سیاست داناں دی غیر سیاسی زبان

فواد چودھری نے اپنی تازہ ترین پریس کانفرنس وچ نواز شریف لئی بھگوڑے دا لفظ استعمال کیتا اے

محمد آصف بھلی

سیاست داناں وچ فواد چودھری تے ڈاکٹر فردوس اعوان غیر سیاسی تے غیر پارلیمانی زبان دے استعمال دے ماہر سمجھے جاندے نیں۔فواد چودھری تے ڈاکٹر فردوس اعوان دونواں دا تعلق اتفاق نال تحریک انصاف دے نال اے پر ماضی وچ ایہناں دونویں سیاست داناں دا مختلف سیاسی جماعتاں دے نال وابستگی تے فیر ایہناں سیاسی جماعتاں توں وکھرا ہون دا لمبا تجربہ اے۔ فواد چودھری اک فوجی آمر جنرل پرویز مشرف دے وی ترجمان رہ چکے نیں۔ پیپلز پارٹی وچ وی شامل رہے نیں تے ایہناں دا خاندان مسلم لیگ ق دا حصہ وی رہ چکیا اے ایسے طرح ڈاکٹر فردوس اعوان مسلم لیگ ق توں سیاسی سفر دے آغاز دے بعد پیپلز پارٹی نال ہوندے ہوئے ہن تحریک انصاف وچ وزیراعلیٰ پنجاب دی معاون خصوصی برائے اطلاعات نیں۔ عمران خان نوں یقینی طور اُتے فواد چودھری تے ڈاکٹر فردوس اعوان دی اوہ زبان بوہت پسند اے جیہڑی ایہہ دونویں سیاست دان مخالفین لئی استعمال کردے نیں۔ ایہہ وکھری گل اے کہ فواد چودھری نوں عمران خان نے اپنی سب توں پہلی کابینہ وچ وزارت اطلاعات و نشریات دا قلمدان حوالے کیتا سی پر فیر اوہناں نے فردوس اعوان تے شبلی فراز نوں واری واری آزمایا پر جدوں ایہناں نوں اطمینان نہ ہویا تے فواد چودھری نوں دوبارہ اطلاعات و نشریات دی ذمہ داری دتی گئی۔ ایہہ وزارت فواد چودھری نوں وی بوہت پسند اے۔ ایس لئی ہن اوہ وزارت نوں پکا کر ن لئی اپوزیشن لیڈراں لئی اوہ ای زبان استعمال کر رہے نیں جنہوں سن کے عمران خان خوش ہوندے نیں فردوس اعوان نوں وزیراعظم عمران خان نے اپنی معاون خصوصی دے عہدے توں الگ کر دتا سی پر عمران خان نے ای وزیراعلیٰ پنجاب لئی فردوس اعوان دا انتخاب کیتا۔ فردوس اعوان توں پہلے پنجاب وچ ایہہ ذمہ داری فیاض چوہان دے کول سی۔ اوہ وی اپوزیشن دے خلاف دشنام آمیز تے نادرست زبان استعمال کرن وچ بڑی دسترس رکھدے سن پر فردوس اعوان دوبارہ جے عمران خان دی انتخاب قرار پائی اے تے بے شبہ فردوس اعوان نوں عمران خان نے زیادہ باصلاحیت سمجھیا اے جے میں فواد چودھری تے فردوس اعوان دی زبان، جملے، فقرے ایتھے لکھنے شروع کر دیواں جیہڑے اپوزیشن لئی اوہ استعمال کردے نیں تے ایس لئی کئی کالم درکار ہون گے۔ صرف اک نمونہ ای کافی اے۔کہ فردوس اعوان مسلم لیگ ن دی رہنما مریم اورنگزیب لئی کنیز دا لفظ استعمال کردیاںنیں تے مریم نواز شریف نوں ہمیشہ ناں نال سدن دی بجائے جعلی راجکماری آکھدیاں نیں۔ اک ٹی وی پروگرام وچ تے فردوس اعوان نے ’خوش زبانی‘ دی انتہا کر دتی کہ سیاسی مخالفین نوں کتے تیکر قرار دے دتا۔ فواد چودھری نے اپنی تازہ ترین پریس کانفرنس وچ نواز شریف لئی بھگوڑے دا لفظ استعمال کیتا اے۔ اوہناں نے فرمایا اے کہ اسیں بھگوڑیاں نال نہیں پارلیمنٹ وچ وچ موجود قیادت نال گل کراں گے۔ اوہناں نے ایہہ وی کہیا کہ ملزماں یعنی نواز شریف نوں پارٹی قیادت دا حق نہیں۔ فواد چودھری دا ایہہ بیان اک انج دے بندے دا لگدا اے جیہڑا سیاست دی ابجد توں وی واقف نہیں۔ حکومت تے ایس دے ترجماناں دی نظر وچ نواز شریف بھگوڑا ہوئے، ملزم ہوئے یا مجرم۔ پر فواد چودھری نوں اینا تے علم ہونا چاہیدا اے کہ مسلم لیگ ن وچ جیہڑا مقام مسلم لیگ ن دے ارکان پارلیمنٹ دی نظر وچ نواز شریف دا اے اوہ مقام مسلم لیگ ن دے کسے ہور لیڈر نوں حاصل نہیں۔ جس طرح عمران خان نوں مائنس کر دتا جائے تے تحریک دی کیہ حیثیت رہ جاندی اے۔ عمران خان نوں ہجے خیال آئے تے اوہ وزارت اطلاعات و نشریات فواد چودھری نوں فارغ کر دین۔ عمران خان نے جے چاہیا تے ایس عثمان بزدار نوں وزیر اعلیٰ پنجاب بنا دتا جنہاں نوں وزیراعلیٰ نامزد ہون توں پہلے سیاسی حلقیاں وچ کوئی جان دا وی نہیں سی۔ فواد چودھری نوں اینی سوجھ بوجھ تے ہونی چاہیدی اے کہ جیہڑی پوزیشن عمران خان دی تحریک انصاف وچ اے اوہ پوزیشن بلکہ ایس توں وی زیادہ نواز شریف مسلم لیگ ن وچ رکھدے نیں۔شہباز شریف ہوئے یا سابق وزیراعظم شاہد خاقان عباسی کیہ ایہناں وچوں کوئی نواز شریف دا مسلم لیگ ن وچ متبادل ہے۔ فواد چودھری نے ایہہ وی کہیا اے کہ نواز شریف، مولانا فضل الرحمن، تے مریم نواز شریف پارلیمنٹ دا حصہ نہیں۔ میںصرف مریم نواز دی مثال دینا واں کہ ایہناں دے مقابلے وچ فواد چودھری کس رکن پارلیمنٹ دا ناں لین گے جس نوں ایس ویلے مسلم لیگ ن وچ مریم نواز توں زیادہ اہمیت حاصل ہوئے سوائے شہباز شریف دے۔ مریم نواز جے پریس کانفرنس نال خطاب کرے تے کئی نامور ممبران پارلیمنٹ ایہناں دے پچھے کھڑے ہوندے نیں ایسے طرح مولانا فضل الرحمن نوں جیہڑا مقام اپنی جماعت وچ حاصل اے کیہ اوہ کسے ہور جمعیت العلماء اسلام دے لیڈر دا ہے تے فیر ایہہ کس قدر غیر سیاسی بیان اے کہ اسیں بھگوڑیاں نال نہیں پارلیمنٹ وچ موجود قیادت نال مذاکرات کراں گے۔ جے نواز شریف یا مولانا فضل الرحمان دے بارے وچ فواد چودھری یا آپ عمران خان وی نادرست زبان استعمال کرن گے تے فیر پارلیمنٹ وچ موجود اپوزیشن دی قیادت حکمران جماعت نال کیوں گل کرے گی۔ غیر سیاسی زبان صرف ناشائستہ الفاظ دے استعمال نوں نہیں کہیا جائے گا۔ سیاست وچ ایہہ رویہ وی ناشائستہ کہلوائے گا کہ تسیں اپوزیشن لیڈراں نوں ایہناں دا صحیح مقام نہ دیو۔ عمران خان آپ وی اپنے مخالفین لئی بڑی غیر محتاط زبان استعمال کردے سن جدوں اپوزیشن وچ سن تے ہن وی جدوں اوہ وزیراعظم نیں۔ شاید ایسے لئی اپنی کچی نوکریاں نوں پکا کرن لئی فواد چودھری تے فردوس اعوان وی غیر سیاسی زبان استعمال کرن اُتے مجبور نیں پر ایس دا فائدہ نہ ملک و قوم نوں ہوئے گا تے آخر کار غیر سیاسی بیانات تے غیر سیاسی رویے حکمران جماعت لئی وی سود مند ثابت نہیں ہون گے۔ فواد چودھری تے فردوس عاشق اعوان نوں مسلم لیگ ن تے پیپلز پارٹی دی قیادت دے بارے وچ انج دی زبان استعمال کرنی چاہیدی اے کہ مستقبل وچ جے اوہ ایہناں جماعتاں وچ شامل ہونا چاہندے ہون تے ایہناں نوں شرمندگی نہ ہوئے۔ آخر وچ عمران خان دا اک دلچسپ بیان جیہڑا سارے اخباراں وچ شائع ہویا، اوہ فرماندے نیں کہ ایہناں نوں پیپلز پارٹی تے مسلم لیگ ن دونواں جماعتاں وچ شمولیت دی دعوت دتی گئی پر اوہ چونکہ مسلم لیگ ن تے پی پی پی دی کرپشن توں واقف سن ایس لئی اوہ ایہناں جماعتاں وچوں کسے اک وچ وی شامل نہیں ہوئے جدوں تیکر فواد چودھری تے فردوس اعوان پیپلز پارٹی وچ شامل رہے ایہناں دونواں دیاں زباناں اپنی قیادت دے اوصاف تے خوبیاں دہراندے ہوئے نہیں تھکدیاں سن۔ ایہہ وی سیاست دا المیہ اے کہ عمران خان دی جماعت بلکہ کابینہ وچ زیادہ تعداد ایہناں لوکاں دی اے جیہڑے ایہناں سیاسی جماعتاں دا اہم حصہ رہے جنہاں سیاسی جماعتاں وچ ایہناں دی کرپشن دی وجہ نال عمران خان نے آپ شامل ہونا پسند نہ کیتا۔