دی خبر آن دے کجھ گھنٹیاں بعد ای عالمی منڈی وچ تیل دیاں قیمتاں وچ چار فیصد وادھا ویکھن وچ آیا۔ عالمی منڈی وچ تیل دیاں قیمتاں وچ وادھا عموماً مشرق وسطیٰ وچ کشیدگی ودھن دی صورت وچ ہوندا اے۔ برطانوی ماہر معاشیات جیس ٹووے دے مطابق ہر شے دا انحصار ایران دے ردعمل تے ہووے گا۔ سانوں خدشات نیں کہ ایس پیش رفت نال خطے وچ تصادم دا خطرہ ودھ گیا اے۔ امریکہ دے 35مقامات نشانے اُتے نیں، ایران دی دھمکی۔ ایرانی کمانڈڑ دے ایس بیان دے بعد مشرق وسطیٰ وچ جنگ دے بدل ہور گہرے ہو گئے نیں۔ ایرانی کمانڈر دی دھمکی تے ردعمل دیندیاں ہوئیاں امریکی صدر ڈونلڈ ٹرمپ نے ایران تے وڈے، تیز ترین تے تباہ کن حملیاں دی دھمکی دے دتی۔ڈونلڈ ٹرمپ نے ایران نوں خبردار کردیاں ہوئیاں آکھیا کہ ایران نے امریکی اہلکاراں یاں اثاثیاں تے حملہ کیتا تے ایہدی 52تنصیبات نوں نشانہ بناواں گے۔ تفصیلات دے مطابق ایران دے شہر قم وچ مسجد دے گنبد تے لال جھنڈا لہرا دتا گیا اے جہدا مطلب اے کہ ایران جنگ لئی تیار اے۔ عوام وی تیار رہن۔ ایرانی میڈیا دا کہنا اے تریخی مسجد جمکران دے گنبد تے لال علم لہرایا جانا ایران ولوں خبردار کرنا اے، ملکی تریخ وچ انج پہلی واری کیتا گیا اے جو آن والے دناں وچ کسے انتہائی شدید جنگ دی علامت نوں ظاہر کردا اے۔ ایس اقدام دا مقصد جنرل قاسم سلیمانی نوں خراج عقیدت پیش کرنا وی اے۔

امریکا ایران صورتحال تے پاکستانی فورج تے حکومت دا واضح موقف اے کہ اسیں کسے دی جنگ وچ نہیں پواں گے، اسیں اپنی سرزمین کسے لئی استعمال نہیں ہون دیواں گے تے نہ کسے دی لڑائی وچ حصہ بناں گے۔ ہن ویکھنا ایہ اے جے ایران امریکہ جنگ ہوئی تے دوجے مسلم ملکاں سنے عالمی جنگل وچ تبدیل نہ ہو جاوے کیوں جے ایس ویلے جہڑی صورتحال اے اوہ انتہائی تشویشناک اے۔

اپنا تبصرہ گھلو