عالمی ادارے دی رپورٹ نے عمران خان دی نالائقی تے مہر ثبت کر دتی: سعید غنی

کراچی: سعید غنی آکھیا اے ٹرانسپیرنسی انٹرنیشنل دی رپورٹ وچ پاکستان دا درجہ ہور تھلے ڈگ گیا اے، تحریک انصاف دے دعوے تے نعرے غلط نکلے، عالمی ادارے دی رپورٹ نے عمران خان دی نالائقی تے نااہلی تے مہر ثبت کر دتی۔

وزیر اطلاعات سندھ سعید غنی نے ٹرانسپیرنسی انٹرنیشنل رپورٹ تے ردعمل دیندیاں آکھیا 10ورھے بعد ملک دا ٹرانسپیرنسی انڈیکس تنزلی دا شکار ہویا، رپورٹ ایس گل دا ثبوت اے کہ پاکستان وچ ایس ورھے کرپشن وچ وادھا ہویا، مہنگائی و بیروزگاری نے پچھلے اک ورھے وچ غریب دا لک توڑ دتا۔

سعید غنی آکھیا رپورٹ ایس گل دا ثبوت اے کہ ڈیڑھ ورھے وچ ملک ہر حوالے نال پچھے چلا گیا، قنون دی حکمرانی دے حوالے نال جاری رپورٹ وچ وی پاکستان ہور تنزلی ول گیا، اک ورھے وچ پاکستان جمہوری اقدار دے حوالے نال وی پچھے چلا گیا۔

صوبائی وزیر دا ہور کہنا سی ملک وچ پچھلے اک ورھے وچ عدلیہ تے میڈیا تے وی حملے ودھ گئے، انسانی حقوق دی پامالی دے حوالے نال وی پاکستان دا درجہ پچھلے اک ورھے وچ خراب ہویا، اپوزیشن دے خلاف انتقامی کاروائیاں وی ودھ گئیاں نیں۔