اک توں ودھ شادیاں

اسدمفتی

فرانسیسی حکومت نے فرانس دے اک مسلمان شہری نوں چتاونی دتی اے کہ اوہ تعداد ازدواج تے عمل کر رہیا اے تے فرانس دے قنون دی خلاف ورزی دا مرتکب ہو رہیا اے ایس لئی اوہدا پاسپورٹ ضبط کر لیا جاوے گا۔ ایس مسلمان شخص یس ہباج نے کہیا اے کہ اوہ صرف اک بیوی رکھدا اے تے باقی ساریاں اوہدی دوست نیں جے دوست رکھن نال فرانس دی شہریت ختم ہو سکدی اے تے فرانس دے کئی لوک شہریت توں محروم ہو جان گے۔ اودھر سعودی عرب وچ مرداں نوں چار ویاہ دی اجازت ہون دے باوجود ملک وچ غیرشادی شدہ عورتاں دی گنتی وچ خوفناک حد تک وادھا ہو گیا اے۔ اک سروے رپورٹ موجب تریہہ لکھ عورتاں وچوں صرف 29لکھ دو ہزار 15 عورتاں شادی شدہ جد کہ 30 سال تک دیاں عورتاں دی گنتی 18لکھ 13ہزار تک اپڑ گئی اے۔ رپورٹ موجب ایہناں غیرشادی شدہ عورتاں دی اکثریت مکہ تے ریاض وچ اے۔ ایہو وجہ اے کہ سعودی عرب وچ غیرشادی شدہ عورتاں دی ودھدی ہوئی گنتی تے قابو پان لئی سعودی نوجواناں دے اک گروپ نے اک توں ودھ شادیاں دی وکالت کیتی اے تے ہر مجاز سعودی مرد اگے درخواست کیتی اے کہ اوہ چار عورتاں نال ویاہ کرے۔ ایس گروپ نے فیس بک تے ایہدے لئی اک مہم شروع کر دتی اے جہدا عنوان اے سانوں چار دی لوڑ اے۔ بھاویں سعودی عرب وچ غیرشادی شدہ عورتاں دی گنتی دا شمار نہیں پر ایہ حقیقت اے کہ ایہناں دی گنتی بہت زیادہ اے تے ایہدی وجہ ایہ دسی جاندی اے کہ سعودی معاشرے وچ شادی مالی اعتبار نال بڑی مہنگی ہو چکی اے ایس لئی فیس بک تے ای لوکاں نوں کہیا گیا اے کہ شادی نوں آسان بنائو۔
دوجی‘ تریجی یاں چوتھی شادی دا حکم‘ رواج یاں لوڑ صرف سعودی عرب وچ ای نہیں سگوں بہت سارے مسلم ملکاں وچ ایہ شوق پایا جاندا اے۔ اوہناں دے خیال وچ زندگی اک ہور خوشگوار موقعے توں دوچار ہو جاوے گی۔ اک مسلم شادی بیورو دا دعویٰ اے کہ اوہناں دے تقریباً ڈیڑھ لکھ ارکان نیں جہناں وچ ہر مہینے پنج توں دس ہزار بندیاں دا وادھا ہو رہیا اے جو اکثر ایہ کہندے نیں کہ ایس واری پہلے توں بہتر انتخاب کراں گے۔ عقدثانی دے بارے جھجک تے ہچکچاہٹ دا تیزی نال خاتمہ ہو رہیا اے۔ طلاق شدہ بندیاں دا ایقان اے کہ تلخ تجربے دے بعد دوجی بیوی دے نال بہتر شادی شدہ زندگی گزار سکنے آں۔ سماج وچ وی ہن دوجی شادی یاں طلاق نوں بری نگاہ نال نہیں ویکھیا جاندا۔ پنجاہ توں سٹھ ورھے دے بندے وی عقدثانی دی دوڑ وچ برابر دے شریک نیں۔ ایہ گل ذہناں وچ جگہ پا گئی اے کہ طلاق مسئلیاں دا حل نہیں۔ سگوں دوجی یاں تریجی شادی خوشگوار زندگی دا پیش خیمہ بن سکدی اے۔ اک مسلم ویب سائٹ نے دعویٰ کیتا اے کہ اوہدے کول یورپ‘ ایشیا‘ افریقہ تے یو ایس اے دے پنج سو توں ودھ شہریاں دے بندیاں دی رجسٹریشن اے جہناں وچوں کجھ دوجی یاں تریجی شادی دے خواہش مند نیں۔
دوجی شادی دے مسئلے تے شرعی حوالے نال علماء کرام بہتر وضاحت کر سکدے نیں۔ بہرحال ایس خیال تے زور دینا شاید غلط نہیں ہووے گا کہ دنیا وچ ہون والی پیش رفت تے اسلام دوران کوئی تعلق نہیں پر ایہ خطرہ وی موجود اے کہ ایہنوں الزام دھرن لئی استعمال کیتا جا سکدا اے جہدی وجہ نال مسلماناں تے غیرمسلماناں یاں مسلم ملکاں تے غیرمسلم ملکاں دے وچکار غلط فہمی ہور ودھ سکدی اے پر ایس گل توں وی نظراں نہیں پھیریاں جا سکدیاں کہ اجہیاں عادتاں تے روایتاں جو اسلام نال متضاد نہیں سن اوہناں نوں نہ صرف قبول کر لیا گیا سگوں بعد وچ مقامی باشندیاں نے کجھ روایتاں نوں اکثر اوقات اسلام دا جز نہیں تے گھٹو گھٹ اسلام دے عین مطابق ضرور قرار دے دتا تے فیر ہولی ہولی کہن تے سمجھن لگ پئے کہ ایہ روایتاں حقیقت وچ اسلام دا جز نیں۔ انج کیوں اے؟ میں وی سوچنا واں تسیں وی سوچو۔
کتنی دلکش ہے اس کی خاموشی
ساری باتیں فضول ہوں جیسے