پنجابی پرچار دے سربراہ تے پنجاب دے حقاں لئی سرگرم احمد رضا وٹو دا پنجاب ہائوس وچ ورھے گنڈھ اِکٹھ

رپورٹ: آفاق بٹ

پنجابی سیوک دی آدھر وچ سجائی گئی ایس تقریب اندر پنجابی تحریک دے وڈے ناواں رَلت کیتی

لہور دے علاقے مصطفی ٹائون دی اک گنجان گلی وچ قائم پنجاب ہائوس صرف اک عمارت ای نہیں بلکہ ایہہ بجا طور اُتے پنجابی زبان و ادب، پنجابی ثقافت تے ایس دھرتی دے واسیاں دے حقاں دی تحریک تے فروغ دا مرکز بن چکیا اے۔چیئرمین پنجاب ہائوس مدثر اقبال بٹ مفکر، دانشور، صحافی تے ادیب نیں تے ایس حوالے نال عملی محاذ اُتے سرگرم وی نیں۔ اوہ کل وقتی سیاست دان تے نہیں پر ایہناں دے سیاسی تجزیے صد فی صد درست ثابت ہو چکے نیں جس پاروں بوہت سارے نامور صحافی وی ایہناں دی چوکٹھ اُتے حاضر ہون نوں اپنے لئی فخر دا باعث تصور کردے نیں۔ پنجاب ہائوس قائم کرن دے پس پردہ ایہناں دا مقصد وی کجھ مختلف نہیں ایہہ اک انج دا مقام بن چکیا اے جتھے مختلف موقعے اُتے پنجابی زبان و ادب، ثقافت تے حقوق دی جنگ وچ اگلے محاذاں اُتے سرگرم کارکن جمع ہوندے نیں تے ایہناں دا ایہہ اکٹھ اک نویں جدوجہد بارے ہویا اے کہ ایس دھرتی دی عوام دے حقوق لئی گل ہون لگی اے۔ ایہہ سب لوک اک خاندان وچ بدل چکے نیں جیہڑے اک دوجے دیاں خوشیاں وچ شریک ہوندے نیں جس نال نوجواناں وچ بالخصوص اگے ودھن دا جذبہ پیدا ہوندا اے تے بذرگاں دی تعظیم دا احساس وی جاگ پیندا اے۔
پنجاب ہائوس ، پنجاب دھرتی دی نمایاں شخصیات دے جنم دن دی تقریبات دا اہتمام کر کے ایہناں نوں ایہہ احساس دلواندا اے کہ پنجاب دھرتی وچ انج دے لوک ہن وی موجود نیں جیہڑے اپنی کمٹمنٹ دے نال جڑت بنائے ہوئے نیں۔ اوہناں نے ایسے سلسلے وچ پنجابی پرچار دے صدر احمد رضا وٹو دی سالگرہ دی تقریب دا اہتمام کیتا جس وچ پنجابی زبان و ادب تے صحافت دے نمایاں چہریاں نے شرکت کیتی جنہاں وچ سینئر صحافی ندیم رضا، ممتاز شاعربابا نجمی،طارق جٹالہ،زاہد بھٹی،کلیان سنگھ،کامریڈ عرفان،عتیق انور راجہ، دیپ سعیدہ،افضل ساحر،انورعزیزچانڈیو،توقیر اسلم، ولائت فاروقی،احمد اقبال بزمی،میاں آصف، نجمہ تے غزالہ نظام الدین شامل سن۔
تقریب دے میزبان پنجابی میڈیا گروپ دے سربراہ مدثر اقبال بٹ نے مہماناں دی آمد اُتے ایہناں دا پرتپاک استقبال کیتا تے احمد رضا وٹو نوں گلدستہ پیش کیتا۔ اوہناں نے تقریب نال اپنے خطاب وچ کہیا کہ پنجاب ہائوس دے قیام دا مقصد پنجابی کاز لئی کم کرن والیاں نوں مل بیٹھ کے اک دوجے دیاں خوشیاں وچ شرکت دے موقعے فراہم کرنا تے پنجابی زبان دے فروغ تے مکالمے دی روایت نوں فروغ دین دے موقعے فراہم کرنا اے۔ ایس جدوجہد وچ چار دہائیاں لنگھ گئیاں۔ مشتاق بٹ جہے دوست ایس دنیا توں جا چکے۔ حقیقت پر ایہہ وے کہ اوہناں دا ادبی و سیاسی ورثہ اج وی ایس تحریک لئی مشعل راہ دا کم کر رہیا اے کیوں جے اوہناں نے جے پہلا پیر نہ چکیا ہوندا تے اج سارا کم ابتدا توں شروع کرنا پیندا۔ ایسے طرح فخر زمان جہے لوک ساڈے وچ موجود نیں جنھاں نوں ویکھ کے نوجوان نسل اپنے کاز نال پیڈی ہندی اے۔
مدثر اقبال بٹ نے احمد رضا وٹو دے بارے وچ گل کردے ہوئے کہیا کہ ایس تحریک وچ اوہ اک چنگا وادھا ثابت ہوئے نیں تے اوہناں نے اپنے کم نال لوکاں دے دلاں وچ تھاں بنائی اے ایس وچ شبہ نہیں کہ ایہناں دے ناقدین وی نیں پر میرے سنے اسیں سب ایہناں دی لگن تےمحنت توں متاثر آں تے دل توں ایہناں دی جدوجہد دی قدر کرنے آں۔ اوہناں نے کہیا کہ پنجاب ہائوس وچ انج دی تقریبات دا انعقاد حقیقت وچ خوشیاں ونڈن دا اک بہانہ اے۔
