عید الاضحی اُتے صفائی دے مثالی اقدامات، وزیرا علیٰ عثمان بزدار نے آپ نگرانی کیتی

جاوید یونس

10 ذی الحج نوں پاکستان وچ لوکاں نے سنت ابراہیمی دی پیروی کردے ہوئے جانوراں نوں قربان کیتا۔ صاحب حیثیت لوکاں نے اپنی اپنی حیثیت دے مطابق اللہ دی راہ وچ جانور قربان کیتے۔ دین اسلام اک مکمل ضابطہ حیات اے جیہڑا زندگی دے سارے پہلوئواں دا احاطہ کردا اے بھانویںایس دا تعلق باطنی زندگی نال ہوئے یا دنیاوی زندگی نال۔ قرآن و حدیث وچ پاکیزگی، طہارت تے صفائی دی اہمیت اُتے بوہت زیادہ زور دتا گیا اے۔ ایہو وجہ اے صفائی نوں نصف ایمان کہیا گیا اے۔ کوئی وی مسلمان ایس ویلے تیکر اللہ تعالیٰ دے حضور پیش نہیں ہو سکدا جدوں تیکر اوہ پاک صاف نہ ہوئے۔
وزیراعلیٰ پنجاب سردار عثمان بزدار نے عید قربان اُتے پورے صوبے وچ صفائی نوں یقینی بنان تے جانوراں دی آلائشاں نوں فوری طور اُتے تلف کرن تے ایہناں نوں ٹھکانے لان لئی صوبائی ڈویژنل، ضلعی و تحصیل لیول دی انتظامیہ نوں ہدایات جاری کیتیاں تے آپ ذاتی طور اُتے ایس عمل دی نگرانی کیتی۔ پورے صوبے وچ مویشی منڈیاں قائم کیتیاں گئیاں۔ایہناں منڈیاں وچ داخلے لئی باقاعدہ ایس او پیز جاری کیتے گئے۔ کوئی بندا ماسک دے بغیر داخل نہیں ہو سکدا سی۔ مویشی منڈیاں وچ 118 موبائل ویکسی نیشن کیمپ قائم کیتے گئے۔ عید قربان اُتے انتظامات نوں تن مرحلیاں وچ ونڈیا گیا سی۔ پہلے مرحلے وچ لوکاں وچ صفائی دی اہمیت نوں اجاگر کرنا، جانوراں دی آلائشاں نوں پان لئی بیگ ونڈے گئے تے شکایت سیل قائم کیتے گئے تاکہ صفائی متعلق شہری اپنی شکایتاں درج کروا سکن۔ دوجا مرحلہ عید دے پہلے دن شروع ہویا جس دے تحت پورے صوبے وچ اپریشنل ہیلپ ڈیسک تے کنٹرول روم قائم کیتے گئے۔ موبائل کولیکشن ٹیماں دی تشکیل تے جانوراں دی آلائشاں نوں ڈمپنگ پوائنٹس اُتے اپڑانا شامل سی۔ تیجا مرحلہ عید دے بعد دا سی جس دے تحت زیرویسٹ نوں یقینی بنانا، ڈمپنگ سائٹس نوں بند کرنا سڑکاں دی دھلائی تے فنائل نال پورے صوبے وچ سپرے شامل سی۔
وزیراعلیٰ پنجاب نے عیدالاضحی اُتے شہراں وچ صفائی دے بہترین انتظامات کرن دی ہدایات جاری کردے ہوئے کہیا کہ سالڈویسٹ مینجمنٹ کمپنیاں تے لوکل گورنمنٹ دے اردارے زیرویسٹ مینجمنٹ نوں یقینی بنان۔ صفائی دے انتظامات دی مانیٹرنگ لئی کنٹرول روم قائم کیتا جائے۔ مین کنٹرول روم لوکل گورنمنٹ کمپلیکس وچ قائم کیتا جائے۔ اوہناں نے کہیا کہ روس برس انتظامات نوں خوب توں خوب تر ہونا چاہیدا اے۔ عوام نوں صفائی ہوندی نظر آنی چاہیدی اے۔ صفائی دے بہترین انتظامات کرن اُتے پہلے تن ضلعیاں دی حوصلہ افزائی کیتی جائے گی۔ لہور تے دیگر وڈے شہراں وچ کوتاہی ہر گز برداشت نہیں کیتی جائے گی۔ اوہناں نے کہیا کہ شہریاں نوں صاف ماحول فراہم کرنا حکومت دے متعلقہ اداریاں دی ذمہ داری اے۔ سیکرٹری لوکل گورنمنٹ نورالامین مینگل نے وزیراعلیٰ پنجاب نوں صفائی پلان متعلق بریفنگ دتی۔
