شعبہ زراعت وچ اک ہور انقلاب

کاشتکاراں دی بہبود لئی کسان کارڈ جاری

چوہدری شاہد اجمل

پاکستان تحریک انصاف دی حکومت نے وزیر اعظم عمران خان دی قیادت وچ کاشتکاراں نوں ریلیف فراہم کرن لئی کسان کارڈ دے اجرا دا سلسلہ شروع کیتا اے ایس طرح دے منصوبے دی مثال ماضی وچ نہیں ملدی۔ کسان کارڈ دا اجرا پی ٹی آئی حکومت دے سلوگن ’’کاشتکار خوشحال ہو گا تو ملک خوشحال ہو گا ‘‘ ولوں اک مثبت اقدام اے جس نال زراعت نال جڑے بندیاں دے معاشی مسائل گھٹ ہون گے۔ ایسے سلسلے وچ وزیراعظم عمران خان نے ڈیرہ اسماعیل خان وچ کسان کارڈ دے اجراء دا افتتاح کیتا، کاشتکار کسان کارڈ دے ذریعے رجسٹرڈ ڈیلر توں کھاد، بیج تے زرعی ادویات رعایتی قیمت اُتے حاصل کر سکدے نیں ایہہ سکیم رجسٹرڈ کاشتکاراں لئی اے، کسان کارڈ دے ذریعے کاشتکاراں نوں قرضے وی دتے جا سکن گے۔ ساڈے ملک وچ کسان ہمیشہ مہنگائی تے پریشانی دی چکی وچ پسدا رہیا اے پر موجودہ حکومت نے نہ صرف گندم، چاول و دیگر فصلاں دی قیمت ودھائیاں نیں بلکہ کسان کارڈ دی صورت وچ غریب کسان نوں ایس دی دہلیز اُتے سبسڈی فراہم کر دتی گئی اے جس نال کسان دی پیداواری لاگت وچ کمی تے منافع وچ وادھا ہویا اے ایس سال ملک وچ گندم، چاول ، مکئی تے گنے دی فصلاں دی ریکارڈ پیداوار ہوئی اے حکومت دے بروقت اقدامات نال کسان خوشحال ہویا اے۔ ماضی دی حکومتاں وچ کاشتکاراں لئی کوئی خاطر خواہ اصلاحات متعارف نہیں کروائیاں گئیاں سن جس دی وجہ نال کسان نہیں بلکہ مڈل مین منافع کما رہیا سی جد کہ موجودہ حکومت نے کاشتکاراں دی بہتری تے پیداواری لاگت وچ کمی لئی عملی اقدامات چکے نیں جس دی اک مثال کسان کارڈ دا اجرا اے جس دے تحت سبسڈی دی فراہمی دے پرانے طریقیاں دے متعلق کاشتکاراں دے تحفظات دور ہون گے تے کمپیوٹرائزڈ نظام دے ذریعے کساناں نوں سبسڈی شفاف طور اُتے آسانی نال میسر آئے گی۔ وزیراعظم عمران خان نے کسان کارڈ دے اجرا دا بوہت چنگا اقدام چکیا اے۔ صحت کارڈ دے بعد غریب کاشتکاراں لئی کسان کارڈ بوہت سہولت دا حامل اے۔ کسان کارڈ دے منصوبے نال کساناں نوں سبسڈی دی فراہمی دی صورت وچ معاشی مسائل گھٹ ہون گے تے کسان خوشحال ہوئے گا۔ پیداوار وچ وادھا کاشتکاراں دا معیار زندگی بہتر ہوئے گا تے دیہی معیشت اُتے مثبت اثرات مرتب ہون گے موجودہ حکومت اپنے پارٹی منشور دے عین مطابق زرعی اصلاحات نوں عملی جامہ پہنایا اے ایس توں پہلے اک زرعی ملک ہون دے باوجود کاشتکاراں نوں درپیش مسئلیاں نوں اینی اہمیت نہیں دتی گئی۔ کاشتکاراں نوں کسان کارڈ دی صورت وچ سبسڈی فراہم کرن نال نہ صرف گندم تے گنے دے کاشتکاراں دی پیداواری لاگت گھٹ ہوئے گی بلکہ منافع وی بہتر ہوئے گا۔ ایس نال کساناں نوں کھاد تے دیگر زرعی اشیاء اُتے سبسڈی ملے گی ایس نال کسان خوشحال ہوئے گا تے جدوں کسان خوشحال ہوئے گا تے ملک خوشحال ہوئے گا۔ ایسے طرح دے اقدامات نال ملک دے زرعی شعبے وچ انقلاب آئے گا تے ڈیرہ اسماعیل خان وچ کسان کارڈ دے اجراء دے موقعے اُتے کسان کنونشن نال خطاب کردے ہوئے وزیراعظم عمران خان نے کہیا کہ جدوں پاکستان قائم ہویا تے ساڈی آبادی 4 کروڑ توں وی گھٹ سی جیہڑی اج 22 کروڑ تیکر اپڑ چکی اے۔ آبادی جس شرح نال ودھ رہی اے اینی زرخیز زمین دے باوجود اسیں پچھلے ورھے 40 لکھ ٹن گندم درآمد کیتی۔ ایس وار پاکستان وچ گندم دی تاریخ دی سب توں وڈی پیداوار ہوئی ایس دے باوجود سانوں درآمد کرنی پئے گی کیوں جے ساڈی پیداوار اینی تیزی نال نہیں ودھ رہی۔ اسیں دالاں، گھیو سنے بیشتر کھان پین والیاں شیواں درآمد کرنے آں ایس لئی جدوں بین الاقوامی سطح اُتے قیمتاں ودھیاں تے ایتھے وی مہنگائی ہو گئی۔ اوہناں نے کہیا کہ 2شیواں نال آبادی دی رفتار ضمنی اے اک بنیادی تعلیم دی فراہمی تے بنیادی صحت دے نظام نوں ٹھیک کرنا جس اُتے اسیں کم کر رہے آں پر نال ای سانوں ایہہ منصوبہ بندی وی کرنی اے کہ ودھدی ہوئی آبادی پاروں کس طرح سب دا پیٹ پالنا اے۔ ایہناں دا کہنا سی کہ جے ایسے طرح آبادی ودھدی رہی تے پیداوار دی شرح ایہو رہی تے آئندہ ورھیاں وچ پاکستان وچ بوہت بھُک ہوئے گی جے اسیں آپ اناج اگاواں گے تے عالمی سطح اُتے قیمتاں ودھن نال خاص فرق نہیں پئے گا پر اج جد کہ اسیں درآمد کر رہے آں تے ایس دا اثر ساڈے اُتے پئے رہیا اے۔ اوہناں نے کہیا کہ سانوں اپنے آبی ذخائر تے پانی دے بہتر استعمال دی منصوبہ بندی کرنی ہوئے گی تاکہ اسیں اپنی زمین توں زیادہ پیداوار حاصل کر سکیے نال ای زرعی تحقیق اُتے زیادہ توجہ دین دی لوڑ اے اوہناں دا کہنا سی کہ بھارت دی زرعی پیداوار ساڈے توں زیادہ اے کیوں جے اوتھے تحقیق زیادہ ہوئی، ایس لئی اسیں زرعی پیداوار ودھان لئی پانی دے بہتر استعمال زمین دے بہتر استعمال تے بیج نوں ہائبرڈ قسماں وچ بدلن جہے معاملات اُتے کم کر رہے آں۔ اوہناں نے کہیا کہ جدوں تیکر اسیں سچے، امانت دار تے انصاف کرن والے نہیں بناں گے ساڈی قوم عظیم قوم نہیں بن سکے گی۔ اللہ نے پاکستان وچ کسے شے دی کمی نہیں رکھی۔ ایتھے سانوں ہر قسم دی نعمتاں نال نوازیا اے پر سانوں اک عظیم قوم بنن لئی سچائی تے کردار چاہیدا اے۔ وزیراعظم نے کہیا کہ میں ساری دنیا ویکھی ہوئی اے جنہاں لوکاں نوں اسیں کافر کہنے آں تسیں حیرا ن ہوو گے اوتھے کوئی ویکھن والا نہیں ہوندا پر لوک پیسے پا کے اخبار چکدے نیں جیہڑے اُنج ای رکھے ہوندے نیں، اوتھے سوچدے وی نہیں کہ انتخابات وچ دھاندلی ہوئے گی۔ ایہناںدا کہنا سی کہ اوتھے لوک آندے نیں سدھا ووٹ پا کے چلے جاندے نیں کوئی پچھن والا نہیں ہوندا۔ ساڈے انتخابات توں پہلے اسیں گھنٹیاں ایس گل اُتے میٹنگ نہیں کردے کہ ووٹرز نوں کنج کڈنا اے بلکہ ایس اُتے گل ہوندی اے کہ دھاندلی کس طرح روکنی اے۔ اوہناں نے کہیا کہ ساڈے لئی بوہت بدقسمتی دی گل اے کہ ساڈے کول انج دے لوک آئے جیہڑے اج ارباں روپئے دے اثاثے لے کے باہر بیٹھے ہوئے نیں اک رسید نہیں دس سکدے کہ ایہہ پیسہ کتھوں آیا تے اوتھے بہہ کے ایتھے تقریراں کر رہے نیں۔ وزیراعظم نے کہیا کہ اسیں اک عظیم قوم بننا سی ، اج سسٹم تے ایہناں مافیاز دے خلاف جیہڑی جنگ اسیں لڑ رہے آں ایس وچ کامیاب ہوواں گے تے قوم نے اپنے آپ نوں تبدیل کرنا اے۔
