بھارت نے وادی جنت نظیر نوں دنیا دی سب توں وڈی انسانی جیل بنا دتا
رابعہ عظمت
ہندوستان نے پاکستان دے خلاف ہائبرڈ جنگ نوں ودھان لئی 2014 وچ اجیت ڈوول ڈاکٹرائن نوں باضابطہ طور اُتے متعارف کرایا مقبوضہ جموں و کشمیر پچھلے 2 ورہے توں مکمل محاصرے وچ اے۔ ماورائے عدالت قتل عام جاری اے۔ انسانی حقوق پامال کیتے جا رہے نیں۔ دنیا ہن ایس امر توں بخوبی آگاہ اے کہ بھارت نے بدترین کرفیو لا کے جموں و کشمیر نوں نازل عقوبت خانہ وچ تبدیل کیتا ہویا اے۔ لکھاں کشمیری تعلیم صحت تے دیگر بنیادی سہولتاں توں محروم گھراں وچ مقید نیں۔ کرونا، نوں جواز بنا کے بچی کچھی رعایتاں نوں وی سلب کر لیا گیا اے۔بھارتی فوج دے مظالم دا اندازہ ایس امر توں وی لایا جا سکدا اے کہ صرف 6 مہینے وچ 200 توں ودھ نہتے کشمیریاں نوں شہید جد کہ اک ہزار دے لگ بھگ بندیاں نوں اذیت دا نشانہ بناندے ہوئے سخت جسمانی سزائواں دتیاں گئیاں۔ کشمیریاں دی اکثریت نوں ختم کرن لئی صہیونیاں دی طرز اُتے ہنددو بستیاں تعمیر کرن لئی صہیونیاں دی طرز اُتے ہندو بستیاں تعمیر کیتیاں جا رہیاں نیں جموں و کشمیر وچ سارے اعلیٰ سرکاری عہدیاں اُتے ہندوئواں نوں تعینات کر دتا گیا اے۔ نریندر مودی دی جارحیت تے درندگی نال مقبوضہ کشمیر وچ باغ اجڑ گئے، سیاحت برباد ہو گئی آبادی دا بے پناہ مالی نقصان ہویا۔ 50 فیصد توں ودھ صنعت بند ہو گئی، ایتھے ایہہ وی قابل غور امر اے کہ 5 اگست 2019 نوں بھارتی حکومت نے آئین وچ کشمیر نوں دتی گئی خصوصی حیثیت ختم کر کے ایہنوں وفاقی اکائیاں وچ تبدیل کر دتا سی ایس اقدام نال مقبوضہ کشمیر وچ بھارتی شہریاں دے املاک خریدن، نوکریاں حاصل کرن تے مقامی خواتین نال شادی کرن دی راہ ہموار ہو گئی اے۔ بھارتی فوج نے کشمیر نوں اک وڈے، عقوبت خانے، وچ تبدیل کر رکھیا اے جتھے بنیادی سہولتاں دی فراہمی بند کر کے ظلم و ستم دے پہاڑ توڑے جا رہے نیں۔ عید ہوئے یا کوئی اسلامی یا ریاستی تہوار ایہناں موقعیاں اُتے بھارتی ظلم و ستم دا ودھ جانا معمول دی گل اے۔ پیلٹ گناں دے استعمال نال سینکڑے بندیاں دی بینائی ختم کر دتی گئی گولہ باری نال سکولاں دیاں عمارتاں تباہ ہو گئیاں۔ مقام افسوس اے کہ بیشتر مسلم ملک کشمیریاں اُتے بھارتی ظلم و ستم بند کران دے بجائے مودی نال سیاسی، ثقافتی تے معاشی پینگاں ودھان وچ مصروف نیں۔ سابق امریکی صدر ٹرمپ نے ثالثی دے بارے وچ گل تے کیتی سی پر عملاً ایس سلسلے وچ مودی اُتے کسے قسم دا دبائو نہیں پایا گیا۔ بھارت اپنے جنگی جنون تے جارحیت دے نویں ریکارڈ قائم کر رہیا اے۔ جویں جویں وقت تیزی دے نال لنگھ رہیا اے اونج ای ہندو انتہا پسندانہ تے دہشت گردانہ عزائم بے نقاب ہوندے جا رہے نیں۔ پاکستان ولوں مذاکرات دے ذریعے مسئلہ کشمیر دے حل دیاں کوششاں نوں پی جے پی حکومت نے اپنی ہٹ دھرمی پاروں ناکام کیتا تے ہمیشہ راہ فرار اختیار کردے ہوئے ناجائز قبضے نوں طوالت بخشی اے۔ مقبوضہ کشمیردی آبادی نوں ہراساں کرن لئی اجتماعی جنسی زیادتیاں دے قاعات خوفناک حد تیکر ودھ رہے نیں۔ بھارت اپنے جنگی جنون تے جارحیت لئی نویں ریکارڈ قائم کر رہیا اے۔ ایل او سی اُتے ہون والی اشتعال انگیزی تے مقبوضہ کشمیر وچ نوجواناں نوں جعلی مقابلیاں وچ شہید کرن دے ودھدے ہوئے واقعے افسوسناک نیں۔ اقوام متحدہ نوں چاہیدا اے مقبوضہ کشمیر توں بھارتی ظلم و ستم نوں فوری روکن لئی ہنگامی بنیادی اُتے اقدامات کرے تاکہ خطے وچ قیام امن دا خواب شرمندہ تعبیر ہو سکے۔ کشمیریاں دیاں شہادتاں اقوام عالم نال سوال کردیاں یں کہ کیہ کشمیری انسان نہیں؟ کیہ ایہناں دے بنیادی حقوق نہیں؟ کیہ حق خودارایت کشمیریاں دا مسئلہ حق نہیں جیہڑا ایہناں نوں اقوام متحدہ دے چارٹر دے تحت حاصل اے۔ جے اقوام متحدہ دی قرار داداں دے نال امتیازی سلوک دا سلسلہ بند نہ ہویا تے ایس بین الاقوامی ادارے دی ساکھ اُتے منفی اثر پئے گا۔ عالمی برادری دی قانونی تے اخلاقی ذمہ داری اے کہ اوہ کشمیریاں نال کیتا گیا وعدہ پورا کرے۔