وزیراعلیٰ پنجاب سردار عثمان بزدار نے عیدالاضحی دے دن لوکل گورنمنٹ بورڈ کمپلیکس ساندہ دا دورہ کیتا۔ وزیراعلیٰ عثمان بزدار نے صفائی دے انتظامات دا جائزہ لین لئی صوبائی مانیٹرنگ سیل دا معائنہ کیتا۔ وزیراعلیٰ نے صوبائی مانیٹرنگ سیل وچ پورے صوبے وچ عیدالاضحی اُتے صفائی لئی کیتے جان والے انتظامات دا مشاہدہ کیتا۔ وزیراعلیٰ عثمان بزدار دی زیر صدارت اعلیٰ سطح دا اجلاس منعقد ہویا۔ صوبائی سیکرٹری بلدیات نے لہور سنے پورے پنجاب وچ صفائی لئی کیتے جان والے انتظامات بارے بریفنگ دتی ۔ وزیراعلیٰ عثمان بزدار نے ویڈیو لنک اُتے مختلف شہراں دی انتظامیہ نال گل بات کیتی تے صفائی دے انتظامات دے بارے وچ ضروری ہدایات دتی۔ اوہناں نے کہیا کہ عیدالاضحی اُتے شہراں نوں صاف ستھرا رکھنا ساڈے ساریاں دی قومی ذمہ داری اے۔ صفائی دے چنگے انتظامات اُتے متعلقہ ضلعیاں دے افسراں تے عملے نوں انعام دتا جائے گا۔ خراب کارکردگی اُتے جواب طلبی ہوئے گی۔ وزیراعلیٰ عثمان بزدار نے لہور سنے پورے پنجاب وچ صفائی دے بہترین انتظامات یقینی بنان دی ہدایت دیندے ہوئے کہیا کہ آلائشاں نوں بروقت چکیا جائے تے مناسب طریقے نال ٹھکانے لایا جائے۔ سڑکاں یا گلی محلیاں وچ آلائشاں نظر نہیں آنیاں چاہیدیاں۔ لہور سنے سارے شہر صاف ستھرے ہونے چاہیدے نیں۔ اوہناں نے کہیا کہ سالڈ ویسٹ مینجمنٹ کمپنیاں، متعلقہ ادارے تے انتظامیہ صفائی انتظامات نوں ہر قیمت اُتے یقینی بنان۔ صفائی دے انتظامات پچھلے ورہے دے مقابلے وچ بہتر ہونے چاہیدے نیں۔ متعلقہ اداریاں دے افسران صفائی دے انتظامات دی خود مانیٹرنگ کرن۔ اوہناں نے کہیا کہ صفائی دے انتظامات نوں خوب توں خوب تر بنان لئی سارے وسائل بروئے کار لیائے جان۔ صفائی دے بارے وچ شہریاں دی شکایتاں اُتے فوری طور اُتے کاروائی کیتی جائے۔ صفائی دے انتظامات دی آپ نگرانی کر رہیا واں۔ غفلت یا کوتاہی اُتے ایکشن ہوئے گا۔ اوہناں نے کہیا کہ محکمہ بلدیات دی استعداد کار ودھا رہے آں۔ اوہناں نے کہیا کہ لہور وچ نویں لوکل گورنمنٹ اکیڈمی بناواں گے۔ افسران صفائی دے انتظامات دی مانیٹرنگ لئی آپ فیلڈ اُتے موجود رہن۔ تبدیلی واضح طور اُتے نظر آنی چاہیدی اے۔ اوہناں نے کہیا کہ عوام دی خدمت توں ودھ کے کوئی ہور ترجیح نہیں۔
وزیراعلیٰ پنجاب سردار عثمان بزدار دی ہدایات اُتے عیدالاضحی دے دوران پنجاب دے سارے شہراں تے پنڈ دے علاقیاں نوں صاف رکھن لئی خصوصی انتظام کیتے گئے جنہاں دے تحت پاکستان تحریک انصاف دے عوامی نمائندیاں دی سربراہی وچ صحت و صفائی دا بہترین انتظام یقینی بنایا۔ عید دے دوجے دن وزیراعلیٰ پنجاب سردار عثمان بزدار نے بغیر پروٹوکول لہور شہر دے مختلف علاقیاں دا 2 گھنٹے تفصیلی دورہ کیتا تے صفائی دی صورتحال دا جائزہ لیا۔ اوہناں نے آپ گڈی چلائی تے سینٹری ورکرز تے ٹریفک وارڈنز نال گل بات کیتی تے شہریاں نوں صاف ستھرا ماحول دین لئی فرائض سرانجام دین والے ورکراں نوں شاباش دتی۔ وزیراعلیٰ نے ڈیوس روڈ، شملہ پہاڑی، ایمپرس روڈ، کوپر روڈ، منٹگمری روڈ، میکلورڈ روڈ تے لکشمی چوک وچ صفائی اپریشن دا معائنہ کیتا ۔ وزیراعلیٰ میو ہسپتال روڈ، ملتان روڈ، لٹن روڈ، فیروز پور روڈ، شاہ جمال ، شادمان تے دیگر علاقیاں وچ وی گئے ۔ وزیراعلیٰ دے دورے دے دوران کسے مقام اُتے ٹریفک نہیں روکی گئی۔ وزیراعلیٰ عثمان بزدار نے صفائی اپریشن نوں مزید تیز تے موثر بنان دی ہدایت کردے ہوئے کہیا کہ شہر وچ زیروویسٹ اپریشن نوں ہر قیمت اُتے یقینی بنایا جائے گا۔صفائی اُتے کوئی سمجھوتا نہیں ہوئے گا۔ گلیاں، محلیاں تے سڑکاں توں جانوراں دیاں آلائشاں نوں فوری طور اُتے چکیا جائے تے ڈمپر مقامات اُتے ڈمپ کیتا جائے تے ایس لئی مناسب انتظامات کیتے جان۔ وزیراعلیٰ نے ایل ڈبلیو ایم سی دے حکام نوں ہدایت کیتی کہ لہور شہر نوں صاف کرن لئی کوئی کسر نہ چھڈی جائے شہر دی صفائی لئی دن رات اک کیتا جائے۔
وزیراعلیٰ پنجاب سردار عثمان بزدار دی ہدایت اُتے عیدالاضحی اُتے جانوراں دیاں آلائشاں نوں ٹھکانے لان تے صفائی دے بہتر انتظامات یقینی بنان لئی محکمہ لوکل گورنمنٹ اینڈ کمیونٹی ڈویلپمنٹ وچ صوبائی کنٹرول روم قائم کیتا گیا۔ کنٹرول روم وچ 115 ملازمین نے 24 گھنٹے 3شفٹاں وچ کم کیتا۔ صوبائی کنٹرول روم وچ شہریاں ولوں موصول ہون والی شکایتاں دا فوری ازالہ کیتا جاندا۔ ایس توں علاوہ پورے صوبے وچ ضلعی سطح اُتے وی کنٹرو ل رومز قائم کیتے گئے سن۔ صوبائی کنٹرول روم ضلعی کنٹرول رومزتے ویسٹ مینجمنٹ کمپنیاں دی کارکردگیاں نوں مسلسل مانیٹر کردا رہیا تے ویلے دے نال نال ہدایات وی جاری کردا رہیا۔ صوبائی و ضلعی کنٹرول رومز وچ شہریاں ولوں 14387 شکایتاں موصول ہوئیاں جس اُتے فوری عمل درآمد کیتا گیا تے تقریباً ساری شکایتاں حل کر دتیاں گئیاں۔ عیدالاضحی اُتے محکمہ بلدیات دے ملازمین دی چھٹیاں منسوخ کیتیاں گئیاں تاکہ صفائی دے اپریشن وچ کسے قسم دی رکاوٹ پیدا نہ ہوئے ایس دے علاوہ فیلڈ وچ موجودہ ملازمین دی حاضری نوں وی یقینی بنایا گیا۔ صوبائی کنٹرول روم وچ سارے سی اوز نوںبراہ راست رابطے وچ رکھیا گیا۔ پورے صوبے وچ عید صفائی اپریشن دی مانیٹرنگ لئی ڈویژنل کمشنرز، ضلعی ڈپٹی کمشنرز، ڈائریکٹرز لوکل گورنمنٹ تے ڈپٹی ڈائریکٹرز دی فیلڈ وچ ڈیوٹیاں لائیاں گئیاں۔ سارے کمشنرز ، ڈپٹی کمشنرز تے لوکل گورنمنٹ دے افسراں نے اپنے اپنے علاقیاں وچ صفائی اپریشن دا جائزہ لین لئی دورے کیتے تے انتظامات نوں یقینی بنایا۔ وزیراعلیٰ عثمان بزدار نے کہیا کہ بہترین کارکردگی تے شہراں نوں صاف ستھرا رکھن والے ضلعے، ویسٹ مینجمنٹ کمپنیاں تے لوکل گورنمنٹس نوں اعزاز یہ دتا جائے گا۔ ایس سلسلے وچ اک خصوصی کمیٹی تشکیل دتی گئی اے جس دے سربراہ ایڈیشنل سیکرٹری لوکل گورنمنٹ ہون گے جیہڑے سارے ضلعیاں دی کارکردگی دا جائزہ لے کے اپنی رپورٹ صوبائی وزیر بلددیات محمود الرشید نوں پیش کرن گے۔
