چوہدریاں توں انتقام
چوہدری کوئی فوج نہیں جنہاں نال کسے دی لمبی جنگ ہوئے پر بدقسمتی نال سیاستداناں دا اک دوجے اُتے الزام لانا روایت جہی بن گئی اے
تحریر حمیداللہ بھٹی
ایس وچ کوئی دورائے نہیں کہ پاکستان آزاد ملک اے پر قلم قبیلے دے کجھ لوک اختلاف رائے تے تعمیری تنقید دی بجائے تذلیل کرن نوں آزادی دا ناں دیندے نیں جے ایہناں توں جواز یا ثبوت منگے جان تے اوہ جمہوری حق کہہ کے گل ختم کر دیندے نیں پرکیہ واقعی جمہوریت وچ شہریاں یا سیاستداناں دی تذلیل دی آزادی اے میرے سوجھ بوجھ دے مطابق تے ایہہ آزادی اظہار نہیں بلکہ انتقامی صحافت اے جس دا کئی دہائیاں توں چوہدریاں نوں ساہمنا اے تے اوہ انتقام دا شکار نیں ٹھیک اے جواب وچ اوہ مروت تے خاندانی وضع داری دی بنا اُتے چپ رہندے تے بدترین ناقد نال ملدے ہوئے وی ظرف دا مظاہرہ کردے نیں پر قلم دے ذریعے اندر دا زہر صفحیاں اُتے منتقل کرن دے عمل دی حوصلہ شکنی بوہت ضروری اے پر میں فیر وی شریک حیات دے علاوہ کسے دی کسے دے نال شب بسری دی داستان نہیں سناواں گا کیوں جے کم ظرفی دا جواب کم ظرفی نال دینا وی نیچ حرکت اے پر رئوف کلاسرا دے سولہ جولائی نوں روزنامہ دنیا وچ لکھے کالم’’چوہدری کا انتقام‘‘ وچ لکھے تذلیلی پہلو دی درستگی ضروری سمجھنا واں میں حاکمان وقت دا قصیدہ گو نہیں نہ ای کسے نوں فرشتہ ثابت کرن اُتے مامور واں کس نے اپوزیشن دے دناں وچ کھادیاں قسماں توڑیاں یا کمپرو مائز کردے ہوئے یوٹرن لئے مینوں صفائی دین نال کوئی غرض نہیں جس نے جو کیتا تاریخ ایہنوں اُنج ای الفاظ وچ یاد کرے گی میں تے صحافت وچ دَر آن والی وچ تذلیلی خباثت دی حوصلہ شکنی دا فرض انجام دینا اے۔
چوہدری کوئی فوج نہیں جنہاں نال کسے دی لمبی جنگ ہوئے پر بدقسمتی نال سیاستداناں دا اک دوجے اُتے الزام لانا روایت جہی بن گئی اے الزام غلط ثابت ہون اُتے معافی تے دور دی گل ، کوئی شرمندہ وی نہیں ہوندا۔ پنجاب دا سب توں وڈا ڈاکو کہناتے ہتھ نہ ملان دے عزم دی گل دا جواب ایہہ وے کہ اک پاسے جدوں پورے ملک وچ عدم برداشت دا رویہ اے فیر وی پنجاب وچ سیاسی صورتحال کافی بہتر اے ایتھے بلامقابلہ سینیٹر منتخب تے بجٹ وی باآسانی منظور ہو جاندا اے وجہ سیاسی مخالفت دے باوجود اسپیکر دا اپوزیشن لیڈر حمزہ شہباز دی اسمبلی اجلاس وچ شرکت نوں یقینی بنانا اے پرویز مشرف ولوں ناپسندیدگی دے باوجود میاں شریف دی وفات اُتے پرسہ دینا تے موجود حکومت دے نہ چاہندے ہوئے وی کلثوم نواز تے شمیم شریف دی وفات اُتے تعزیت کرنا اے نواز شریف دے شدید بیمار ہون دی خبراں آندیاں نیں تے حکمران اتحاد وچ سابق وزیر اعظم دی بیرون ملک روانگی دے حق وچ سب توں پہلی تے طاقتور اواز چوہدری شجاعت حسین دی ہوندی اے ایہہ وے وضع داری، رواداری تے برداشت جس دی ملک وچ کمی ہوندی جا رہی اے ۔ جے مولانا فضل الرحمن اسلام آباد وچ دھرنا دیندے نیں تے چوہدری شجاعت حسین تے چوہدری پرویز الٰہی دھرنا ختم کرن بارے گھر جاکے مذاکرات کردے نیں اوہناں نے سیاسی اختلاف نوں کدی دشمنی دے قالب وچ نہیں ڈھالیا بلکہ سنجیدہ تے اصولی سیاست کیتی اے۔ ایس لئی ایہناں دی عزت اے حالانکہ سنجیدہ تے اصولی سیاست کمزوری نہیں فیر کیوں بے سروپا تنقید دے ذریعے چوہدریاں توں انتقام لیا جا رہیا اے۔
چوہدری پرویز الٰہی دے خلاف نیب مقدمے ختم کرن وچ وزیراعظم دے کردار دی گل کرن والے ایہہ کیوں بھُل جاندے نیں کہ خان صاحب اینے ای سیاہ و سفید دے مالک نیں تے الیکشن کمیشن توں عطیات دی مد وچ بیرون ملک توں رقماں دی ترسیل دا کیس کیوں ختم نہیں کر سکے؟ صدارتی ریفرنس عدالت کیوں رد کر دیندی اے؟ وزیراعظم دی تنقید دے باوجود ادارے اپنی روش تبدیل کیوں نہیں کردے؟ گل اصل وچ ایہہ وے کہ چوہدریاں دے خلاف دو دہائیاں توں نیب متحرک اے کدی اثاثے چیک کیتے جاندے نیں تے کدی گھراں دی تعمیر دے اخراجات دی جانچ پڑتال کیتی جاندی اے حتیٰ کہ باتھ روم وچ لگی پانی دی ٹوٹیاں (نل) دی قیمت سینٹری سٹوراں توں پتہ کیتی جاندی اے ایہہ بدترین انتقام اے پر چوہدری ورھیاں توں ایس انتقام دا ساہمنا کر رہے نیں جے ایہہ کیس سچے ہوندے تے مسلم لیگ ن اپنی حکومت دے دوران کدوں دی چوہدریاں نوں پابند سلاسل کر چکی ہوندی جتھے حمزہ شہباز دے کہن اُتے پولیس دے ذریعے چوہدری مونس الٰہی دا کاروبار محدود کرن دیاں کاروائیاں ہوئیاں دکانداراں نوں پرائما دودھ رکھن دی صورت وچ جیل جان دیاں دھمکیاں نال زمانہ آشنا اے پر جنہاں توں جانے کیوں روف کلاسرا لاعلم نیں اوہ بھئی صحافی تے بوہت باخبر ہوندا اے دو دہائیاں توں چلن والے کیساں نے اج نہیں تے کل ختم ای ہونا سی کوئی کیس ہمیشہ تے جاری نہیں رہ سکدا اُنج وی جے چوہدریاں نے کیس ختم کران لئی دبائو ای پانا سی تے بہترین موقع پرویز مشرف دور سی جدوں چوہدری پرویز الٰہی وزیراعلیٰ تے پرویز مشرف دی اکھ دا تارا سن موجودہ دور حکومت اختیارات دے حوالے نال بوہت کمزور اے نیب، الیکشن کمیشن تے عدالتاں جدوں وزیراں دی سرزنش کردے ہوئے کوئی لحاظ نہیں کردیاں تے کوئی چوہدریاں دی گھٹا مدد کر سکدا اے؟
