ہن اجالے وچ فیصلے ہون گے
ساڈے معاشرے دا وڈا طبقہ عیش و عشرت دے دلدادہ لوکاں نال بھر چکیا اے
رابعہ رحمن
آزادی دا سفر خون دے دریا توں لنگھ کے مکمل ہویا کردا اے۔ ساڈی آزادی دی داستان خونچکاں سب دی یاد داشتاں وچ موجود اے پر فیر وی ایس نوں دہرائے رکھن نال آن والی نسل نوں اپنی آزادی تے آزادی دے پس پردہ دتی جان والی قربانیاں نال محبت ہوندی اے۔ اسیں اپنی زندگی دے نکے سارے حادثے نوں مردے دم تیکر نہیں بھلدے تے اکثر ایس دا ذکر کرنے آں تے آزادی وطن تے بوہت وڈا معرکہ سی۔ ایہہ داستان ہر ایس بندے توں ہو کے جیہڑا بہیمانہ مظالم دا شکار ہوندے ہوئے یا بچدے بچاندے سرزمین وطن اُتے آ کے سربسجود ہویا، اج دے ہر ایس انسان دی داستان اے جیہڑا ایتھے آزادی دا ساہ لے رہیا اے۔مملکت خدادا پاکستان دی داستان خونچکاں توں اسیں اج وی ایس طرح اپنے جذبیاں نوں جوان رکھنے آں ، حوصلے بلند تے ارادے مضبوط رکھنے آں جس طرح کہ 14 اگست 1947 تیکر اپڑن وچ جوان پرعزم تے اٹوٹ ارادے رکھدے سن ۔ ساڈے دشمن چونکہ اج وی ایسے تاک وچ بیٹھے نیں کہ ایہناں نوں کدوں موقع ملے تے اوہ اوہ ای غارت گری، وحشت و درندگی دا بازار گرم کرن جیہڑا 1947 وچ کیتا سی کیوں جے ایہناں دی مسلماناں نال نفرت پہلے دی نسبت نا صرف کئی گنا ودھ چکی اے بلکہ اوہ اپنی ایٹمی قوت ہون دا زعم تے امریکہ تے اسرائیل دی پشت پناہی تے دوستی دا فائدہ وی چکن دا عزم رکھدے نیں۔
ساڈے دشمن دے پیش نظر ایہناں نوں ساڈی اکھاں وچ مٹی پان دی ملکہ حاصل اے۔ اوہناں نے سوشل میڈیا دے ذریعے اپنے آپ نوں کامیاب کرن لئی انج دے ہتھکنڈے اختیار کر رکھے نیں کہ ساڈی نوجوان نسل نوں جے اسیں آزادی وطن دی داستاناں نہ سناندے رہے تے دشمن کامیاب ہو جائے گا۔ ساڈے معاشرے دا وڈا طبقہ عیش و عشرت دے دلدادہ لوکاں نال بھر چکیا اے اوہ اپنے نفس دے زیر بار نوجوان نسل تے پاکستان دے معماراں نوں ایہناں دے حال اُتے چھڈ کے آپ وی مست قلندر دے مصداق اپنی زندگیاں وچ گم نیں۔
پاکستان دی پہلی جشن آزادی اُتے کراچی 14اگست1948 وچ اپنی تقریر وچ قائداعظم نے اک پیغام دتا کہ
نویں مملکت دا عین ایس دے قیام دے ویلے دیگر کئی طریقیاں نال گلا گھوٹن دی کوششاں توں مایوس ہو جان دے بعد ساڈے دشمن ایہہ آس لائے بیٹھے نیں کہ اوہ معاشی حربیاں نال اپنا دلی مقصد حاصل کر لین گے۔ تعصب تے بددیانتی دی بنیاد اُتے گھڑے گئے لمبے دلائل نال لیس ہو کے اوہ ایہہ پیشن گوئی کر بیٹھے سن کہ پاکستان (نعوذ باللہ ) دیوالیہ ہو جائے گا تے جو کجھ دشمن آتش تے آئین نال نہ کھوہ سکیا اوہ مملکت دی تباہ حال معیشت نال ایہنوں حاصل ہو جائے گا پر ’’بدی کے یہ دیوتا‘‘ رسواہوکے رہ گئے‘‘، بانی پاکستان دا ایہہ پیغام ہندوئواں دے کردار تے سوچ دا شفاف آئینہ اے قیام پاکستان توں لے کے تا دم تحریر پیش آن والے حالات پکار پکار کے سانوں دعوت فکر و عمل دے رہے نیں کہ ہندو بنیا جنہوں قائداعظم بلیک بنیا کہیا کردے سن اوہ اج وی کوشاں اے کہ پاکستان نوں شدید گزند اپڑا سکے۔پر ساڈا حوصلہ تے قائد دا ایہہ مشہور فقرہ ودھاندا اے کہ (پاکستان قائم رہنے لئی بنیا اے تے ہمیشہ قائم و دائم رہوے گا انشاء اللہ)
گل شروع کیتی سی میں داستان آزادی نوں دہران دی تے ایسے سلسلے وچ سیالکوٹ چیمبر آف کامرس وچ 11 اگست نوں جشن آزادی دی ایس تقریب دا انعقاد ہویا جس وچ یونیورسٹیاں سکول و کالج دے استاد تے طلبا و طالبات نے حصہ لیا۔
ایف جی گرلز سکول دی طالبہ نال فرمائشی طور اُتے تن وار قومی ترانے سنے گئے پورا چیمبر تاڑیاں دی گونج نال دھمک رہیا سی۔ ایس دے بعد سرسبز و شاداب وطن لئی مزید شادابی ایہہ گل چلی پودے لان دے مقاصد تے فائدے بیان کیتے گئے۔
شیخ زاہد سیالکوٹ دے اوہ محب وطن تے ادب دوست انسان نیں جنہاں نے آپ کدی کجھ نہیں لکھیا پر ہر تہوار وچ چاہے اوہ شہداء دے اعزاز وچ ہوئے وطن دی محبت وچ یا ادب دوستی وچ اوہ تقریباں دا انعقاد اپنی بیگم سائرہ زاہد دے نال مل کے کردے نیں۔ اوہناں نے ایس وطن دی محبت وچ وطن دے باسیاں نال محبت کیتی اے ایس او ایس ویلیج دی پرنسپل دا اک جملہ جیہڑا تاڑیاں دی گونج دا سبب بنیا کہ ’’میں اپنے SOS ویلج دے بالاں دے مسائل لے کے یا امداد لئی لوکاں دے کول نہیں جاندی بلکہ لوکاں توں پچھن جانی آں کہ تہانوں کوئی مسئلہ اے تے دسو اسیں مل کے حل کرنے آں‘‘۔