اک اندازے دے مطابق پورے صوبے توں 2 لکھ 4 ہزار ٹن جانوراں دیاں آلائشاں تے ویسٹ نوں کولیکٹ کر کے ڈسپوزل سائٹس اُتے ڈمپ کیتا گیا۔ شہریاں وچ 3758369 ناٹ بائیوڈی گریڈ ایبل بیگ ونڈے گئے تاکہ اوہ جانوراں دیاں آلائشاں نوں گلیاں محلیاں وچ سٹن دی بجائے ایہناں بیگاں وچ پان تے سینٹری ورکر ایہناں نوں آسانی نال چک سکن۔ ایس نال شہراں وچ گندگی نہ ودھ سکے۔ ایس طرح 6644 پرائمری کولیکشن پوائنٹس وی قائم کیتے گئے۔ عیدالاضحی اُتے 7260 مختلف قسماں دی مشینری استعمال کیتی گئی جنہاں وچ لوڈ، ڈمپرز، ٹریکٹر ٹرالی، رکشہ وغیرہ شامل نیں جد کہ پورے صوبے وچ صفائی اپریشن وچ 47269 ملازماں نے حصہ لیا جنہاں وچ افسران و اہلکاران شامل نیں۔ جانوراں دیاں آلائشاں نوں ڈمپ کرن لئی 2944 سائٹس نوں سلیکٹ کیتا گیا۔ لہور ویسٹ مینجمنٹ کمپنی نے شہریاں وچ 15 لکھ بیگ ونڈے تے 47846 ٹن آلائشاں نوں اکٹھا کیتا تے پہلے توں موجود مشینری دے علاوہ 1876 وادھو مشینری استعمال کیتی گئی۔ ایس طرح راولپنڈی وچ 5 لکھ بیگ ونڈے گئے تے 9298 ٹن آلائشاں ٹھکانے لائیاں گئیاں۔ ملتان ویسٹ مینجمنٹ کمیٹی نے شہریاں وچ 82700 بیگ ونڈے تے 14329 ٹن آلائشاں چکیاں۔ فیصل آباد وچ 86 ہزار بیگ دتے گئے تے 20382 ٹن آلائشاں چکیاں گئیاں۔ گوجرانوالہ وچ 37 ہزار بیگ ونڈے گئے تے 8562 ٹن آلائشاں تے ویسٹ نوں ڈمپ کیتا گیا۔ سیالکوٹ ویسٹ مینجمنٹ کمپنی نے اک لکھ بیگ ونڈے تے 2950 ٹن آلائشاں ڈمپ کیتیاں گئیاں تے ڈیرہ غازی خان مینجمنٹ کمپنی نے 6 ہزار بیگ ونڈے تے 1234 ٹن آلائشاں اکٹھیاں کر کے ڈسپوزل سائٹس اُتے ڈمپ کیتیاں جد کہ 350 لوکل گورنمنٹس دے عملے نے 93541 ٹن آلائشاں اکٹھیاں کیتیاں تے ایہناں نوں ڈمپ کیتا۔
پنجاب حکومت دی عیدالاضحی اُتے کارکردگی دی عوام الناس مقبول ہوئی تے ’’صاف پنجاب شاباش بزدار ‘‘ ٹویٹر اُتے ٹاپ ٹرینڈ بن گیا۔ شہریاں نے صفائی دے بہترین انتظامات اُتے عثمان بزدار تے ایہناں دی ٹیم دی تعریف کیتی۔ وزیراعلیٰ پنجاب سردار عثمان بزدار نے عیدالاضحی دے موقعے اُتے پورے صوبے وچ صفائی دے شاندار انتظامات اُتے انتظامیہ سالڈ ویسٹ مینجمنٹ کمپنیاں تے لوکل گورنمنٹ دی کارکردگی نوں سراہیا تے ایہناں نوں شاباش دتی۔ صاف ستھرا پنجاب لئی سب نے ٹیم ورک دے طور اُتے کم کیتا۔ سالڈ ویسٹ کمپنیاں تے انتظامیہ نے جذبے، جانفشانی تے محنت نال اپنے فرائض سرانجام دتے۔ سردار عثمان بزدار نے کہیا کہ صفائی دے انتظامات تے ماحول نوں صاف رکھن لئی پوری ٹیم نے متحرک انداز وچ فرائض سرانجام دتے۔ اوہناں نے کہیا کہ صاف ستھرا ماحول صحت مند معاشرے دی علامت اے ۔ وزیراعلیٰ نے کہیا کہ وزیراعظم پاکستان دے ویژن دے تحت سانوں ایسے طرح مل کے کم کردے ہوئے باہمی اتحاد و اخوت تے بھائی چارے نال ملک نوں نہ صرف امن دا گہوارہ بلکہ کلین اینڈ گرین پاکستان بنانا اے۔