عورتاں دے حقوق دے ٹھیکیدار

لکھت:مظہر برلاس

افغانستان وچ طالبان دی جت مگروں کجھ ملک تے ایس لئی پریشان ہو گئے کہ اوہناں نوں افغانستان وچ ذلت دا سامنا کرنا پیا۔ ایس رسوائی وچ ہور وادھا ہو سکدا سی جے پاکستان ہتھ نہ پھڑدا۔ مغربی ملکاں لئی بڑے پریشان کن لمحیاں وچ پاکستان نے اپنی روایتی فراخ دلی دا مظاہرہ کیتا۔ مشکل ترین حالات وچ مغربی ملکاں دی سہولت کاری کردے ہوئے اوہناں دے شہریاں نوں کابل توں حفاظت نال کڈھیا۔ امریکہ‘ برطانیہ سنے بہت سارے ملک پاکستان دے شکرگزار بن گئے۔ کجھ تے شکرگزاری دا عملی مظاہرہ کرن لئی پاکستان آ کے حاضریاں لگواندے رہے۔ پاکستان دی عسکری و سیاسی قیادت بڑی اہم بن گئی۔ اقوام متحدہ وی درخواست دہندگان وچ شامل ہو گئی۔ ایس ساری صورتحال وچ اک ملک لگاتار روندا رہیا اوہدا میڈیا وی چیکدا رہیا‘ جس دن صبح سویرے جنرل فیض حمید نے کابل وچ پیر رکھیا‘ اوس دن تے ہندوستان دی پریشانی ناقابل یقین سی حالاں کہ جنرل فیض حمید نے ایہ دورہ طالبان شوریٰ دی دعوت تے کیتا۔ ایہ گل وی ٹھیک اے کہ جدوں لوک کابل توں نس رہے سن ہر پاسے خطرے ای خطرے سن اوہناں حالات وچ کوئی وی غیرملکی اہم شخصیت کابل جان دا سوچ وی نہیں سی سکدی۔ اجہے مشکل حالات وچ اک پاکستانی جرنیل نے ہمت وکھائی تے اوہ کابل ٹر گیا۔ ممکن اے اوہناں نے اوتھے بابر بادشاہ دے مزار تے حاضری دتی ہووے تے اپنے جدامجد نوں دسیا ہووے کہ تہاڈے پُتر اج وی بہادری دیاں مثالاں رقم کر رہے نیں۔
پاک فوج دے جرنیل نے کابل وچ چائے دا کپ کیہ پی لیا پورے بھارت وچ اگ لگ گئی۔ انج وی چائے والی فوٹواں بھارت دی چھیڑ بن گئیاں نیں اوہ تے اجے تک ابھی نندن والی چائے دا ذائقہ نہیں بھُلے سن کہ اک ہور چائے والی فوٹو کابل توں آ گئی۔ کیوں جے انڈیا وچ چائے والا وزیراعظم اے ایس لئی چائے نال ای پورے ملک دی پریشانی وچ وادھا ہوندا اے۔ امریکی تے بس اپنی ہار تے سرمائے دے لٹ جان تے پریشان نیں پر بھارت کئی حوالیاں نال پریشان اے۔ چائے تے صرف اک حوالا اے کھرباں ڈالر ڈبن تے بھارت دے اتھرو نہیں رک رہے۔ اوہناں دا لاڈلا اشرف غنی نس گیا۔ دنیا پاکستان دیاں تعریفاں کر رہی اے؟ کئی اہم ملکاں دے ذمہ دار بندے پاکستان دے دورے کر رہے نیں تے سانوں کوئی پچھ ای نہیں رہیا۔ بھارتی ریاست سوچدی اے کہ ساڈے بندے جتھوں جان بچا کے نس آئے‘ اک پاکستانی جرنیل اوتھے جا کے چائے دیاں چسکیاں لے رہیا اے۔ پاکستان وچ وی کجھ سیاسی پارٹیاں‘ جہناں دے سر تے بھارت دا بھوت سوار رہندا اے اوہناں نوں وی سپ سنگھ گیا اے اوہ تے بول ای کجھ نہیں رہے کجھ دیاں آساں امیداں اینیاں ٹُٹیاں نیں کہ اوہناں دے بندے ہن دوجیاں پارٹیاں وچ تھاں لبھ رہے نیں۔ دو چار نے تے ایس خاکسار نال وی رابطہ کیتا کہ کسے طریقے نال ساڈی تھاں بنوا دیو۔ اک کابل نے پتہ نہیں کنہوں کنہوں پریشان کر دتا اے؟ افغانستان دی سجری صورتحال تے ساڈے کجھ دیسی لبرلز یعنی موم دے لبرلز بڑے پریشان نیں کہ افغانستان وچ طالبان دے آن مگروں عورتاں دا کیہ بنے گا‘ بچیاں دا کیہ بنے گا؟ اوہناں نوں ورتاں دے حقوق دی پریشانی بہت زیادہ لگ گئی اے۔ کاش ایہ لوک افغان عورتاں تے بچیاں تے ہون والی بارود دی بارش تے وی پریشان ہوندے‘ اوہناں نوں کشمیری عورتاں تے ہون والے ظلم و ستم تے عورتاں دے حقوق یاد نہیں آئوندے‘ اوہناں نوں اوس ویلے وی عورتاں دے حقوق یاد نہیں آئوندے جدوں اسرائیلی فوجی فلسطینی عورتاں دی بے حرمتی کردے نیں۔ اوہناں نوں ماریا کٹیا جاندا اے فلسطین وچ بچیاں تے ہون والے ظلماں تے وی حقوق دے ایہ ٹھیکیدار چپ رہندے نیں۔ اوہناں نوں شام‘ عراق‘ لیبیا تے یمن دیاں اوہ عورتاں یاد نہیں رہندیاں جہناں دے بچیاں نوں اوہناں دے سامنے مار دتا جاندا اے جہناں تے بے بسی دے عالم وچ ظلم کیتا جاندا اے اوہناں نوں خوراک تے دوائیاں لئی ترسدیاں عورتاں تے وی عورتاں دے حقوق یاد نہیں آئوندے۔ اوہناں نوں اوس ویلے افغان عورتاں دے حقوق یاد نہ آ سکے جدوں اوہناں نوں بے گھر کیتا جا رہیا سی۔ جدوں اوہناں دیاں گلیاں وچ موت اتاری گئی‘ جدوں اوہناں دے گھراں تے قبضے کر لئے گئے۔ ساڈے دیسی لبرلز عورتاں دے حقوق دے حوالے نال کشمیر‘ فلسطین‘ عراق‘ شام تے یمن نوں تے بھُل ای جاندے نیں اوہناں نوں انڈیا تے امریکہ وچ اوہ عورتاں یاد نہیں آئوندیاں جہناں نوں زیادتی دا نشانہ بنایا گیا‘ عورتاں تے ظلم و زیادتی دے حوالے نال پہلیاں دو پوزیشناں ایہناں دوہاں کول نیں پر موم دے ایہ لبرلز ایہناں سارے حقائق تے چپ رہندے نیں‘ اوہناں دی ایہ چپ منافقت نہیں تے ہور کیہ اے؟۔
میرے سامنے مغربی ملکاں دے بندیاں دی اک فوٹو اے ای اک اہم کانفرنس ہو رہی اے ایہدے وچ افغانستان دی سجری صورتحال وچ عورتاں دے حقوق تے غور ہو رہیا اے عورتاں دے حقوق لئی ہون والی ایس کانفرنس وچ کوئی اک عورت وی شریک نہیں۔ ایہ تے حال اے ساڈے دیسی لبرلز دے حسین آقاواں دا۔ باقی تسیں آپ سمجھدار او کہ ایہ لوک کہڑیاں گلاں نوں عورتاں دے حقوق کہندے نیں۔ جہڑیاں عورتاں دے حقوق لئی عالمی ٹھیکیدار پریشان نیں‘ اوہناں عورتاں نے کابل وچ طالبان دے حق وچ مظاہرہ کرکے سارے ٹھیکیداراں دے منہ تے چپیڑ ماری اے۔ افغان عورتاں دا کہنا اے کہ اوہ طالبان دور حکومت وچ اپنے آپ نوں زیادہ محفوظ سمجھدیاں نیں۔ اوس دور وچ اسیں اجیہا لباس پاندیاں جو اعلیٰ روایات دا پاسدار اے۔ جدوں سانوں کوئی مسئلہ نہیں تے ساڈے لئی عورتاں دے حقوق دے ٹھیکیدار کیوں پریشان نیں؟ ساڈے دیسی لبرلز دا وی اک مسئلہ اے اوہناں نوں اعلیٰ روایات دی امین کسے وی حکومت توں ڈر لگدا اے اوہناں نوں نڈیا تے پروانڈین سیاسی پارٹیاں نال بڑی لگن اے۔ اوہناں نوں پاکستانی فوج نال وی کوئی مسئلہ اے اوہناں نو ںدنیا دیاں ناانصافیاں پسند نیں پر انصاف توں ڈر آئوندا اے اجہے حالات وچ ٹھیکیدار طالبان طرز حکومت توں ایس لئی پریشان نیں کہ اوہناں دیاں محفلاں دی رنگینی ختم ہو جاوے گی اصل وچ ایہ رنگینی ای اوہناں لئی عورتاں دے حقوق نیں۔بقول خاکسار
ترے لبوں پر کیسا شکوہ آیا ہے
کون تھا جس نے تیرے خواب بکھیرے تھے