سی پیک وچ بغیر ٹینڈر ٹھیکے دین نال قومی خزانے نوں نقصان
اسلام آباد( پنجابی میڈیا گروپ)این ایل سی ولوں بغیر ٹینڈر ٹھیکہ دتے جان تے ادھُورے کم دے باوجود ٹھیکیداراں نوں ودھ ادائیگیاں دا انکشاف ہوئیا جدکہ سی پیک وچ بغیر ٹینڈر ٹھیکے دین نال قومی خزانے نوں نقصان وی ہوئیا۔رانا تنویر دی زیر صدارت پارلیمنٹ دی پبلک اکائونٹس کمیٹی دا اجلاس ہوئیا،جس وچ وزارت منصوبہ بندی دیآڈٹ رپورٹ20-2019زیر غور آئی۔آڈٹ حکام نے دسیا کہ نیشنل لاجسٹکس سیل(این ایل سی)نے کراچی گرین لائن بی آر ٹی ایس وچ ایسکی لیٹرز دی تنصیب لئی ٹینڈر توں بغیر ٹھیکہ دتا،ایس منصوبے اُتے96کروڑ روپے خرچ ہوئے،این ایل سی نے کم مکمل نہ ہون دے باوجود ٹھیکیداراں نوں ودھ ادائیگیاں کتیاں۔ این ایل سی نے حبیب رفیق تے خان کنسٹرکشن سنیکئی کمپنیاں نوں17کروڑ80لکھ روپے ودھ ادا کیتے۔سیکریٹری منصوبہ بندی نے جواب دتا کہ این ایل سی برائے نام وزارت منصوبہ بندی دے نال اے،این ایل سی خود مختار ادارہ اے،ساڈی التجا اے کہ این ایل سی نوں وزارت منصوبہ بندی توں واپس لے لیا جائے،اسیں ایس ادارے نوں نہیں سنبھال سکدے۔





