کسان پاکستان دی ریڑھ دی ہڈی اے ایہنوں جنہا مضبوط کراں گے، اوہنا اسیں اپنے ملک نوں مضبوط کراں گے۔ موجودہ دور وچ کساناں لئی گندم دی امدادی قیمت وچ 500 روپئے دا وادھا ہویا جس دے نتیجے وچ کساناں نوں ملن والی گندم، مونکی، مکئی تے دودھ دی قیمت نال کساناں دے کول اضافی 11 سو ارب روپئے گئے نیں سب توں ودھ غربت پنڈاں وچ اے تے ایس طرح اسیں تخنیف غربت دے ہدف ول ودھ رہے آں۔ 12 سو ارب روپئے پنڈ دے علاقیاں وچ جان دا مقصد اے کہ اوتھے حالات بہتر ہون گے۔ کسان کارڈ اُتے اک ہزار دی ڈی ایل پی اُتے سبسڈی دتی جائے گی جس وچ کھاد تے کیڑے مار ادویات اُتے وی سبسڈی ملے گی۔ کسان کارڈ دے ذریعے قرضے وی دے سکن گے تے جدوں قدرتی آفات پاروں فصل تباہ ہو جاندی اے تے ایہناں دی وی ایس کارڈ دے ذریعے مدد کیتی جائے گی۔ حکومت دے ارباں روپئے دے ٹرانسفارمیشن پلان وچ 200 ارب روپئے صرف نہراں پکیاں کرن لئی مختص نیں۔ چین دے نال گل کر کے زراعت نوں سی پیک وچ شامل کر دتا گیا اے ایس طرح اسیں چین دے تجربات توں فائدہ چک سکاں گے۔ پاکستان وچ دنیا وچ ستویں یا اٹھویں نمبر اُتے گاواں مجھاں نیں پر اسیں ہجے وی دُدھ درآمد کرنے آں کیوں جے ساڈی پیداوار گھٹ اے ایہناں مویشیاں دی نسل بہتر بنان لئی حکومت نے 40 ارب روپئے مختص کیتے نیں جس نال اک توں2 سال وچ تبدیلی آ جائے گی۔ جانوراں دی نسل وچ بہتری لیا کے پیداوار وچ وادھے نال اسیں اپنے لوکاں نوں نہ صرف گھٹ قیمت وچ دودھ مہیا کر سکاں گے بلکہ پنیر وغیرہ برآمد وی کر سکاں گے جے اسیں مویشیاں دی پیداوار 3 گنا زیادہ کر سکیے تے اگلے 3 ورھیاں وچ 25 ارب ڈالر صرف دُدھ تے چیز دی برآمد نال کما سکنے آں۔ پاکستان وچ سبزیاں تے پھلاں دے نقصان 50 فیصد نیں جد کہ اناج وچ ہون والے نقصان 20 فیصد نیں جے گندم دی پوری پیداوار وچوں 20 فیصد گندم ضائع ہو جائے تے ارباں روپئے دا نقصان ہوندا اے جد کہ جے ادھے پھل تے سبزیاں ضائع ہون توں بچا لیاں جان اسیں کنہا سستا پھل تے سبزیاں اپنے لوکاں نوں دے سکاں گے۔ ایس لئی فیصلہ کیتا گیا اے کہ پاکستان وچ اسٹوریج تے فوڈ پروسینگ وچ وسعت تے جدت لیائی جائے گی جس نال ملکی زرعی پیداوار نوں نقصان توں بچایا جا سکے گا موجودہ حکومت نے پاکستان دی بہترین زرعی تحقیقاتی ادارے جیہڑے توجہ نہ ملن دی وجہ نال تھلے چلے گئے سن ایہناں دی تجدید لئی منصوبے تشکیل دتے نیں تے دال، تیل دے بیج، سویا بین، اسپغول ہن پاکستان وچ اگان دی کوشش کیتی جا رہی اے کیوں جے ایہناں نوں اسیں باہر توں درآمد کردے آں۔ پاکستان اک انج دا ملک اے جتھے زیادہ تر علاقہ پیداوار لئی موافق درجہ حرارت یعنی 15 توں 38 ڈگری سینٹی گریڈ دے وچکار اے ایس دا فائدہ ایہہ وے اسیں کجھ وی اگا سکنے آں۔ ساڈی زراعت بنیادی سطح دی اے 96 توں 97 فیصد کسان نکے کسان نیں جیہڑے اپنی ضروریات لئی پیداوار اگاندے نیں۔ ایکسٹیٹنل سروس دے ذریعے ایہناں نوں تربیت دتی جائے گی کہ اوہ اپنی پیداوار ودھان تاکہ اپنے لئی خوراک رکھن دے علاوہ اوہ ایہنوں مارکیٹ وچ فروخت وی کرن تے خوشحال ہو سکن۔