اپنیاں دی حوصلہ شکنی حب الوطنی نہیں

ساڈی فوج جذبہ ایمانی نال سرشار اے ساڈا ملک ایٹمی طاقت اے تے کوئی اسلامی ملک ایٹمی قوت ہوئے بھلا کفار کنج برداشت کر سکدے نیں

حمید اللہ بھٹی

انج ممکن ای نہیں کہ دنیا سانوں ساڈے حال اُتے چھڈ کے کنارہ کشی کر لوے کدی ایف اے ٹی ایف تے کدی شان رسالت ؑ وچ گستاخی دے مرتکب بندیاں نال نرمی تے ایس حوالے نال قوانین وچ تبدیلی تے تقاضے سانوں اپنی منشا دے مطابق لیان دے بہانے نیں کوئی مسلمان پیارے مکی مدنی آقا دی توہین برداشت کر ای نہیں سکدا پر جذبہ ایمانی ختم کرن لئی کجھ قوتاں گستاخاں دی سرپرستی کر رہیاں نیں جس دا ادراک کرنا چاہیدا اے ساڈی فوج جذبہ ایمانی نال سرشار اے ساڈا ملک ایٹمی طاقت اے تے کوئی اسلامی ملک ایٹمی قوت ہوئے بھلا کفار کنج برداشت کر سکدے نیں۔

ایس لئی نت نویں سازشاں کیتیاں جا رہیاں نیں پر جدوں تیکر فوج تے عوام یکجا نیں اودوں تیکر غیر مسلم طاقتاں سانوں نقصان نہیں اپڑا سکدیاں معاشی لحاظ نال کمزوری وی فوجی طاقت دی بنا اُتے زیادہ کمزوری محسوس نہیں ہوندی پر یاد رکھو جدوں کدی فوج تے عوام اک دوجے دے مدمقابل آئے تے ساڈا حشر وی خدانخواستہ افغانستان، عراق، لیبیا تے فلسطین جہیا ہو سکدا اے انج ہون دی صورت وچ مسلکی، لسانی تے علاقائی تفریق روا رکھے بغظیر پاکستانی سمجھ کے مار دتا جائے گا کسے دی دھون اُڑاندے ہوئے امیر و غریب وچ تفریق نہیں ہوئے گی مائواں، بھیناں دا حشر وی کشمیری خواتین وانگوں ہوئے گا ایس ل ئی اگے ودھنا اے معاشی طاقت بننا اے تے اتحاد و اتفاق نوں فروغ دینا ہوئے گا۔ تفرقہ بازی یا نسلی، لسانی تے علاقائی تعصب نوں ختم کرنا ہوئے گا فوج مخالف عناصر دی حوصلہ شکنی کرنی ہوئے گی۔
ملک وچ کسے نہ کسے فوج نے رہنا اے جے سانوں اپنی فوج وارا نہیں تے بیرونی فوج دے مظالم سہن لئی تیار رہنا ہوئے گا اج فوج دے خلاف گل کرنا فیشن جہیا بن دا جا ہریا اے کجھ سیاستدان وی ایسے رستے چلن لگے نیں حالانکہ وطن عزیز دی فوج نے محدود وسائل دے باوجود وطن دے دفاع دی ذمہ داریاں بطریق احسن سرانجام دتیاں نیں روس نوں اگے ودھن توں روکیا اے تے بھارت جہے مکار گوانڈھی دے جارحانہ تے توسیع پسندانہ عزائم نوں ناکام بنایا اے۔ 1971 وچ جے فوج تے عوام وچ دوریاں نہ ہوندیاں تے بنگلہ دیش کدی معرض وجود وچ نہ آندا دہشت گرداں نوں کچلن لئی ضرب عضب دے تحت کامیاب تے نتیجہ خیز فوجی کاروائیاں اُتے دنیا حیران اے حالانکہ 20 ورہے توں کثیر وسائل و نیٹو دی حمایت دے باوجود امریکہ مٹھی بھر جنگجو افغاناں اُتے قابو نہیں پا سکیا تے آخر کار انخلا اُتے مجبور اے پر ساڈی دلیرسپاہ نے بیرونی طاقتاں دی سازشاں نوں ناکام بنان تے ایہناں دے آلہ کاراں نوں محدود مدت وچ جہنم رسید کیتا اے ایسے وجہ نال ملک وچ بڑی حد تیکر امن اے پر سوشل میڈیا اُتے اغیار دے کارندے مایوسیاں ودھان تے فوج دے بارے نفرت پیدا کرن وچ مصروف نیں جنہاں نوں ناکام بنانا ای حب الوطنی اے اپنیاں دی حوصلہ شکنی حب الوطنی نہیں کجھ سیاسی رہنما وی محدود سیاسی فائدے ل ئی فوج دے بارے بدگمانیاں ودھان تے ملک دے مفاد نوں دائو اُتے لا رہے نیں جنہاں نوں ذہن وچ رکھنا چاہیدا اے کہ اج نہیں تے کل ایہناں نوں اقتدار مل سکدا اے پر فوج دے خلاف پھیلائی نفرت دا زہر نوں ختم کرنا مشکل ہو سکدا اے ایس لئی بولدے ہوئے حکمت و تدبر دا مظاہرہ کیتا جائے ملک وانگوں محافظ ادارہ فوج وی اہم اے عوام دے دلاں وچ موجود فوج نال محبت نوں گھٹ کرنا حب الوطنی دے تقاضیاں دے منافی اے۔

