جشن آزادی رَل کے مناواں گے
عاصم بخاری
آزادی دا مطلب مترو جے کر سمجھ تے جان لیے
مڑ دھرتی دی مٹی نوں وی سجنو اسیں پہچان لیے
اس دھرتی نوں اسیں تے یارو دو دو ہتھیں وڈھیا اے
آزادی دا مطلب شاید اسیں تے ایہو ای کڈھیا اے
کسے آزادی راس نہیں آئی ایڈے آں آزاد ہوئے
کر بھروسہ غیراں اُتے سارے ہاں برباد ہوئے
جمدے بال نوں اسی تے لوکو قرضاں ہیٹھ دبا دتا
آزادی دے جشن نوں ہتھی مٹی وچ دفنا دتا
لکھاں ویر جواناں نوں کٹوا کے پاکستان لیا
دھیاں بھیناں دی عصمت نوں لٹوا کے پاکستان لیا
خون خرابے نفرت والیاں اگاں ساڑ سواہ کیتا
سنتالی دے جذبے نوں کیوں دل چوں اسیں ہوا کیتا
آزادی دا ایہہ دیہاڑا اج ساڈے توں پچھدا اے
چن تارے دا سبز ایہہ جھنڈا ہن کیوں سانوں دکھدا اے
ایہہ تے آزادی دا پرچم ساڈی اکھ دا تارا اے
دیس دی دھرتی آزادی دا من کھچواں گہوارہ اے
کس فریبی ہتھے چڑھ کے آپس وچ پئے لڑنے آں
کسے تے فتوے کسے تے تہمت لا لا کیوں پئے مرنے آں
اجے وی ڈلھے بیراں دے چھابے نوں رل کے ول لیے
جہڑی آفت ملک تے آئے اپنے سینے جھل لیے
آئو رل کے عہد ایہ کریئے ملک نوں اسیں سنواراں گے
قرض نوں اپنا فرض سمجھ کے ملک دے اسیں اتاراں گے
جہڑا میلی اکھ نال تکے اوہنوں رل کے ماراں گے
جنہاں نے ہے ملک نوں لٹیا وچ چوراہے ساڑاں گے
فیر آزادی جشن بنے گی سبھے رل مناواں گے
ایس دھرتی دا ذرہ ذرہ سورج چن بناواں گے
