کرونا دی چوتھی لہر تے گجر دا پیغام

بلوچستان تے سندھ وچ ایس ویلے کرونا دے مریضاں دی تعداد دن بدن ودھدی جا رہی اے تے شرع اموات وچ وی وادھا ہوندا جا رہیا اے

روہیل اکبر

پاکستان وچ کرونا دی صورت حال نوں حکومت نے بڑے احسن طریقے نال کنٹرول کیتا سی خاص کر پنجاب حکومت نے ایس موذی مرض دے پھیلائو نوں جس احسن طریقے نال قابو کیتا سی شاید ای کسے ہور صوبے نے ایس طرح کیتا ہوئے اج کرونا دی چوتھی لہر اے تے ایہہ سب توں زیادہ خطرناک وی اے ایس توں پہلاں وی بیماریاں سن خاص کر ساڈی عمر دے لوک بخوبی سمجھدے ہون گے کہ بچپن وچ اسیں پولیو تے چیچک دے مریض ویکھیا کردے سی ہر پنڈ وچ نہیں تے دوجے پنڈاں وچ اک یا دو بندے پولیو دے موجود ہوندے سن ویلے نے پلٹا کھادا ایہناں مرضاں دی ویکسین آئی تے فیر ویکھدے ای ویکھدے ایہہ موذی امراض ساڈی جان چھڈ گئے پر ایس لئی بوہت سارے ورکراں نے قربانیاں دتیاں ہجے وی کے پی کے تے بلوچستان وچ پولیو دے قطرے پلان والیاں ساڈی ماواں تے بھیناں شہید کیتیاں جا رہیاں نیں کجھ ناسمجھ تے بیوقوف انسان ایہناں قطریاں نوں زہر قاتل سمجھدے نیں جتھے جہالت دا ایہہ حال ہوئے گا اوتھے ترقی خاک ہوئے گی پر اللہ تعالیٰ دا شکر اے کہ اج پولیو، ٹی بی تے چیچک سنے متعدد بیماریاں تقریباً ختم ہو چکیاں نیں اسیں ایس ویلے کرونا دی چوتھی لہر توں لنگھ رہے آں۔کجھ لوک کرونا تے کرونا ویکسین نوں ہجے تیکر اک سازش ای سمجھ رہے نیں جنہاں نے ویکسین نہیں لگوائی اوہ اپنے آپ نوں خوش قسمت تصور کر رہے نیں تے جنہاں نے لگوا لئی اے ایہناں ول کجھ لوک بڑی عجیب نظراں نال ویکھدے نیں کسے نے افواہ پھیلائی کہ ویکسین لگوان والے صرف دو ورہے ای زندہ رہن گے جد کہ کجھ دا خیال اے کہ ایہہ بندے صرف 6 مہینے ای کڈن گے ایہہ لوک وی اوہ ای نیں جیہڑے پولیو دے قطریاں دے خلاف سن ہن چہرہ بدل کے فیر ساہمنے آ گئے نیں پولیو ویکسین لانا ہر بندے لئی ضروری اے اودوں ای اسیں ایس موذی مرض توں چھٹکارا حاصل کر سکنے آں نہیں تے کرونا دی پہلی تے دوجی لہر دے جیہڑے اثرات اسیں کیہ پوری دنیا نے بھگتے نیں اوہ سب دے اگے نیں۔ بھارت وچ تے شمشان گھاٹاں اُتے تھاں ختم ہو گئی سی تے لوکاں نے اپنے پیاریاں نوں دریائواں وچ سٹنا شروع کر دتا سی ، انڈونیشیا تے بنگلہ دیش وچ وی حالات بوہت خراب نیں، بھارت وچ کرونا صورتحال وی سب دے ساہمنے اے۔ ملائیشیا ، تھائی لینڈ سنے مشرقی ایشیا وچ کرونا وبا ودھدی جا رہی اے پاکستان وچ ہجے تیکر 3 کروڑ توں ودھ کرونا ویکسی نیشن ہوئی اے جنہاں لوکاں نے کرونا ویکسین نہیں لگوائی اوہ فوری ویکسی نیشن کران کرونا دی چوتھی لہر دا ہسپتالاں اُتے دبائو ودھ رہیا اے، ایبٹ آباد، اسلام آباد دے ہسپتالاں اُتے وی کرونا کیسز دا دبائو اے۔ بلوچستان تے سندھ وچ ایس ویلے کرونا دے مریضاں دی تعداد دن بدن ودھدی جا رہی اے تے شرع اموات وچ وی وادھا ہوندا جا رہیا اے۔ سندھ حکومت نے اوتھے تے لاک ڈائون لا دتا اے دوجے صوبیاں والے لوک ہجے توں احتیاط شروع کر دین کرونا ویکسی نیشن کران نال ای اسیں چوتھی لہر توں نکل سکاں گے حکومت نے ارباں روپئے دی ویکسین منگوائی ہوئی اے مختلف تھاواں اُتے سینٹرز بنائے گئے نیں ماسک پائو تے سماجی فاصلے دا خیال رکھو۔ وفاقی حکومت ویکسین خریداری اُتے 2 ارب مزید خرچ کرن جا رہی اے۔ 