وزیرستان تے بلوچستان وچ دہشت گرداں ولوں وچھائی بارودی سرنگاں تے آئی ای ڈیز جہے دھماکہ خیز مواد نوں صاف کرن لئی پاک فوج، ڈی مائننگ، وچ مصروف اے جس دے دوران پاک فوج دے افسر تے جوان شہید وی ہو رہے نیں وطن نوں دہشت گردی توں محفوظ بنان لئی فوجی اپریشن دے دوران بے شمار دہشت گرد انجام نوں اپڑے تے کجھ گوانڈھی ملکاں ول فرار وی ہوئے پر فرار ہوندے ہوئے بارودی سرنگاں تے آئی ای ڈیز وغیرہ دی وجہ نال اج وی علاقے وچ آزادانہ نقل و حمل مشکل اے صفائی دے دوران سویلین تے فوجی اہلکار ان لینڈ مائنز دا نشانہ بن دے رہندے نیں اک محتاط اندازے دے مطابق صرف وزیرستان وچ سٹھ لکھ مربع میٹر وچ لینڈ مائنز موجود نیں جنہاں نوں صاف کرن لئی پاک فوج دے 32 گروپ وکھرے وکھرے کم کر رہے نیں ہر گروپ چودہ بندیاں اُتے مشتمل اے پیچیدہ تے دشوار گزار پہاڑی علاقے دے اک اک انچ نوں فیزیکلی چیک کردے ہوئے لینڈ مائنز صاف کرنا آسان کم نہیں کدی بارش تے برف باری دی بنا اُتے کم روکنا وی پیندا اے کدی مقامی حالات آڑے آ جاندے نیں پر جویں ای مطلع صاف ہوندا اے دوبارہ کم شروع ہو جاندا اے شہادتاں تے معذوری دے زخم لگن دے باوجود ملک نوں محفوظ تے پُر امن بنان دے فوجی عزم وچ کوئی کمی نہیں آئی۔ پی ٹی ایم جہے لوک وکھرے رکاوٹاں پاندے رہندے نیں ایہہ لوک نہ صرف دہشت گرداں دے سہولت کار سن تے ایہناں نوں رہائش فراہم کرن دے نال دیگر سہولتاں اپڑاندے رہے نیں ہن وی دیگر جماعتاں دے کارکناں دے نال مل کے رخنہ پان توں باز نہیں آندے ایہہ لوک لینڈ مائنز گروپاں نوں ویکھ کے نہ صرف آوازے کسدے نیں بلکہ مخالفانہ نعرے لاندے نیں سارے نامساعد حالات دے باوجود فیر وی 13 لکھ مربع میٹر دا علاقہ صاف کر لیا گیا اے جس دے دوران سولہ ہزار دے لگ بھگ لینڈ مائنز و دیگر دھماکہ خیز مواد تلاش کیتا گیا ایہہ مشکل ، صبر آزما تے تھکا دین والا کم وزیرستان دے لوکاں نوں پرسکون رہائش فراہم کرن لئی کیتا گیا تاکہ نہ مقامی لوک پرامن تے پرسکون ماحول وچ روزمرہ دے معمول سرانجام دے سکن پر پی ٹی ایم تے ایہناں دے حواریاں دا اپنے علاقیاں دی صفائی توں روکنا سمجھ توں بالاتر اے کجھ وی کہیا جائے ایہہ عمل اخلاص اُتے مبنی نہیں جس دا مقامی آبادی نوں ادراک کرنا چاہیدا اے۔

داسو ڈیم اُتے کم وچ مصروف چینی انجینئرز تے پاکستانی ہنر منداں اُتے حملہ ہوئے یا فیر اسلام آباد وچ مقیم افغان سفیر نجیب اللہ علی خیل دی دھی سلسلہ علی خیل دے اغوا دی جھوٹی کہانی ہوئے واقعات دے تسلسل توں ایہہ سمجھنا مشکل نہیں کہ سوچے سمجھے منصوبے دے تحت بیرونی دشمن قوتاں پاکستان نوں غیر مستحکم کرن دے در اُتے نیں ہجے حال ای وچ بھارتی وزیر خارجہ جے شنکر اعتراف کر چکے نیں کہ فنانشل ایکشن ٹاسک فورس اُتے دبائو پا کے بھارت نے پاکستان نوں گرے لسٹ توں نکلن نہیں دتا واقعات دی ترتیب نوں پیش نظر رکھدے ہوئے آسانی نال سمجھیا جا سکدا اے کہ بیرونی عوامل نہ صرف وطن دے اندرونی معاملات وچ مداخلت دے مرتکب نیں بلکہ بیرونی دبائو دا وی باعث نیں ایہناں حالات وچ اندرون ملک توں غیراں نوں ملن والی کمک پاکستان نوں مزید نقصان اپڑان دے مترادف اے۔ پاک فوج نوں متنازع ملک دی خدمت نہیں کدی فوجی اخراجات دی بابت سوال چکے جاندے نیں تے کدی اسلحہ خریداری اُتے تنقید کیتی جاندی اے انج دا طرز عمل رکھن والیاں نال ہم وطناں نوں ہوشیار رہن دی لوڑ اے۔ پاک فوج تہاڈی اپنی فوج اے ایہہ ملک دی حفاظت دی ذمہ دار اے یقین رکھو پاک فوج دے ہوندے ہوئے کسے دی جرات نہیں کہ ملک ول میلی اکھ نال ویکھ وی سکے لوڑ ایس امر دی اے کہ فوج تے عوام وچ یگانگت برقرار رکھی جائے تاکہ وطن دشمن عناصر نوں دندان شکن جواب ملدا رہوے۔