احسن اقبال ولوں وزیر اعظم عمران خان نوں پارلیمنٹ توں اعتماد دا ووٹ لین دا مطالبہ
اسلام آباد (پنجابی میڈیا گروپ )پاکستان مسلم لیگ (ن) دے سیکرٹری جنرل احسن اقبال نے وزیر اعظم عمران خان کولوں پارلیمنٹ توں اعتماد دا ووٹ لین دا مطالبہ کردیاں ہویاںآکھیا اے کہ سات روز قومی اسمبلی دا کورم ٹٹنا وزیراعظم اتے عدم اعتماد اے۔ صدرمملکت وزیراعظم نوں پارلیمنٹ توں دوبارہ اعتماد داووٹ لین دی ہدایت کرن۔ وزیر اعظم خود قوم نوں گمراہ کررہے نیں ،ایف ڈبلیو او یا این ایل سی نے سی پیک دے منصوبے بنائے تے وزیر اعظم دسن ایہناں اداریاں نے پیسہ کمایا اے؟وزیراعظم اک پاسے مکمل منصوبیاں دی لاگت نوں بڈپرائس دے نال موازنہ کررہے نیں ایہہ اینج ای اے اک تساں آماں دا سیباں دے نال موزانہ کرو۔ تساں قوم نوں بے وقوف بنانا چھڈدیو۔ چین دے توانائی دے منصوبے نہ لگدے تے اج وی دس دس گھنٹے لوڈشیڈنگ ہوندی۔سانوں معلوم نہیں سی دھاندلی دے ذریعے مسلط کردہ ساڈی معیشت نوں وی تباہ کردیوے گا۔ پچھلے وزیرداخلہ احسن اقبال ہوراں نے آکھیا اے کہ اگر روپیہ ایسی طرحاں لڑکدا رہوے گا تے کوئی سرمایہ کاری نہیں آوے گی۔ جمعرات نوں ایتھے ڈاکٹر طارق فضل چوہدری دے ہمراہ میڈیا دے نال گل بات کردیاں ہویاں احسن اقبا ل نے آکھیا کہ دو روز توں سلیکٹڈ وزیراعظم نے مسلم لیگ ن دے دور سرکار دے منصوبیاں اتے گمراہ کرن دی کوشش کررہے نیں یا تے وزیراعظم دے مشیر نالائق نیں یا وزیراعظم خود قوم نوں گمراہ کر رہے ہیں۔





















