انھے واہ اعتماد دا ایفل ٹاور

حناپرویزبٹ

تریجی دنیا دا بھکھ نال بلکدا خطہ ہووے یاں دولت نال بھرے ترقی یافتہ ملک‘ اسمان توں اتریا ہویا دین الٰہی ہووے یاں فیر نام نہاد ضرورتاں لئی ایجاد کیتا گیا کوئی نظریہ یاں عقیدہ‘ جدید ترین سہولتاں نال بھریا معاشرہ ہووے یاں فیر محروم طبقہ‘ مہذب لوک ہون یاں فیر جبل جہالت تے براجمان بندے‘ تقریباً ساریاں دا ایس لفظ‘ ایہدے نال جڑیاں عادتاں یاں ایہدے تے مبنی رویے دے خلاف اتفاق اے۔ اوہ مجموعی طور تے کسے نہ کسے حد تک ایس لفظ نال ڈاڈھی نفرت کردے نیں ایہدے توں بچن دی کوشش دے باوجود بچ وی نہیں پاندے۔ ایہ لفظ اے جھوٹھ‘ جیویں جیویں معاشرہ سائنسی ترقی دی معراج تے اپڑدا جا رہیا اے اویں اویں صرف جھوٹھ نہیں سگوں سفید جھوٹ ہر پاسے پھیلدا جا رہیا اے۔ 2004ء وچ پیدا ہون والا نومولود سوشل میڈیا اجیہا قوی الجثہ اژدھا بن چکیا اے جو صرف 17 ورھیاں وچ ساڑھے چار ارب یعنی ادھی توں ودھ دنیا دی آبادی نوں اوہناں دی مرضی دے مطابق اپنا گرویدہ بنا چکیا اے پر نہ ایہدی بھکھ ختم ہو رہی اے تے نہ انسان ایہدے توں بچن دی کوشش کر رہے نیں۔ ماہرین دا کہنا اے کہ اگلے دس ورھیاں وچ پوری دنیا ایہدے نال منسلک ہو جاوے گی۔ انٹرنیٹ دے بناں معمولات زندگی نبیڑنا ناممکن ہو جاوے گا۔
کدی سوشل میڈیا تے مرکز نگاہ بنن یاں جانن لئی لماں عرصہ چاہیدا سی ہفتیاں نہیں کئی کئی مہینے سگوں کئی کئی ورھے لگ جاندے سن پر ہن ایہ سب ماضی دا قصہ ہو گیا اے ہن سوشل میڈیا تے فالوورز لے لوو‘ اشتہارات بالکل اوسے طرح وکھائی دینا شروع ہو گئے نیں جس طرح آلو لے لو‘ ٹینڈے لے لو‘ پیاز لے لو‘ دی پکار اسیں ورھیاں توں گلیاں وچ سن رہے آں۔ سماجی رابطیاں دی ویب سائٹس عملی طور تے فالوورز فیکٹریاں بن چکیاں نیں ایہ پہلے فری پیج بنان دی سہولت دیندیاں رہیاں نیں تے ہن مقبول ہون دی انسانی جبلت نوں ہوا دین لئی طرح طرح دے پرکشش پیکیجز پیش کر رہیاں نیں کدھرے ڈھائی ڈالر توں چار ڈالر وچ اک فالوور مل رہیا اے کدھرے 25ڈالر وچ اک ہزار تے کدھرے دس ڈالر وچ اک ہزار فالوورز مٹھے پکوڑیاں وانگوں ملدے نیں۔ زیادہ فالوور دا مطلب گوگل تے سوشل میڈیا ٹرینڈز دی فہرست وچ اُتلی تھاواں تے نمایاں ہوندا اے بوجوہ اجہی سافٹ تے پرکشش خبراں تے بلاگز چھپوائے جا رہے نیں جہدے نال فالوورز کلچر دی طلب وچ وادھا ڈیزائن کیتا گیا۔ ایہدے لئی ٹچ فون تے اینڈرائڈ ٹیکنالوجی نوں سستا کرکے عام کر دتا گیا۔ کرونا دے بعد تے کاروبار زندگی اک دم تبدیل ہویا کہ سوشل میڈیا نشے وانگوں لوکاں وچ پھیل چکیا اے جس گھر وچ ٹیلی فون وی نہیں سی ہوندا اوتھے پہلے کیبل اپڑی تے ہن پاکستانی عوام کیبل کٹوا کے مہنگا ترین وائی فائی لگوا کے سوشل میڈیا سنڈروم وچ مبتلا ہو چکے نیں۔ اعدادوشمار دے مطابق پاکستان وچ سوشل میڈیا صارفین دی گنتی 46ملین تک جا اپڑی اے جہدے وچ 41ملین فیس بک‘ تن ملین ٹویٹر جد کہ چالھی لکھ دے نیڑے انسٹاگرام دے فالوورز نیں‘ اکثریت نوجواناں دی اے پر وڈی عمر دے بندیاں دی گنتی وچ وی وادھا ویکھیا جا رہیا اے جہدا اختتام ہوندا وکھائی نہیں دیندا۔
آئو ذرا ماضی وچ جھاتی مارنے آں۔ 1968ء وچ گلوکاراں سائمن تے گارفنکل دا گیت ریلیز ہویا جو بری طرح فلاپ ہویا ایہدے وچ گلوکار گاندا اے کہ میں جانتا ہوں کہ میں جھوٹ کہہ رہا ہوں میں سچ نہیں کہہ رہا‘ بعد وچ 1973ء وچ اک جملہ سامنے آیا Fake it till you make it‘ 2010ء وچ امریکی ٹی وی سیریز Fake it till you make it جہڑی بھاویں فلاپ ہو گئی پر سوشل میڈیا دی ساری مارکیٹنگ کمپین ایسے ٹی وی سیریز دے دوالے گھمدی اے۔ ایس عنوان دا بڑا بے شرمی نال استعمال میاں نوازشریف دی حکومت نوں گران لئی نہیں سگوں پاکستان دی معیشت سنے ہر شعبے نوں تباہ و برباد کرن لئی کیتا گیا جہدی دنیا وچ کوئی دوجی مثال نہیں ملدی۔ Fake it till you make itدا لغوی معنی ایہہ وے کہ جھوٹا دکھاوا کردے رہوو جدوں تک کامیابی تہاڈے پیر نہ چھوہ لوے‘ یعنی اپنا مقصد حاصل نہ کر لوو‘ واقعی معصوم پاکستانیاں دے سامنے ریاست مدینہ دا ناں لے کے جھوٹ دا کوہ ہمالیہ کھڑا کر دتا گیا۔ Fake it till you make itدا دوجا معنی ایہہ وے کہ مہارت دا انج دا ڈھول کٹو کہ سارے تہانوں ہر شعبے دا نیوٹن کہنا شروع ہو جان اینی تکرار کرو تے کروائو کہ سارے تہاڈی ذہانت دے داعی ہو جان پر ہوا ایہ کہ لیان تے خوش آمدید کہن والیاں نوں شفیق الرحمن دیاں ساریاں حرکتاں بھُل گئیاں۔ Fake it till you make it دا تریجا معنی ایہہ وے کہ دوجیاں دے سامنے انج دا رویہ اختیا رکرو کہ اوہ تہاڈے تے اکھاں بند کرکے یقین کر لین تن ورھے پہلاں اکھاں بند کرکے ایسے اعتماد دا تسلیم شدہ ایفل ٹاور مشہور کیتا گیا سی پر کذب بیانی توں لے کے فیک فالوورز تک جیویں جیویں واری واری کجھ نمائشی غباریاں چوں ہوا نکلدی جا رہی اے اویں اویں اعتماد دا یفل ٹاور ڈگنا شروع ہو گیا اے اوہ ویلا دور نہیں جدوں ایہ زمین بوس ہو کے چکنا چور ہو جاوے گا تے فیر عوامی گیت وجنا شروع ہو جاوے گا۔ اچھے دن آئے ہیں شیر کو لائے ہیں۔٭٭