بارش نے مسلم لیگ ن نوں دھو چھڈیا
محمد آصف بھلّی
صوبائی اسمبلی دے حلقہ پی پی 38 سیالکوٹ دے ضمنی انتخاب وچ تحریک انصاف دے امیدوار احسن سلیم بریار مسلم لیگ ن دے امیدوار طارق سبحانی دے مقابلے وچ کامیاب ہو گئے نیں۔ تحریک انصاف دے امید وار نے 62657 ووٹ حاصل کیتے جد کہ مسلم لیگ ن دے امیدوار نوں 56353 ووٹ ملے۔ میرا تعلق وی چونکہ ایسے حلقے نال اے ایس لئی کالم دے آغاز وچ ای میں ایہہ واضح کر دیواں کہ میرا تے میرے خاندان دا ووٹ مسلم لیگ ن دے حق وچ استعمال ہویا پر میں غیر جانبداری نال ایہہ تجزیہ کراں گا کہ مسلم لیگ ن دے امیدوار تے ضلع سیالکوٹ دے مشہور سیاسی خاندان نال تعلق رکھن والے طارق سبحانی نوں شکست دا سامنا کیوں کرنا پیا۔ تے ایہہ شکست وی اک انج دے امیدوار احسن سلیم بریار دے مقابلے وچ ہوئی جنہاں دا کوئی ووٹ بینک ایس حلقے وچ نہیں سی۔
عمر دے اعتبار نال وی ویکھیا جائے تے آپ احسن سلیم بریار نوں اک ناپختہ کار، نابالغ تےنا تجربہ کار سیاست دان کہہ سکدے آں۔ سیاست دے میدان وچ اک نووارد تے اک نوخیز سیاسی کارکن دی سیاست وچ منجھے ہوئے تے سیاست دا طویل ترین تجربہ رکھن والے سیاسی خاندان دے امیدوار نوں شکست دینا کوئی معمولی گل نہیں۔ احسن سلیم بریار دے چچا 2002ء دے عام انتخابات وچ رکن صوبائی اسمبلی منتخب ہوئے سن۔ ایس دے بعد 2018, 2013, 2008 دے عام انتخابات وچ تحصیل ڈسکہ توں احسن سلیم بریار دے خاندان توں جس وی بندے نے حصہ لیا اوہ کامیاب نہیں ہو سکیا۔ پر اپنے حلقے توں بار بار ناکام ہون دے باوجود حلقہ پی پی 38 سیالکوٹ توں بریار خاندان نوں کامیابی کنج نصیب ہوئی جد کہ بریار فیملی ایس حلقے لئی تے ایہہ حلقہ ایہناں لئی یکسر اجنبی سی۔
احسن سلیم بریار تے ایس دا خاندان 3 مہینے پہلے تیکر تحریک انصاف لئی وی اجنبی سی۔ سلیم بریار جو احسن سلیم بریار دے والد نیں تے ایہناں دا پورا خاندان مسلم لیگ ق وچ سی۔ 2018 ء دے عام انتخابات وچ سلیم بریار تے ایہناں دا اک پتر آزاد امیدوار دے طور اُتے تحریک انصاف تے مسلم لیگ ن دے مقابلے وچ وی قسمت ازما چکیا سی پر اوہ کجھ ہزار ووٹ ای حاصل کر سکے سن۔
فیر سوال ایہہ پیدا ہوندا اے کہ اک نویں جماعت وچ شمولیت دے بعد جس دے کارکناں نال بریار فیملی دی کوئی ذہنی ہم آہنگی وی نہیں سی تے اک نواں حلقہ جس وچ احسن سلیم بریار تے ایہناں دے خاندان دا کوئی ووٹ بینک وی نہیں سی اوہ مسلم لیگ ن توں نشست کھوہ لین وچ کامیاب کنج ہو گئے۔ حلقہ پی پی 38سیالکوٹ قومی اسمبلی دے جس حلقے وچ شامل اے اوتھے ارمغان سبحانی قومی اسمبلی دے ممبر نیں۔ تے حلقہ 38 سیالکوٹ دی نشست وی خوش اختر سبحانی دی وفات پاروں خالی ہوئی۔ پر طارق سبحانی جیہڑے مسلم لیگ ن ضلع سیالکوٹ دے صدر وی نیں فیر وی اپنے وڈے بھرا دی چھڈی ہوئی نشست اُتے ضمنی انتخابات وچ ہار گئے۔ مسلم لیگ ن اج وی اک مقبول ترین سیاسی جماعت اے تے مسلم لیگ ن دے ووٹ بینک توں وی انکار نہیں کیتا جا سکدا۔ ایس لئی میرا تجزیہ کجھ انج اے کہ سارے تر موافق تے ساز گار حالات دے باوجود طارق سبحانی دی شکست دی پہلی تے بنیادی وجہ ایہہ وے کہ ارمغان سبحانی تے طارق سبحانی نے انتخابی مہم دے پہلے دن توں لے کے آخری دن تیکر اپنے حریف نوں اینا کمزور تے شاید ادنیٰ وی سمجھ لیا کہ خود نوں ناقابل تسخیر سمجھ بیٹھے۔ سیاست وچ ایہہ گل ای خطرناک روش اے کہ جدوں انتخاب دا میدان سجیا ہوئے تے اک امیدوار ایس گھمنڈ یا خام خیالی دا شکار ہو جائے کہ ایس دے مدمقابل امیدوار دی اوقات ای کیہ اے کہ اوہ ایہنوں انتخاب وچ شکست دے سکے۔ انتخابات وچ کمزور توں کمزور مدمقابل امیدوار دے بارے وچ وی ایہہ رائے نہیں رکھنی چاہیدی کہ اوہ میرا کجھ وگاڑ نہیں سکدا۔ ایس غلط فہمی دا شکار ہون والا امیدوار اپنی انتخابی مہم وچ اُنج دی محنت ہر گز نہیں کردا جیہڑی کامیابی لئی مطلوب ہوندی اے۔ اک خاص طرح دے گھمنڈ دی کیفیت وچ مبتلا ویکھ کے وریو خاندان دے قریبی ساتھی وی ایہناں توں وکھرے ہو گئے تے اوہ تحریک انصاف دے امیدوار احسن سلیم بریار دی حمایت وچ بڑے زور و شور نال میدان وچ نکل آئے۔ میں حلقہ پی پی 38 سیالکوٹ وچ مسلم لیگ ن نوں ناکام نہیں سمجھدا بلکہ وریو خاندان دی اپنی ناکام حکمت عملی تے غلط اندازیاں دا خمیازہ مسلم لیگ ن نوں بھگتنا پیا ۔ جے طارق سبحانی تے ممبر قومی اسمبلی ارمغان سبحانی ایس غلط فہمی تے خام خیالی دا شکار نہ ہوندے کہ احسن سلیم بریار اک کمزور ترین امیدوار اے تے ایہناں دی انتخابی مہم یقینی طور اُتے بوہت بہتر تے مختلف ہوندی۔ سیاست وچ ناکامی تے نامرادی کدی کدی مقدر بن جاندی اے پر ایس وار وریو خاندان نے اپنی ناکامی تے احسن بریار دی کامیابی دا آپ اہتمام کیتا اے۔ طارق سبحانی مسلم لیگ ن ضلع سیالکوٹ دے صدر وی نیں پر مسلم لیگ ن دی تنظیم سازی تے مسلم لیگ ن نوں اک فعال جماعت بنان وچ ایہناں دا کوئی کردار نہیں۔ ایس دے برعکس تحریک انصاف نوں داد دینی پئے گی کہ ایس جماعت دے سارے عہدیداران تے کارکناں نے بریار خاندان نوں تحریک انصاف وچ نووار ہون دے باوجود الیکشن وچ کامیاب کروان لئی کوئی کسر باقی نہ چھڈی۔ مسلم لیگ ن دی مرکزی قیادت لئی ایس ضمنی انتخاب دا ایہہ وی اک سبق اے کہ ایم این اے تے ایم پی اے نوں ترجیح دین دے بجائے جماعت نوں طاقت ور تے فعال بنانا زیادہ اہم اے بریار فیملی نے ضمنی انتخاب وچ اپنی دولت دا وی بے دریغ استعمال کیتا اے۔
پاکستان وچ جے آئیڈیل سیاست ہوئے فیر تے ووٹراں دی خرید و فروخت اک مستحسن گل نہیں میں ذاتی طور اُتے سیاست وچ دولت دے استعمال نوں انتہائی ناپسندیدہ عمل سمجھنا واں پر ساڈے کول عملی صورتحال ایس دے برعکس اے۔ سیالکوٹ دے حالیہ ضمنی انتخاب وچ بریار فیملی نے کامیابی لئی اپنی دولت دا ہر طرح استعمال کیتا۔ ووٹ وی خریدے گئے۔ ترقیاتی کماں لئی اپنے سرمائے نوں وی سلیم بریار نے دل کھول کے استعمال کیتا۔ اوہ الیکشن وچ کامیابی چاہندے سن چاہے ایس دی کوئی وی قیمت ادا کرنی پئے۔
