اولمپکس وچ پنجویں پوزیشن لین والے ارشد ندیم دے حوصلے بلند

پاکستان دے 10 ایتھلیٹس مقابلے وچ شریک ہوئے پر کوئی وی تمغہ نہ لے سکیا

ندیم اپل

ٹوکیو اولمپکس ختم ہو گیا۔ ایہناں اولمپکس وچ امریکہ 39سونے تمغے لے کے پہلے نمبر اُتے رہیا ۔ قابل ذکر گل ایہہ وے کہ میزبان جاپان صرف 27 تمغے جت پایا یاد رہوے کہ پاکستان پچھلے 29 ورھیاں وچ اک وی سونے دا تمغہ حاصل نہیں کر سکیا صرف 1992 وچ پاکستان نے ہاکی وچ کانسی دا تمغہ جتیا سی جس دے بعد چراغاں وچ روشنی نہیں رہی۔ تاں ایہہ پہلا موقع اے کہ اک پرعزم پاکستانی نوجوان نے اپنی ذاتی جدوجہد تے قومی جذبے نال اولمپکس گیمز وچ پاکستان دا جھنڈا لہرا دتا ہار جت تے کھیڈ دا حصہ ہوندا پر قابل ذکر گل ایہہ وے کہ ارشد ندیم نے بغیر کسے حکومتی سرپرستی دے جیولن تھرو دے فائنل ایونٹ وچ مجموعی طور اُتے پنجویں پوزیشن حاصل کیتی جد کہ بھارت دے نیرج چوپڑا نے 87 اعشاریہ پنج اٹھ میٹر دور جیولن سٹ کے سونے دا تمغہ حاصل کیتا۔ ایس ایونٹ وچ چاندی تے کانسی دا تمغہ جتن والے کھلاڑیاں دا تعلق جمہوریہ چین نال اے۔ ٹوکیو اولمپکس دے جیولن تھرو دے فائنل رائونڈ وچ ارشد ندیم دا مقابلہ عالمی نمبر اک جرمنی دے پوہانس ویٹر تے ایشین گیمز و کامن ویلتھ گیمز چیمپئن انڈیا دے نیرج چوپڑا سنے 12 ایتھلیٹس نال سی۔ جدوں ارشد فائنل رائونڈ وچ داخل ہوئے سن تے ایس سال دی بہترین کارکردگی دے اعتبار نال اوہ ایہناں 12 ایتھلیٹس وچ چوتھے نمبر اُتے سن۔ ارشد ندیم نے اُنج تے مقابلہ خوب کیتا تے اپنی پہلی تھرو 82 اعشاریہ چار میٹر دور سٹی، ایہناں دی دوجی تھرو فال قرار پائی جد کہ ایہناں دی تیجی تھرو 84 عشاریہ چھ دو میٹر دور اپڑی۔ ایس تیجی تھرو پاروں اوہ 12 ایتھلٹس وچوں پنجویں نمبر اُتے رہے۔24 سالہ ارشد ندیم اولمپکس وچ تمغہ نہ جتن دا اوہ جمود وی نہ توڑ سکے جیہڑا 29 سال توں قائم سی۔ پاکستان نے آخری وار اولمپکس وچ تمغہ 1992 دے بارسلونا اولمپکس وچ جتیا سی جدوں ہاکی ٹیم شہباز احمد دی قیادت وچ کانسی دا تمغہ جتن وچ کامیاب ہوئی سی۔
ارشد ندیم دی ایس سال دی بہترین کارکردگی 86 اعشاریہ 38 میٹرز سی، جیہڑی اوہناں نے ایران دے شہر مشہد وچ منعقدہ مقابلے وچ وکھائی سی۔ ارشد ندیم نے بدھ دے دن ہون والے ٹوکیو اولمپکس دے کوالیفائنگ مقابلیاں وچ 85 اعشاریہ 16 میٹرز دور جیولن سٹ کے فائل رائونڈ لئی کوالیفائی کیتا سی۔ اوہ کوالیفائنگ مقابلیاں وچ گروپ بی وچ پہلے نمبر اُتے رہے سن جد کہ مجموعی طور اُتے کوالیفائنگ رائونڈ وچ ایہناں دی تیجی پوزیشن رہی سی۔ ارشد ندیم پہلے ای نواں باب رقم کر چکے سن کہ اوہ پاکستان دے پہلے ایتھلیٹ نیں جنہاں نے وائلڈ کارڈ انٹری یا انویٹیشن کوٹے دی بجائے اپنی شاندار کارکردگی دی بنیاد اُتے اولمپکس لئی براہ راست کوالیفائی کیتا سی تے جدوں اوہناں نے فائنل رائونڈ وچ تھاں بنائی تے ایہہ وی پہلا موقع سی کہ کوئی وی پاکستانی ایتھلیٹ اولمپکس دے ٹریک اینڈ فیلڈ دے فائنل مقابلیاں تیکر اپڑیا ہوئے۔ ایس توں پہلے ماضی وچ سارے ایتھلیٹس ابتدائی مقابلیاں توں اگے ودھن وچ کامیاب نہیں ہو سکے سن۔ ارشد ندیم نے سنہ 2019 وچ نیپال دے شہر کھٹمنڈو وچ ہون والے ایشین گیمز وچ 86 اعشاریہ 29 میٹرز دور جیولن سٹ کے نہ صرف ایہناں مقابلیاں دا نواں ریکارڈ قائم کیتا سی بلکہ اولمپکس لئی وی براہ راست کوالیفائی کیتا سی۔ واضح رہوے کہ اولمپکس دے جیولن تھرو وچ براہ راست کوالیفائی کرن دا فاصلہ 85 میٹر مقرر اے۔ ٹوکیو اولمپکس وچ ارشد ندیم دی غیر معمولی کارکردگی نوں پورے ملک وچ سراہیا گیا اے تے خاص کر ایتھلیکٹس دے حلقیاں وچ ایہنوں مستقبل دے تناظر وچ اک اہم پیش رفت دے طور اُتے ویکھیا جا رہیا اے۔
ایہہ خیال وی ظاہر کیتا جا رہیا اے کہ آن والے ورھیاں وچ نوجوان اتھیلٹس نوں ارشد ندیم دی ایس کارکردگی توں بوہت حوصلہ ملے گا۔ پاکستان دی خاتون ایتھلیٹ صاحب اسری نے گل بات کردے ہوئے کہیا کہ ارشد ندیم دوجے ایتھلیٹس لئی اک مثال نیں۔ اوہ کہندیاں نیں کہ ارشد ندیم دی سب توں وڈی خوبی ایہناں دی عاجزی اے تے بین الاقوامی سطح اُتے کامیابیاں دے باوجود ایہناں وچ غرور ناں دی شے نہیں۔
اوہ دسدیاں نیں کہ جدوں اسیں واپڈا دے ٹریننگ کیمپ وچ ٹریننگ کر رہے ہوندے آں تے اوہ اپنے سارے ساتھیاں نوں تکنیکی گلاں سمجھا رہے ہوندے نیں تے ایہناں دی حوصلہ افزائی کر رہے ہوندے نیں ایہناں دا رویہ سارے ساتھی ایتھلیٹس دے نال دوستانہ ہوندا اے۔ اوہناں نے کدی وی ایہہ تاثر دین دی کوشش نہیں کیتی کہ اوہ انٹرنیشنل ایتھلیٹ نیں۔ اسیں سارے ایتھلیٹس جدوں ایہناں نوں بین الاقوامی سطح اُتے چنگی کارکردگی دا مظاہرہ کردے ہوئے ویکھنے آں تے فخر محسوس کرنے آں۔ سنہ 2019 دے نال ایشین گیمز وچ کانسی دا تمغہ جتن والی صاحب اسری کہندیاں نیں ارشد ندیم نے ٹوکیو اولمپکس وچ جس شاندار کارکردگی دا مظاہرہ کیتا اے ایس نال مینوں وی بے پناہ جوش پیدا ہویا اے کہ میں وی ایہناں ای طرح اولمپکس وچ شرکت دا خواب حقیقت بنا سکاں۔ پر سب توں اہم گل ایہہ وے کہ میں وی ایہناں دی طرح وائلڈ کارڈ دے بجائے براہ راست کوالیفائی کرنا چاہنی آں۔ پاکستان دے مشہور ایتھلیٹ اعزازی کیپٹن محمد یونس نوں سب توں زیادہ خوشی ایس گل دی اے کہ ارشد ندیم نے براہ راست اولمپکس لئی کوالیفائی کیتا۔ سنہ 1974 دے تہران ایشین گیمز وچ 1500 میٹرز ریس وچ گولڈ میڈل جتن والے محمد یونس نے کہیا کہ ایس نوجوان ایتھلیٹ نے جدوں اپنا کریئر شروع کیتا تے ایہنوں بنیادی سہولتاں میسر نہیں سن پر ٹیلنٹ نوں اگے ودھن توں کوئی نہیں روک سکدا۔ 72 سالہ محمد یونس دا کہنا اے ارشد ندیم نے پچھلے کجھ ورھیاں دے دوران انٹرنیشنل مقابلیاں وچ متاثر کن کارکردگی دا مظاہرہ کیتا اے تے ایہناں دی محنت ایہناں نوں اولمپکس تیکر لے آئی اے۔ ایہناں نے ہجے مزید اگے جانا اے تاں ایہناں نوں مستقبل وچ وی اپنی ٹریننگ اُتے مکمل توجہ رکھنی ہوئے گی محمد یونس کہندے نیں ساڈے ویلے سہولتاں دا فقدان سی خاص کر ایس زمانے وچ ٹارٹن ٹریک نہیں سی۔ اسیں عام میداناں وچ نس کے ٹریننگ کردے سی ایہو وجہ اے کہ جدوں اسیں باہر جاندے سی تے ایہہ فرق ساڈی کارکردگی وچ واضح طور اُتے اگے آندا سی۔ ہن سہولتاں پہلے توں بہتر نیں پر ایہناں وچ وادھا کرنا ہوئے گا تاکہ نوجوان کُڑی منڈے اپنی صلاحیتاں نوں زیادہ چنگے انداز وچ اجاگر کر سکن۔ محمد یونس نے اپنی گل بات ختم کردے ہوئے کہیا قومی ایتھلیکٹس دے معاملات نوں سیاست توں بچانا ہوئے گا کیوں جے ایس نال سب توں زیادہ متاثر آپ کھلاڑی ہوندے نیں۔ ایہہ سیاست ساڈے دور وچ وی زوراں اُتے سی۔ ملتان نال تعلق رکھن والے صحافی ندیم قیصر پاکستان دی ایتھلیکٹس اُتے گہری نظر رکھدے نیں تے ایہناں دے خیال وچ ارشد ندیم دی کہانی دوجے کھلاڑیاں لئی مثال اے۔ اوہ کہندے نیں کہ ایہہ 2012 دی گل اے جدوں میں پندرہ سالہ ارشد ندیم نوں پہلی وار انٹر بورڈایتھلیکٹس مقابلیاں وچ ایس حالت وچ ویکھیا سی کہ اوہناں نے خستہ حال جُتے پا رکھے سن جنہاں دے نال جیولن تھرو کرنا ممکن نہیں سی جس دی وجہ نال اوہناں نے ننگے پیر گھاہ دے میدان وچ ہون والے مقابلے وچ حصہ لیا سی۔ مقابلے دے بعد اوہ اپنے پیراں توں کنڈے تے دیگر کچرا صاف کر رہے سن۔ جدوں میں ایہناں دے ٹیلنٹ دی تعریف کیتی تے اوہناں نے معصومیت نال کہیا سی سر، میرے کول پان لئی چنگی حالت دے جُتے وی نہیں۔ ندیم قیصر کہندے نیں کہ ارشد ندیم نے بوہت اوکھا ویلا ویکھیا اے پر ایہناں دے حوصلے وچ کدی کمی نہیں آئی ایس سلسلے وچ ایہناں دے کوچ رشید احمد ساقی نے ایہناں دا ہر قدم اُتے ساتھ دتا اے۔ اج ارشد ندیم جو کجھ وی اے ایہناں وچ ساقی صاحب دی محنت تے توجہ دا عمل دخل نمایاں اے۔ پاکستان ایتھلیکٹس فیڈریشن دے صدر میجر جنرل ریٹائرڈ اکرم ساہی دا کہنا اے کہ ارشد ندیم دی ٹریننگ اُتے فیڈریشن نے دو کروڑ روپئے خر چ کیتے نیں۔ اکرم ساہی کہندے نیں کہ اکثر لوکاں دا ایہہ خیال اے کہ اولمپکس تیکر رسائی صرف ارشد ندیم دی انفرادی کارکردگی دا نتیجہ اے تے فیڈریشن دا ایس وچ عمل دخل نہیں یقینا ارشد ندیم دی اپنی محنت وی موجود اے پر ایہہ گل وی لوکاں نوں پتہ ہونی چاہیدی اے کہ پاکستان ایتھلیکٹس فیڈریشن نے وی ایہناں دی ٹریننگ تے اولمپکس وچ شرکت نوں یقینی بنان لئی انتھک محنت کیتی اے۔ اکرم ساہی کہندے نیں معاملہ صرف انفرادی کارکردگی دا ہوندا تے پاکستان اپنے قیام دے بعد تو ںاولمپکس وچ حصہ لے رہیا اے تے بوہت پہلے ای نتیجے ساہمنے آ جانے چاہیدے سن۔ اکرم ساہی کہندے نیں کہ ارشد ندیم اولمپکس وچ جا ای نہیں سکدے سن کیوں جے فیڈریشن دے کول ایہناں دی ٹریننگ لئی وی پیسے نہیں سن پر میں ذاتی دلچسپی لے کے سپانسرز وغیرہ دی مدد نال ایہناں دی ٹریننگ نوں ممکن بنایا۔ ایس ٹریننگ دے پورے عمل وچ دو کروڑ روپئے اسیں خرچ کیتے نیں۔ میں پچھلے کئی ورھیاں توں کہندا پھر رہیا سی کہ ایس نوجوان وچ غیر معمولی صلاحیت اے پر ایس ویلے تے کسے نوں پرواہ ای نہیں سی کہ کون ارشد ندیم تے کون اولمپکس ؟ اکرم ساہی کہندے نیں کہ کووڈ دی صورتحال نے وی ارشد ندیم دی ٹریننگ نوں متاثر کیتا اسیں جدوں لہور وچ ایہناں لئی کیمپ لایا جس وچ ایہناں دے کوچ فیاض حسین بخاری وی شامل سن تے اک ویلا انج دا وی آیا جدوں سانوں دسیا گیا کہ کووڈ دی صورتحال پاروں ایہہ دونویں ہاسٹل وچ وی نہیں رہ سکدے تاں سانوں ایہناں دی رہائش دا بندوبست کسے دوجی تھاں کرنا پیا بلکہ کجھ دناں لئی ارشد نوں ایہناں دے گھر گھلنا پیا۔ اکرم ساہی دا کہنا اے کہ پاکستان اولمپکس ایسوسی ایشن نے پاکستان ایتھلیٹکس فیڈریشن نوں معطل کر رکھیا اے جد کہ ایس ویلے کارکردگی دے لحاظ نال دیگر کھیڈاں دے مقابلے وچ ایتھلیکٹس فیڈریشن سب توں نمایاں نظر آندی اے۔ ایہہ ساری بحث تے شکوے شکایت اپنی تھاں پر ایہہ گل مننی پئے گی کہ ہمت کرے انسان تے کیہ ہو نہیں سکدا ارشد ندیم جہے نوجوان ایس ملک لئی اک روشن مثال نیں تے جے حکومت انج دے پرعزم نوجواناں دی سرپرستی کرے تے ساڈے نوجوان اک وار فیر اولمپکس وچ ملک دا ناں روشن کر سکدے نیں۔