وزیراعظم دا تعلیمی نصاب وچ تصوف نوں شامل کرن دا حکم

اسلام آباد: وزیراعظم عمران خان نے تعلیمی نصاب وچ تصوف نوں شامل کرن دا حکم دتا اے معاملات دا جائزہ لیا گیا۔ چیئرمین ایچ ای سی نے وزیراعظم نوں اعلیٰ تعلیمی اصلاحات تے بریفنگ دیندیاں آکھیا موجودہ حکومت وچ تعلیم دا ترقیاتی بجٹ 29ارب روپے تک ودھا دتا گیا پر بعض عناصر منفی ایجنڈا پھیلا رہے نیں کہ وفاق نے تعلیمی بجٹ گھٹ کیتا۔ وزیراعظم عمران خان آکھیا تعلیم دا بجٹ دگنا تے ہو سکدا اے پر گھٹ نہیں ہو سکدا، پی ایچ ڈی تے تحقیق دا معیار ہور اُچا کیتا جاوے، جامعات وچ بالاں نوں تریخ تے تصوف نہیں پڑھایا جاندا، ہن تعلیمی نصاب وچ تریخ تے تصوف نوں وی شامل کیتا جاوے۔

وزیراعظم آکھیا کامیاب جوان پروگرام دے تحت 130ارب روپے نوجواناں تے خرچ ہون گے، نوجواناں دی تعلیم و تربیت تے بھرپور وسائل خرچ کر رہے آں، غیر ضروری طور تے ٹیکس دا پیسہ ضائع نہ ہون دتا جاوے، تعلیم لئی ہور رقم وی چاہیدی ہووے گی تے فوری دیواں گے، حکومت پڑھے لکھے معاشرے دی اہمیت تے یقین رکھدی اے۔