در شان امام عالی مقام حضرت امام حسین ؑ
عبدالحمید نظامی
میرے آقا حسین دا ذکر سن کے ایویں کملیا متھڑے وٹ نہ پا
لیکے غم شبیر دی استری نوں وٹ دل دے کڈھ توں جھٹ نہ پا
لیکے ہتھ وچ ترازو انصاف والا تول پورا ای تول وٹے گھٹ نہ پا
وٹے وٹ نظامیؔ توں جا ٹریا اپنے عشق دی راہ چ وٹ نہ پا
کربل اندر حق دیاں
کربل اندر حق دیاں جھوکاں جہناں آپ وسائیاں نیں
اوہناں شیر جواناں ویکھو کیتیاں کیڈ کمائیاں نیں
لکھ لکھ وار سلام نظامیؔ ، کردا اوہناں پاکاں نوں
ظلم دے تکھے تیراں اگے جہناں ہکّاں ڈاہیاں نیں