چوہدری مونس الٰہی وچ خدمت دا جذبہ اے پر اوہ جدوں سیاست وچ آئے نیں ایہناں نوں کسے نہ کسے حوالے نال تنقید دا ساہمنا اے جسٹس افتخار چوہدری نوں چوہدری پرویز الٰہی اُتے غصہ سی کہ اوہ پرویز مشرف دے ہتھ کیوں پکے کر رہے نیں افتخار چوہدری نے حمایت لئی اک توں ودھ وار آپ تے مختلف ذرائع نال رابطے وی کیتے پر چوہدریاں نال گل نہ بنی وجہ چوہدری کسے نوں ڈبل کراس نہیں کردے صاف گو لوک نیں ایہہ خوشی یا غصہ لُکاای نہیں سکدے ۔ چوہدریاں نوں بدنام کرن لئی ایہناں دے ہونہار سپوت چوہدری مونس الٰہی اُتے این آئی سی ایل کیس بنوایا گیا جدوں ایہہ کیس بنیا اودوں چوہدری مونس الٰہی برطانیہ مقیم سن تے ایہہ کہ پاکستان تے برطانیہ دے وچکار ملزمان دی حوالگی دا کوئی معاہدہ نہیں سی فیر وی چوہدری مونس الٰہی واپس و طن آئے گرفتاری تے کیس دا ساہمنا کیتا جسٹس افتخار چوہدری نے چیف جسٹس لہور ہائیکورٹ جسٹس اعجاز چوہدری نوں چوہدری مونس الٰہی دی ضمانت نہ ہون دا ٹاسک دے رکھیا سی جس دا ایہناں دی اہلیہ شبنم چوہدری نے نجی محفل وچ پاکستانی نژاد نارویجن نال اظہار وی کیتا پر من گھڑت کیس نوں کددوں تیکر التوا وچ رکھیا جاندا آخر کار چوہدری مونس الٰہی سرخرو ہوئے۔
جتھوں تیکر چوہدری مونس الٰہی دے وفاقی وزیر بنن دا تعلق اے تے ایس اُتے کجھ لوکاں دے پیٹ وچ مروڑ اٹھدا اے ایہہ لوک اصل وچ کسے نوں کامیاب ہوندا ویکھ ای نہیں سکدے موجود ہ حکومت دی مدت ای دو ورہے رہ گئی اے انج کوئی کیونکر وزارت دی خواہش کر سکدا اے چوہدری مونس الٰہی نوں تے وزارت دی ہوس ای نہیں حلف چکدے ای بیرون ملک روانگی بے نیازی دی دلیل اے۔ اصل وچ اتحاد کردے ویلے جھوٹ بول سکدے نیں پر اک باکردار تے خدمت خلق دے جذبے نال سرشار دلیر نوجوان چوہدری مونس الٰہی دے اُجلے کردار نوں داغدار بنانا مذموم حرکت اے جیہڑا چوہدریاں توں انتقام دی مہم دے حصے دے سوا کجھ نہیں۔
ملک وچ ہلے گلے تے شور شرابے دے دلدادہ لوکاں نوں سیاسی استحکام بے چین کر دیندا اے اتحادی اک دوجے دے گریبان نو چن، لٹھ لے کے سیاستدان اک دوجے اُتے حملے کرن دنگا و فساد ہوئے تے ایہہ لوک خوش رہندے نیں اک سوال پچھن دی جسارت کرنا واں جے محمد خان جونیجو صدر دے مالی یا کک دی مدت ملازمت وچ توسیع کر دیندے تے ملک دا کیہ نقصان ہوندا؟ جتھے تیکر وزیر خارجہ یعقوب علی خان دی سکبدوشی نوں صدر ضیا الحق نال جوڑن دی کوشش اے ایس وچ رتی برابر صداقت نہیں بلکہ استعفیٰ طلب کرن دے پس پردہ افغان معاملے سن جنہاں توں وزیراعظم تے صدر دے وچکار ناخوشگوار حالات نے جنم لیا وزیراعظم نے اک دووار یعقوب علی خان توں شکوہ وی کیتا جدوں روش تبدیل نہ کیتی تے کابینہ توں باہر کر دتا گیا پر شکر اے ایس گل نوں وی چوہدریاں دے کھاتے وچ شمار نہیں کیتا گیا نہیں تے شرفا نوں بدنام کرن لئی جھوٹے لوک کجھ وی کر سکدے نیں لوڑ ایس امر دی اے کہ چوہدریاں توں انتقام دی روش اُتے چلن دی بجائے دلیل تے اخلاق گل کریئے تے مسائل اُاجاگر کرن والے قلم نوں انتقام لین دا ذریعہ نہ بنایا جائے گا۔