انج محسوس ہوندا سی کہ سلیم بریار فیملی نے ایہہ فیصلہ کر لیا سی کہ ایہناں دی ساری دولت وی خرچ ہو جائے پر ایہناں لئی الیکشن وچ شکست قابل قبول نہیں سی۔ دوجے پاسے وریو خاندان دا طرز عمل ایہہ سی کہ عوام ایہناں نوں ووٹ وی دین تے ایہناں دے مالدار سپورٹر انتخابی اخراجات وی آپ ای برداشت کرن۔ کجھ واقفانِ حال تے ایہہ وی دسدے نیں کہ پاکستان دی سیاست وچ جنہاں خانداناں دی اجارہ داری قائم ہو چکی اے تے جیہڑے سیاسی خاندان ایہہ خیال رکھدے نیں کہ سانوں الیکشن وچ شکست کون دے سکدا اے اوہ انتخابات وچ اپنی دولت استعمال نہیں کردے بلکہ جدوں وی انتخابات آندے نیں انج دے سیاسی خانداناں نوں ایہناں دے انویسٹر اینی دولت فنڈز دی صورت وچ مہیا کر دیندے نیں کہ اوہ الیکشن وچ کجھ خرچ کرن دے بعد اپنے لئے وی اک وڈی رقم بچا لیندے نیں۔ احسن بریار نوں اک ہور وی مدد حاصل سی کہ ایس دے سسر ایس ویلے وزیراعلیٰ پنجاب بزدار دے پرسنل سیکرٹری نیں ایہناں دے اثر و رسوخ دی وجہ نال انج دے سرکاری افسر تے اہل کار جنہاں نوں تبادلیاں تے چنگی تقرریاں لئی اعلیٰ ترین سفارش دی ہر لمحہ لوڑ رہندی اے تے حلقہ پی پی 38 دے ووٹر وی نیں اوہ سب ووٹ تقریباً احسن بریار دی جھولی وچ پا دتے گئے۔ حلقہ پی پی 38 سیالکوٹ مکمل طور اُتے پنڈاں اُتے مشتمل اے۔ پچھلے دوسال توں مسلم لیگ ن حزب اختلاف وچ اے تے ساڈا سیاسی کلچر ایہہ وے کہ اپوزیشن دے ممبران اسمبلی جے چاہن وی تے اوہ اپنے حلقیاں وچ کوئی ترقیاتی کم نہیں کروا سکدے۔ جدوںاوہ حلقہ پی پی 38 سیالکوٹ دے پنڈاں وچ ایہہ پیغام پورے زور و شور دے نال اپڑیا کہ وریو فیملی تے ارمغان سبحانی دی صورت وچ ایم این اے ہون دے باوجود اک دھیلے دا کم پنڈاں وچ نہیں کروا سکدے تے اسیں فوری طور اُتے ترقیاتی کم عملاً شروع کروا سکنے آں تے فیر انج کر کے وکھا وی دتا گیا تے ایہناں سرگرمیاں نال وی احسن بریار نوں کامیابی وچ مدد ملی۔ میں اک وار فیر ڈنکے دی چوٹ اُتے آکھ سکنا واں کہ میں احسن بریار دے خلاف ووٹ دتا اے پر محبت وچ تے جنگ وچ سب کجھ جائز اے کہ اصول نوں ساہمنے رکھ کے جے بریار فیملی الیکشن وچ نہ اتردی، دولت دا کھلا استعمال وی جے نہ ہوندا، وزیراعلیٰ دے پرنسپل سیکرٹری دیاں دعاواں تے عملی مدد احسن بریار نوں حاصل نہ ہوندی تے سب توں بنیادی گل ایہہ کہ وریو خاندان جے ایس گھمنڈ دا شکار نہ ہوندا کہ احسن بریار دی کیہ حیثیت اے کہ اوہ طارق سبحانی نوں شکست دے سکدا اے تے سیالکوٹ دے ضمنی الیکشن دا نتیجہ مختلف ہوندا۔ میرے اک دوست دا کہنا اے کہ 28 جولائی 2021 نوں سارا دن بارش ہوندی رہی ایس لئی وی مسلم لیگ ن دے امیدوار طارق سبحانی الیکشن ہر گیا۔ مینوں ایس منطق نال اتفاق نہیں کہ بارش نے مسلم لیگ ن نوں دھو چھڈیا۔مسلم لیگ ن اج وی اک مقبول جماعت اے۔ لوڑ ایس گل دی اے کہ سیالکوٹ دے ضمنی انتخابات وچ طارق سبحانی دی شکست دا صحیح تجزیہ کرنا چاہیدا اے۔ اپنی خامیاں تے کمزوریاں دا جائزہ لینا چاہیدا اے۔ حکومت تے اپنے امیدوار نوں کامیاب کروان لئی منفی ہتھکنڈے وی استعمال کردی اے پر پی ٹی آئی حکومت نے زیادہ ضمنی انتخابات ہارے نیں۔ ڈسکہ وچ نوشین افتخار دی حکمت عملی درست سی اوہ ساری مشکلاں نوں عبور کر کے الیکشن وچ کامیاب ہوئیاں۔ پی پی 38 وچ مختلف کیتا سی کہ طارق سبحانی ہر گیا۔
