پاکستان وچ وی کرونا وائرس پھیلن دا خدشہ، وزارت صحت نے ایڈوائزری جاری کردتی

اسلام آباد: وزارت صحت نے چین وچ خطرناک کرونا وائرس پاکستان وچ پھیلن دے خطرے دے پیش نظر سینٹرل ہیلتھ سٹیبلشمنٹ نوں اقدامات کرن دی ہدایت کر دتی اے۔ خیال رہوے ایس خطرناک وائرس نال چین وچ 1700توں ودھ کیسز رپورٹ ہوئے تے اجے تک 3موتاں ہو چکیاں نیں۔ کرونا وائرس دی روک تھام لئی عالمی ادارہ صحت دا ہنگامی اجلاس جنیوا وچ ہو رہیا اے۔

منسٹری آف نیشنل ہیلتھ سروسز ولوں جاری ہدایت نامے وچ آکھیا گیا اے متاثرہ ملکاں توں کرونا وائرس دوجے ملکاں وچ منتقل ہون دا خدشہ اے۔ چین وچ کرونا وائرس مچھی تے گوشت منڈی والیاں نوں لاحق ہویا۔ہیلتھ ایڈوائزری وچ آکھیا گیا اے بخار، کھانسی تے ساہ لین وچ دشواری ایس خطرناک وائرس دی علامتاں نیں۔ ایہ وائرس متاثرہ جانور یاں حاصل شدہ غذا توں انسان وچ منتقل ہو کے پھیپھڑیاں نوں شدید متاثر کردا اے۔ وزارت صحت ولوں دسیا گیا اے دنیا وچ کرونا وائرس دی ویکسین اجے تک دستیاب نہیں، ایہدے توں بچاؤ دا واحد حل ویلے سر احتیاطی تدابیر نیں۔ ایہ وائرس چین دے علاوہ جاپان، جنوبی کوریا تے تھائی لینڈ وچ وی پایا گیا اے۔

ایڈوائزری وچ خبردار کیتا گیا اے چین توں پاکستان آن جان والے لکھاں بندیاں دے راہیں وائرس دی منتقلی دا خدشہ اے، ایس لئی چین توں پاکستان آن جان والیاں دا طبی معائنہ کیتا جاوے گا۔ حکومت نے ایہدے سدباب تے بچاؤ لئی ایئر پورٹس تے وی خصوصی کاؤنٹر بنان دا فیصلہ کیتا اے۔