3 ہزار موبائل یونٹس لوکاں نوں گھر گھر جا کے ویکسی نیشن کر رہے نیں پاکستان نے جیہڑی کامیابی حاصل کیتی اوہ وڈے توں وڈے ملک نہیں کر سکے تے ایس سلسلے وچ پنجاب حکومت نے بوہت ساری کامیابیاں حاصل کیتیاں ہن وی پنجاب حکومت نے کرونا دی چوتھی لہر نال نمبڑن لئی کانٹی جنسی پلان تیار کرن دا فیصلہ کیتا اے خاص کر سیکرٹری صحت دیاں کاوشاں لائق تحسین نیں جنہاں دی دن رات دی محنت کم کر رہی اے کہ اسیں ہجے تیکر لاک ڈائون جہی صورتحال توں بچے ہوئے آں تے ایس ویلے ایہناں دیاں کوششاں نال پنجاب دے ہسپتالاں دے سارے انتظام مکمل نیں جے خدانخواستہ کوئی ایمرجنسی والی صورتحال پیدا ہوندی اے تے ایس لئی پنجاب وچ محکمہ صحت دا عملہ مکمل طور اُتے تیار اے ایس ویلے پورے ملک وچ صرف اک دن دے اندر 62 بندے انتقال کر گئے ایس طرح مجموعی موتاں دی تعداد 23 ہزار 422 تیکر اپڑ گئی جد کہ مثبت کیساں دی شرح 8 اعشاریہ اٹھ دو فیصد ریکارڈ کیتی گئی۔ مجموعی کیساں دی تعداد 10 لکھ 34 ہزار 837 ہو گئی۔ کرونا دے ایکٹوکیساں دی تعداد 69 ہزار 756 اے تازہ اعداد و شمار دے مطابق پنجاب وچ 3 لکھ 56ہزار 920، سندھ وچ 3 لکھ 82 ہزار 865 کیس، خیبر پختونخوا اک لکھ 44 ہزار 264 تے بلوچستان وچ 30 ہزار 432 کیس رپورٹ ہوئے نیں۔
اسلام آباد 87 ہزار 699، گلگت بلتستان وچ 8 ہزار 156 کیس، تے آزاد کشمیر وچ کرونا مریضاں دی تعداد 24 ہزار 501 ہو گئی اے ایس تعداد نوں مزید ودھن توں روکن لئی سانوں سب نوں ویکسین لگوان دی بوہت لوڑ اے تے ایس سلسلے وچ حکومت وی شہریاں نوں کرونا دی چوتھی لہر توں بچان لئی ہر ممکن اقدامات چک رہی اے شہریاں دی حفاظت لئی حکومت نے گائیڈ لائنز جاری کر رکھی اے، حکومتی ہدایات اُتے عمل شہریاں دے مفاد وچ اے، ایس او پیز اُتے عمل کر کے شہری نہ صرف اپنے آپ نوں کرونا توں محفوظ رہ سکدے نیں بلکہ دوجیاں نوں وی محفوظ بنا سکدے نیں کرونا توں بچائو لئی ویکسین لگوانا سب توں موثر اے۔ کرونا دی چوتھی لہر پاروں مریضاں دی تعداد وچ وادھا ہو رہیا اے، خدانخواستہ کرونا دے مثبت کیساں دی شرح وچ وادھا ہویا تے اک وار فیر اسمارٹ لاک ڈائون لگ سکدا اے۔ پابندیاں توں بچن لئی شہریاں نوں احتیاط دا دامن ہتھ توں نہیں چھڈنا چاہیدا، کرونا دی موجودہ صورتحال پاروں شہریاں نوں سنجیدگی وکھانا ہوئے گی میری وی شہریاں نال اپیل اے کہ اوہ ماسک دا استعمال کرن تے سماجی فاصلے برقرار رکھن، ہر اک نوں ذمہ داری دا مظاہرہ کرنا ہوئے گا، عوام دیاں زندگیاں دے تحفظ لئی ہر ضروری اقدام چکیا جائے گا آخر وچ ساڈے اک دوست شاکر عمر گجر جیہڑے ڈیری اینڈ کیٹل فارمرز ایسوسی ایشن پاکستان دے صدر نیں دا مختصر پیغام جیہڑا ہر پہلوان لئی اہم اے میں سمجھ رہیا سی کہ میں بھینس دا خالص دودھ پینا واں تے کرونا ساڈا کجھ نہیں وگاڑ سکدا پر ایہہ جھوٹ سی مورخہ 14 جولائی نوں مینوں کرونا وائرس دا شدید ترین اٹیک ہویا تے محسوس ہویا ایہہ مذاق نہیں موت نوں انتہائی نیڑے توں ویکھیا جدوں آکسیجن 38 تے 40 اُتے چلی گئی تے ادراک ہویا کہ ایہہ ویلے دی خطرناک ترین وبا اے۔ پھپھڑیاں نے ایہہ باور کرایا کہ اسیں کجھ وی نہیں تے حکومت وقت ساڈے لئی بہترین اقدامات کر رہی اے تے ایہو سوچیا کہ میں اپنے ڈیری فارمز بھراواں نوں پیغام دیواں کہ گھٹ توں گھٹ اپنی فیملی لئی اپنے وطن لئی ویکسین کرائو آپ وی محفوظ رہو تے اپنے پیاریاں نوں وی محفوظ کرو ساڈی حکومت نے سارے اقدامات ویلے توں پہلاں کیتے تے انڈیا جہے حالات پیدا نہیں ہون دتے گئے تے یقین جانو میرے بھرائو، انتہائی دور رس نتیجے دے حامل رہے آں میں وی ایس کڑے ویلے توں لنگھیا واں تے ای سمجھیا واں خدارا ویکسین کرائو میرے سارے فارمز بھرا ویکسین کرائو اپنے پیاریاں نوں محفوظ بنائو۔