منقبت
حنیف ساقی
حضور پچھنایں جہان کولوں حسینؑ ورگا شہید کون ایں
جو وانگ حر دے حسینؑ مرشد توں جان وارے مرید کون ایں
حسینؑ منی نے کھولیا اے اوہ راز جہڑا ازل توں سچ اے
نبیؐ نے دسیا اے دو جہاناں دی آس کون ایں امید کون ایں
حسینؑ پشت نبیؐ تے کھیڈے رسولؐ سجدہ طویل کر کے
جہان سارے نوں ایہہ وکھایا اے راز دار وحید کون ایں
حسینؑ بارے نبیؐ نے دسیائے یزید بارے زمانہ دسدائے
حسینؑ ورگا نہیں پاک کوئی یزید ورگا پلید کون ایں؟
جے چوداں صدیاں گزار کے وی جہان توں نہیں نتارا ہویا
تے کیہ کہواں گے نبیؐ جے پچھیا حسینؑ کون ایں یزید کون ایں
حسینؑ کولوں جنہاں خطیباں نے دور کیتا اے امتی نوں
حشر نوں پچھاں گے بخششاں دی جو دے رہیا اے رسید کون ایں
توں حق تے باطل نکھیڑ دتے اے کل شئی قدیر ربا
جے توں نہیں تے سناں تے پڑھدا اے جو کلام مجید کون ایں
جے ساقی دل والی اکھ نوں کھولن زمانے سارے نوں نظریں آوے
ہے دردی کہڑا نبیؐ دے گھر دا‘ ظلم دا ھل من مزید کون ایں
