2018نسبت 2019دے دوران پاکستان وچ کرپشن ودھی: ٹرانسپیرنسی انٹرنیشنل
اسلام آباد: 2019ء وچ کرپشن بارے ٹرانسپیرنسی انٹرنیشنل دی رپورٹ جاری کر دتی گئی اے جہدے وچ چونکا دین والے اعداد و شمار ساہمنے آئے نیں۔
ٹرانسپیرنسی انٹرنیشنل دی رپورٹ دے مطابق 2018ء دی کرپشن تے سیپشن انڈیکس وچ پاکستان دا سکور 33سی جہڑا ایس ورھے 2019ء وچ ایہ 32ہو گیا جد کہ انٹرنیشنل دی کرپشن تے سپیشن انڈیکس دے 180رینکس وچ پاکستان دا رینک 120اے۔ رپورٹ وچ آکھیا گیا اے 2019ء وچ زیادہ تر ملکاں دی کرپشن گھٹ کرن وچ کارکردگی بہتر نہیں رہی۔
2019ء وچ پہلا نمبر حاسل کرن والے ڈنمارک دا سکور وی اک پوائنٹ گھٹ ہو کے 87رہیا۔ ایہدے علاوہ جی 7دے ترقی یافتہ ممالک وی انسداد بدعنوانی دیاں کوششاں وچ پھسے ہوئے نیں۔
ٹرانسپیرنسی انٹرنیشنل دا کہنا اے امریکا، برطانیہ، فرانس تے کینیڈا دا انسداد بدعنوانی دا سکور وی گھٹ رہیا۔ امریکا 2، برطانی، فرانس 4تے کینیڈا دا بدعنوانی سکور 4 درجے گھٹ ہو گیا۔
دنیا بھر وچ ودھدی ہوئی کرپشن روکن لئی ٹرانسپیرنسی انٹرنیشنل دی سفارشات وچ آکھیا گیا اے سیاست وچ بڑے پیسے تے اثر و رسوخ نوں قابو کیتا جاوے۔ بجٹ تے عوامی سہولتاں ذاتی مقاصد تے مفاد رکھن والیاں دے ہتھاں وچ نہ دتی جان۔
سفارشات وچ آکھیا گیا اے دنیا بھر وچ سیاسی فنانسنگ نوں کنٹرول کیتا جاوے۔ مفادات دے تصادم تے بھرتیاں دا طریقہ تیزی نال بدلنا قابو کیتا جاوے۔ دنیا بھر وچ کرپشن روکن لئی لابیز نوں ریگولیٹ کیتا جاوے۔
