پیر فریدؒ دے در تے
عبدالحمید نظامی
پیر فریدؒ دے در تے ہر دم میلہ لگیا رہندا
حق فریدؒ فریدؒ ہے کردا ہر کوئی اُٹھدا بہندا
باباؒ دے دروازے اُتے ہر دم لنگر جاری
مُکدا نہیں ایہہ فیض خزانہ کھاوے خلقت ساری
25 ذوالحج توں عرس ہے جاری 10 محرم تائیں
سب تے خاص عنایت کردا میرا باباؒ سائیں
رسماں ریتاں ہوون ایتھے بابا دے در ادبوں
لکھاں ولیاں رتبے پائے باباؒ جی دے قدموں
5 محرم بہشتی کھُلدی لوکیں آئوندے دوروں
پیر نظامؒ دے صدقے اپنے سینے بھردے نوروں
پیر نظامؒ دی مسجد وچ کئی پڑھدے نفل نمازاں
ونڈن لئی کئی لے کے آئے ایتھے نذر نیازاں
کدھرے ذکر اﷲ دا جاری کِتے درود سلاماں
حق فریدؒ فریدؒ ہے کدھرے ، کدھرے واعظ کلاماں
ایتھے آ کے بندے رب دے ویکھے نیں رَنگ رَنگ دے
چُپ کر کے اوہ بیٹھے رہندے مونہوں کجھ نہیں منگ دے
دل دیاں آساں سدھراں لے کے جیہڑا در تے آوے
من دیاں ملن مُراداں اُس نوں فیض روحانی پاوے
مُرشد دے دروازے اُتے نور دیاں برساتاں
لٹن والے جھولیاں بھردے کھُلیاں آن براتاں
جگ دے دھکے کھا کے جیہڑے در فریدؒ دے آئوندے
میرے باباؒ نال محبت اپنے کول بٹھائوندے
روندے روندے آئے جیہڑے ویکھے جاندے ہسدے
لُٹ لئو فیض خزانے لُٹ لئو نال اشاریاں دسدے
بابا دے دربار دیاں کیہ دساں گلاں باتاں
دوروں دوروں چل کے آون نگری وچ جماعتاں
چارے کُوٹاں وچوں دِسّے ایہدا دیوا بلدا
نظامیؔ پیر فرید دا سکہ ہر پاسے پیا چلدا
