اک کالم دی تلاش وچ

لكهت: ابرار ندیم

انج تے ملک وچ دن بدن ودھدی مہنگائی‘ بیروزگاری‘ امن و امان دی مندی صورتحال تے سیاسی عدم استحکام ورگے ان گنت سدابہار موضوعات نیں جہناں تے اک معمول دا کالم لکھیا جا سکدا اے پر کسے اجہے موضوع دی تلاش وچ آں جو عام کالم نگاراں دی روش توں ہٹ تھوڑا ہٹ کے ہووے۔ جتھوں تک ملک میں مہنگائی تے بیروزگاری دی گل اے تے پچھلے تریہہ پینتی ورھیاں وچ جدوں توں میں ہوش سانبھیا اے اپوزیشن دا ایہو الاپ سن دا تے پڑھدا آ رہیا واں کہ موجودہ حکومت دے برسراقتدار آن دے بعدوں ملکی تریخ دی بدترین مہنگائی‘ غربت تے بیروزگاری نے غریب لوکاں دیاں چیکاں کڈھا دتیاں نیں جہدے تے غریب عوام دی ہمدردی وچ اپنے اپنے دور دے وڈے وڈے کالم نگاراں نے بڑے زبردست کالم لکھے نیں پر سوائے اوہناں کالم نگاراں دے اپنی غربت تے بیروزگاری دور ہون دے اج تک نہ تے ملک وچ لوکاں دی غربت تے بیروزگاری گھٹ ہوئی اے تے نہ ای کسے حکومت نے اوہناں افلاطونی کالم نگاراں دے قیمتی مشوریاں دی روشنی وچ ملک وچ ودھدی ہوئی مہنگائی تے قابو پان دی کوشش کیتی اے۔ جتھوں تک معاشی بحران دی گل اے تے ساڈے ملک وچ ایہ اکلی چیز اے جہنوں مستقل بنیاداں تے استحکام حاصل اے ایہو وجہ اے کہ اقتدار سانبھن والی ساڈی ہر نویں حکومت حلف اٹھان دے چھیتی بعد سب توں پہلے جو بیان جاری کردی اے اوہ ایہ ہوندا اے کہ ملک ایس ویلے نازک دور چوں لنگھ رہیا اے ایس لئی لوک ملک تے قوم دی بہتری لئی قربانی دین لئی تیار ہو جان۔ یقینا ایہ دسن دی لوڑ نہیں کہ ایس بیان دے بعد فیر کسے رسمی یاں غیر رسمی کاروائی دے بناں ہر حکومت بے بس تے مسکین لوکاں دی دھون تے بناں تکبیر پڑھے اک واری فیر مہنگائی دی تیز چھری پھیر دیندی اے کیوں جے روایت دے مطابق ایہ معاشی بحران جان والی حکومت دا پیدا کردہ ہوندا اے ایس لئی سوائے اک ادھ سر پھرے یاں مخالف پارٹی دے کالم نگار نوں چھڈ کے ساڈے زیادہ تر کالم نگار ملک نوں نازک دور چوں کڈھن لئی سخنے‘ قلمے اپنی اپنی خدمات دے نال حکومت وقت دے موڈھے نال موڈھا جوڑ کے اوس ویلے تک جم کے کھڑے ہو جاندے نیں جدوں تک کوئی دوجی پارٹی اقتدار وچ نہیں آ جاندی۔ باقی رہیا سیاسی عدم استحکام تے ساڈے ایتھے صحافتی حلقیاں دی خوش قسمتی نال ایہدی تریخ شاید ساڈے ملک دے قیام توں وی ودھ پرانی اے۔ ایہ موضوع ساڈے کالم نگاراں تے ٹی وی اینکراں دا ہمیشہ توں پسندیدہ اے جہدے تے اوہناں دے قلم تے زبان دے نال نال اوہناں دا رزق وی خوب چلدا اے۔ اک طرح نال ملک وچ سیاسی عدم استحکام صحافتی استحکام لئی آکسیجن دا درجہ رکھدا اے جہدے بناں نہ تے اخبار وچ کوئی رنگینی پیدا ہوندی اے تے نہ ای کسے نیوز چینل دی ریٹنگ ودھدی اے۔
اک ویلا سی جدوں ساڈے ایتھے سیاسی خبراں تے ٹی وی ڈرامیاں وچ دلچسپی لین والے بندیاں نوں وکھرے وکھرے خانیاں وچ ونڈیا جاندا سی پر جدوں توں ملک وچ نجی ٹی وی چینلز تے سیاسی ٹاک شوز وچ گالھاں تے مار دھاڑ دے نتیجے وچ مولاجٹ قسم دا اک نواں سیاسی کلچر پروان چڑھیا اے ٹی وی ڈرامے تے فلماں دے شائقین وی سیاسی ٹاک شوز وچ واہوا دلچسپی لین لگ پئے نیں۔ ظاہر اے ایس بدلے ہوئے رجحان وچ اخبارات دیاں شہ سرخیاں‘ کالماں تے نیوز چینل وچ وی فیر ایس قسم دی گرما گرم خبراں تھاں تھاں ملن گئیاں جہناں وچ ڈرامائی عنصر زیادہ ہووے گا۔ اجہے ماحول وچ کوئی پرلے درجے دا معصوم ای ہووے گا جو سیاسی جوڑ توڑ‘ جلسے جلوساں تے مخالف سیاسی رہنماواں دی اک دوجے نوں پٹھا سدھا لمکان تے پھڑ لوو جانے نہ پائے ورگے سسپنس‘ تھرل تے ماردھاڑ والے بیان تے خبراں نوں چھڈ کے سماجی تے معاشرتی ناہمواریاں دی بنیاد تے اصلاحی قسم دے خشک تے بور کالم لکھے تے ایہدے بعد ایہ توقع وی رکھے کہ قارئین اوہنوں صرف دلچسپی نال پڑھن گے سگوں ایہدے نال ملک وچ کسے قسم دا کوئی انقلاب وی آوے گا۔
مینوں ہفتے بھر وچ صرف اک کالم لکھنا ہوندا اے ایس لئی مینوں اپنے کالم لئی کوئی مناسب موضوع لبھن لئی عموماً ڈھیر ویلا مل جاندا اے۔ میں ہن تک ظلم‘ زیادتی‘ بدعنوانی‘ ناانصافی‘ غربت‘ مہنگائی‘ تعلیمی پسماندگی‘ جہالت‘ عدم برداشت‘ بے حسی‘ خودغرضی تے معصوم بچیاں نال ہون والیاں زیادتیاں ورگے ان گنت موضوعات نوں ایس لئی رد کر چکیا واں کیوں جے ساڈے معاشرے وچ ایہ ساریاں خرابیاں روزانہ دا حصہ نیں تے ایہناں گھسے پٹے موضوعات تے ایناں لکھیا جا چکیا اے کہ ہن لوکاں لئی ایہناں وچ کوئی دلچسپی باقی نہیں رہی۔ کجھ چر پہلاں مذہبی طبقیاں‘ ساڈی اقدار و روایات تے اداریاں خلاف لکھن دا فیشن وی واہوا بنیا سی پر ایہدے بعد یار لوکاں نے ایہناں موضوعات دی وی اینی مٹی پلیت کیتی اے کہ ہن ایہناں موضوعات تے لکھنا وی بیکار جہی مشقت بن کے رہ گیا اے۔٭٭