ندیم رضا پنجابی میڈیا گروپ دے صدر تے صحافت دی دنیا دا اک معتبر حوالہ نیں اوہناں نے تقریب نال خطاب کردے ہوئے کہیا کہ اسیں اک انج دے دور وچ ساہ لے رہے آں جیہڑا فطری انحصاط نال عبارت اے ایس دے باوجود ہن وی انج دے لوک موجود نیں جیہڑے محبت دی جوت جگاندے تے دوریاں ختم کرن وچ اپنا کردار ادا کردے نیں اوہناں نے کہیا کہ میں احمد رضا وٹو دے مختلف روپ ویکھے نیں پہلے شاعر لگے فیر ادیب تے ہن لگدا اے کہ اوہ گلوکار وی نیں۔ میں آپ ایہناں نوں مال روڈ اُتے پولیس اہلکاراں نوں للکاردے ہوئے مولا جٹ وانگوں پنجاب دے حق وچ اواز بلند کردے ہوئے ویکھیا اے۔
تقریب دی جان محفل تے اہم ترین مہمان احمد رضا وٹو نے اپنے خطاب وچ ایس پرتکلف دعوت دے انعقاد اُتے پنجابی میڈیا گروپ دے سربراہ مدثر اقبال بٹ دا شکریہ ادا کیتا تے کہیا کہ گل صرف پنجابی زبان دے نفاذ دی نہیں ایس جدوجہد دا دائرہ کار بوہت وسیع اے۔ اوہناں آکھیا کہ ساڈی نویں نسل دی ذہنی ترقی اُتے دھیان دینا بہت ضروری اے تے امن دا پیغام پھیلان دی لوڑ اے۔
ممتاز شاعر بابا نجمی نے کہیا کہ مدثر اقبال بٹ حقیقی مبارک باد دے مستحق نیں جنہاں نے اہل پنجاب دے فکر بانجھ پن نوں دور کرن تے ساڈے ساریاں دی ملاقاتاں دا اہتمام کرن وچ کوئی کسر نہیں چھڈی۔ ایہناں دی وجہ نال اسیں ایس قابل ہوئے آں کہ وقتی تکلیفاں نوں فراموش کر کے کجھ لمحے دوستاں دی خوشی ونڈن لئی کڈ لینے آں۔
کلیان سنگھ نے کہیا کہ انقلابی اپنا سب کجھ داء اُتے لا کے ای تحریک نوں کامیاب بناندے نیں زاہد بھٹی نے کہیا کہ احمد رضا وٹو سب نوں نال لے کے چل رہے نیں جس پاروں اوہناں نے مختصر ویلے وچ نمایاں کامیابی حاصل کیتی اے۔ عتیق انور راجہ نے کہیا کہ پنجابی تحریک دے نال وابستگی پاروں بوہت زیادہ عزت ملی اے۔ کامریڈ عرفان نے کہیا کہ پنجاب ہائوس وچ جنم دن منان دی مثبت روایت دا فروغ خوش آئند اے۔ پرسانوں ایہناں لوکاں دے بارے وچ وی گل کرنی چاہیدی اے جیہڑے رات نوں خالی پیٹ سوندے نیں تے خودکشی کرن دے بہانے لبھدے نیں۔ دیپ سعیدہ نے کہیا کہ باغی دے اندر اک ہلچل مچی رہندی اے جیہڑی ایہنوں کسے طور اُتے چین نہیں لین دیندی، ایہہ ہلچل ایس دی اپنی کاز نال وابستگی پاروں پیدا ہوندی اے۔ انور عزیز چانڈیو نے کہیا کہ پنجاب ہائوس آ کے بوہت خوشی ہوئی۔ مدثر اقبال بٹ نال دوستی دی وجہ ایہناں دا پنجابی کاز لئی کھڑا ہونا اے۔ احمد اقبال بزمی نے کہیا کہ کمزوراں تے پسے ہوئے طبقات دی گل کرنا ای حقیقی جدوجہد اے۔ ایس دھرتی دے باسی اج کمزور ہو چکے نیں تے احمد رضا وٹو ایس جدوجہد وچ ساڈا مان نیں۔ افضل ساحر نے کہیا کہ اصل گل ایہہ نہیں کہ جینا کنج اے، اصل گل ایہہ وے کہ جدوں مریئے تے اسیں کجھ کیتا ہوئے۔ طارق جٹالہ نے کہیا کہ احمد رضا وٹو نے پنجابی پرچار دا جیہڑا بیڑہ چکیا اے اوہ ایس وچ ضرور کامیاب ہون گے۔
ایہہ چوں کہ سالگرہ دی تقریب سی تے طنز و مزاح دا سلسلہ وی جاری رہیا۔ تقریب دے اختتام اُتے پنجابی پرچار دے صدر احمد رضا وٹو نے جدوں سالگرہ دا کیک کٹیا تے جنم ودھائی دیاں صداواں بلند ہوئیاں تے سب دے چہریاں اُتے طمانیت نال بھرپور مسکراہٹ دوڑ گئی تے شرکائے محفل نے ایہناں دی لمبی عمری لئی دعا کیتی۔
تقریب دے میزبان بلال مدثر بٹ نے مہماناں دی پرتکلف کھانیاں نال دعوت کیتی تے حقیقی معنیاں وچ حق میزبانی ادا کیتا جد کہ مہماناں نے وی دل دی گہرائیاں نال ایس پرتکلف تقریب دے انعقاد اُتے وائس چیئر مین پنجابی میڈیا گروپ لئی تشکر دے جذبات دا اظہار کیتا تے ایس امید دا اظہار کیتا کہ ایس روایت نوں مزید فروغ دتا جائے گا۔