آٹا بحران: وزیراعظم دی قائم کیتی خصوصی کمیٹی نے تحقیقات شروع کر دتی

اسلام آباد: وزیراعظم ولوں قائم کیتی خصوصی کمیٹی نے آٹا بحران دی وجوہات تے ذمہ داراں دے تعین لئی تحقیقات شروع کر دتیاں۔ وسیلیاں دا کہنا اے ڈائریکٹر جنرل ایف آئی اے دی سربراہی وچ قائم کمیٹی ولوں آٹا بحران دی تحقیقات شروع کر دتیاں نیں۔ ایس حوالے نال ڈی جی ایف آئی اے نے چاراں صوبائی زونز نوں مارکیٹ وچ آٹے دی دستیابی، طلب و رسد تے قیمتاں بارے اعداد و شمار تے مبنی رپورٹاں پیش کرن دی ہدایت کیتی اے جہدے تے عملدرآمد شروع کر دتا گیا اے۔

وسیلیاں نے دسیا مارکیٹ توں جمع ہون والی معلومات دے مطابق حکومتی دعویاں دے برعکس مارکیٹاں وچ آٹے دی طلب پوری نہیں ہو رہی، سٹورز مالکان تے دکانداراں نوں آٹے دے 100تھیلے دی ڈیمانڈ تے 15تھیلے دستیاب نیں۔ دوجے پاسے آٹا چکیاں تے کنک دستیاب نہ ہون دی وجہ توں آٹے دی قیمتاں وچ بے تحاشا وادھا ہویا اے۔